مع دخول الشتاء ودخول أجازة نص السنة، بيبقى فيه وقت طويل الولاد بيقضوه في البيت. وطبعًا مع طول وقتهم في البيت بيزهقوا من اللعب، خصوصًا لو انتِ بتحددي وقت الشاشات لأولادك، يعني التليفزيون مش أكتر من نص ساعة (لو مسموح به أصلًأ) والموبايل كمان مسموح به برضه وقت محدد جدًا أو مش مسموح به خالص. وبكده، بيكون لازم تلاقي لأولادك أنشطة يقضوا بيها وقت طويل وبيبقى كمان عندك فرصة إنك تقضي مع أولادك وقت له قيمة عالية وتعملوا أنشطة مشتركة هتقرب بينكم.

 

التخييم

طبعًا أول ما نسمع كلمة التخييم ييجي في بالنا الكشافة والمخيمات. لكن التخييم اللي نقصده هنا هو إنك ببساطة تختاري ركن متعامد في البيت تفرشي على أرضيته دفاية السرير فوق السجادة وتحطي cushions (مخدات الليفينج روم) على قد عددكم انتِ وأولادك وتعلقي مسمارين في الحيطتين تعلقي عليهم طرفين بطانية وتستخدمي إضاءة خافتة زي فوانيس جوا الخيمة دي وتشربوا مع بعض مشروبات شتوية دافية زي الكاكاو والسحلب وتاكلوا بسكوت الجنزبيل أو كيكة شوكولاتة تدفيكم.

 

الحكي

سواءً وانتِ بتقري من كتاب أو هم يقروا من كتاب، أو حتى تألفوا قصص وتحكوها. وعلى فكرة الحكي لكل الأعمار مش بس للأطفال، إنما هو فن ممكن للكبار كمان يستمتعوا به. ممكن تستخدموا في الحكايات عرايس يد أو العرايس العادية والدباديب واللعب اللي عندهم مع إنكم تلعبوا بأصواتكم عشان تمثلوا الشخصيات المختلفة في الحكاية. ممكن للمزيد من الدفء إنكم تحكوا في الخيمة اللي عملتوها.

 

التريكو والكروشيه

لو عندك بنات أو ولاد كبروا شوية ويقدروا يتحكموا في أعصاب إيديهم، ممكن تعلميهم وتتعلمي معاهم الكروشيه والتريكو وتعملوا مع بعض أشكال مختلفة، ممكن تكون أشكال بسيطة زي دواير ووردات صغيرة أو كوفيات وبلوفرات. وممكن كل ما تتعلموا شكل جديد تعملوا تحدي أو مسابقة صغيرة بينكم وبين بعض مين هيخلص الشكل الأول. اختاري ألوان خيط كتير ومقاسات إبر كتير عشان تقدري تجذبيهم للألوان المفضلة عندهم وعشان كمان مقاسات الإبر هتغيّر من مقاس الحاجة في الآخر.

 

وانتِ قولي لنا في التعليقات انتِ بتعملي إيه في أيام وليالي الإجازات الطويلة.

What do you think of this post ?
+1
0
+1
0
+1
0
+1
0
+1
0
+1
0
SHARE