ليلة رأس السنة من المناسبات اللي بتكون فرصة ان الناس تحتفل بيها بإستقبال السنة الجديدة سواء في البيت أو في أماكن السهر زي الفنادق والمطاعم المشهورة، وبما اننا كأمهات لايف ستايل حياتنا بيكون صعب اننا نقضي سهرة بره البيت أو نخرج من وقت للتاني بسبب روتين الحياة والمسئوليات لكن بما إن ليلة راس السنة قربت، ممكن ننتهز الفرصة دي عشان نكسر الروتين ونحتفل بالسنة الجديدة وفي الموضوع ده هنقولك على شوية أفكار رومانسية عشان تقضي ليلة رأس السنة مع زوجك.

 

الإهتمام مبيطلبش

الستات اللي بتستنى إن جوزها هو اللي يبادر ويعمل حركة حلوة ويعزمها على سهرة حتى لو في حديقة الفسطاط أو حتى ساندوتشين شاورما أبو حيدر ومعاهم كوباية عصير مانجا لزوم التبذير متستنيش عشان الرجالة مميكنة إنها متعملش حاجة إلا لما يطلب منهم إنهم يعملوا الحاجة وبالتفصيل الممل ، عشان كده الاهتمام بيطلب وبشدة خصوصًا لو جوزك ساعات مش بيعرف يتفهم مشاعرك واحتياجاتك.. وعشان ترتبي لفكرة سهرة سواء في البيت أو في أماكن الاحتفالات ممكن تعملي الخطوات دي:

  • اطلبي من جوزك ورتبي معاه انكم تقضوا سهرة رومانسية في راس السنة عشان يرتب أولوياته يومها وتفكروا مع بعض في مكان السهرة سواء البيت أو أماكن الحفلات زي الفنادق والمطاعم المشهورة.
  • اطلبي من مامتك انك تودي أولادك عندها اليوم ده عشان تهتمي بترتيب تفاصيل السهرة سواء هتعملي عشا في البيت أو مظهرك وستايل لبسك في السهرة.
  • اعملي الأكلة المفضلة ليكي إنتي وجوزك ورتبي ترابيزة السفرة عشان تبقى مناسبة لشخصين وزينيها بالشموع.
  • لو عندك الإمكانية انك تسافري مكان جديد رتبي مع جوزك ورتبوا السهرات والانشطة اللي ممكن تعملوها مع بعض هناك.

 

 

عايزة ورد يا إبراهيم

وهنا بردو هنرجع لنفس النقطة الاهتمام بيطلب عادي جدًا عشان فعلًا فيه جزء منهم مش بيبقى فاهم إحتياجاتنا، فممكن تعملي فكرة جديدة في راس السنة وهي تبادل الهدايا، اطلبي من جوزك هدية مميزة يديهالك في راس السنة زي ما يسرية طلبت من إبراهيم يجبلها ورد، وانتي كمان فكري في حاجة بسيطة جوزك يتبسط بيها زي أكتر نوع شوكولاتة بيحبها أو كتاب أو كرافاتة للشغل.

 

 

بحب السيما

لو هتقضي سهرة راس السنة في البيت، اعملي سهرة أفلام Movie Night لفيلم رومانسي زي هيبتا أو New Year’s Eve وجهزي سناكس خفيفة.

 

 

ودي كانت شوية أفكار بسيطة لسهرة رومانسية مع جوزك في البيت حابين نعرف هتقضوا ليلة راس السنة السنة دي إزاي؟

What do you think of this post ?
+1
0
+1
0
+1
0
+1
0
+1
0
+1
0
SHARE