كلنا بنشوف وبنسمع عن أسعار الهدوم الشتوي وبنتضايق كتير لما يبقى نفسنا نغيّر ونجدد بس الميزانية ما تسمحش بشرا حاجات كتير. في المقال ده، هنقول لك شوية نصايح تقدري بيها تظبطي دولابك وتغيري وتجددي بميزانية قليلة.

 

اشتري في فترة التخفيضات

طبعًا، كل سنة بيكون فيه موضة غير السنة اللي قبلها. لكن فيه بعض الحاجات عمرها ما بتبقى مش موضة في الشتا. ودي الأساسيات زي الجاكيت، البالطو، الكوفيات، والبوت. ممكن في آخر الشتوية، لما الـsale أو الأوكازيون يبدأ، تبتدي تشتري الحاجات اللي انتِ عارفة إنك بتحتاجيها كل شتا. وفيه محلات كتير بتعمل لحد 50 و70% تخفيض في آخر كل موسم. بكده، ممكن توفري وتشتري أكتر من item.

 

اتعلمي كروشيه أو تريكو

الشتا بيحب التريكو والكروشيه والحاجات الـhandmade. لو اتعلمتي واحدة من الحاجات دي تقدري تعملي لنفسك بلوفر أو جاكيت حلوين جدًا وكمان كوفيات. ده له أكتر من فايدة: أولًا انتِ هتتعلمي craft جديدة وهواية مسلية، ثانيًا هتوفري كتير جدًا، ثالثًا الكروشيه والتريكو معروفين جدًا بإنهم من الأنشطة اللي بتهدي الأعصاب جدًا.

 

البسي طبقات

في الشتا، استخدام طبقات كتير بيدفي. فممكن تلبسي undershirt وبلوزة أو تيشيرت صيفي تحت البلوفر. ده هيساعد إنه يدفيكي من غير ما تحتاجي لجاكيت فوق.

 

جراج سيل  Garage Sale

ممكن انتِ وصاحباتك أو انتِ وجاراتك أو جروب الأمهات بتاع ولادك في المدرسة تعملوا garage sale كل آخر شتوية. بالطريقة دي، هتقدري تغيري وتجددي في دولابك بمجرد التبادل مع صاحباتك.

 

أعيدي التدوير

مش بمعنى الكلمة. كتير مننا لما بنشتري هدوم، بنشتري طقم على بعضه من غير ما نغير فيه، وبالتالي لما بنحتاج تجديد، بنحتاج نشتري طقم على بعضه برضه. نصيحتي لكِ هنا إنك تبدلي بين الأطقم. البسي بنطلون مختلف على الجاكيت الواحد وجواكت مختلفة على البنطلون الواحد. بدلي بين الـitems المختلفة هتلاقي عندك تنوع أكبر.

 

استخدمي الأكسسوارات بذكاء

ساعات تغيير الأكسسوارات والكوفية والجزمة على نفس الطقم بيبين الطقم مختلف تمامًا. بننصحك تغيري الأكسسوارات والكوفية والشنطة والجزمة عشان تحسي بتغيير أكتر وبسعر أقل.

وانتِ قولي لنا بتوفري إزاي في الميزانية وانتِ بتشتري هدوم الشتا.

 

مصدر ساعدنا على كتابة المقال:

thriftyfun.com

What do you think of this post ?
+1
0
+1
0
+1
0
+1
0
+1
0
+1
0
SHARE