قربنا نودع سنة 2019 ونستقبل السنة الجديدة 2020 بقرارات وأمل إننا نحقق جزء من كل حاجة ما قدرناش نحققها السنة دي. مش هننكر إن سنة 2019 كانت صعبة ومرينا بأحداث صعبة ومؤلمة كتيرة بس بردو كان فيها إنجازات ونجاحات عظيمة كتير. في المقال ده هنعرفكم على جزء من أهم الأحداث  اللي حصلت في سنة 2019.

 

الطفل زين يوسف أصغر متحدث مصري في منتدى شباب العالم 2019

زين يوسف الطفل المصري اللي قدر يحارب مرض السرطان أربع مرات وقدر بشجاعته وخفه دمه إنه يلفت الأنظار ليه في المؤتمر بقصته الملهمة ويدي أمل لكل الحضور بإنهم يقدروا ينتصروا بقوة الإرادة والثقة في ربنا، ومن ضمن اللقطات المميزة في المؤتمر والدة زين رضوى موسى اللي حياها كل الحضور في المؤتمر وأطلقوا عليها لقب البطلة لأنها كانت مصدر قوته وقدرت إنها تدعم زين في كل خطوة في محنته.

 

الطفل السوداني جون ضحية التنمر بجانب الرئيس السيسي في منتدى شباب العالم 2019

 

من فترة انتشر فيديو على السوشيال ميديا للطفل الجون وهو بيتعرض لإسائات وتنمر في الشارع، وفي افتتاح المسرح العالمي استضاف الرئيس السيسي الطفل جون في المنتدى في شرم الشيخ وقعد بجانب الرئيس في الصفوف الأولى. وصرح جون لجريدة الأهرام إنه كان مبسوط جدًا وما كانش مصدق نفسه إنه يقعد جنب الرئيس.

 

القبض على الشباب المتهمين بالتنمر على الطفل جون

بعد الفيديو اللي انتشر للمضايقات اللي اتعرض لها الطفل جون، تم القبض على الشابين اللي في الفيديو والشاب اللي كان بيصور الواقعة.

 

بنت مصرية قدرت تلغي كلمة “البله المغولي” من مناهج التعليم المصري

 

أصدر وزير التعليم العالي الدكتور خالد عبد الغفار قرار بحذف كلمة “البله المغولي” من كتب مناهج الجامعات المصرية بعد طلب تقدمت به بنت مصرية من أصحاب متلازمة داون شافت إن الكلمة غلط وبتهين أصحاب المتلازمة. سما رامي أحمد قدمت طلب لوزير التعليم العالي بإلغاء الكلمة دي لما استاءت منها وبالفعل استجاب لها الوزير وكمان تواصل مع الدكتور محمد عثمان الخشت رئيس جامعة القاهرة إنه يصدر تعليمات بإلغاء المصطلح من المناهج والكتب الجامعية.

 

 

تنفيذ حكم الإعدام في مغتصب طفلة البامبرز

من 3 سنين سمعنا عن حادثة بشعة وهي اغتصاب طفلة صغيرة عندها 20 شهر والسنة دي اتنفذ حكم الإعدام للمغتصب.

 

مصر للطيران بتطلق رحلات بطاقم نسائي كامل

نظمت الشركة الوطنية شركة مصر للطيران رحلة بطاقم نسائي كامل بقيادة كابتن طيار هبة درويش ومساعد طيار سارة رشدي لاثينا على بوينج 737-800.

أول كافيه في مصر بعاملين من متلازمة داون

 

في خطوة فريدة من نوعها، تم إفتتاح أول كافيه في مصر بيضم أصحاب متلازمة داون ليه كطاقم عاملين لدعمهم ومساعدتهم على دمجهم في المجتمع.

 

 

أول معيد من أصحاب متلازمة داون

إبراهيم الخولي نجح إنه يحقق حلمه في إنه يبقى أول معيد من أصحاب متلازمة داون في كلية الأعلام بالجامعة الكندية وبجانب إنه متفوق دراسيًا، إبراهيم حاصل على ميداليات عالمية ومحلية في رياضة التنس الأرضي.

 

المصادر:

youm7

ahram.org

dostor.org

ahram.org

youm7.com

RahetBally

What do you think of this post ?
+1
0
+1
0
+1
0
+1
0
+1
0
+1
0
SHARE