تقريبًا كلنا بنحب القهوة بأشكالها المختلفة. بس نقدر نقول إن القهوة التركي من أكتر أشكال القهوة استخداما وانتشارا ونقدر نقول إنها متوافرة جدًا مقارنةً بأنواع تانية. كمان سعرها في المتناول. الجميل في القهوة إنها مش بس بتحتوي على الكافيين حبيب الجميع كل صباح، إنما كمان بتحتوي على مجموعة متنوعة من الفيتامينات ومضاد الأكسدة اللي فعلًا مفيدة لكل جزء في الجسم. بس المرة دي لأننا بنحب الابتكار والتجديد، قررنا نجيب ونجرب وصفة للقهوة التركي مش للشرب إنما لـمقاومة الشيب اللي بيهاجم شعرنا حتى على الرغم من صغر سننا. الحلو في الوصفة دي إنها طبيعية وده بيخدم الاتجاه العام لتقليل المواد الكيميائية اللي بنتعرض لها في حياتنا اليومية. ولازم نفتكر إن كل الوصفات الطبيعية بتحتاج وقت والتزام علشان توصلي للنتيجة المطلوبة. جربيها وقولي لنا نتيجتها كانت إزاي معاكي.

وصفة صبغة الشعر عن طريق القهوة والبلسم:

  • اغلي كوباية أو اتنين من القهوة العضوية. ولازم تكون عضوية لإنها لو ما كانتش كده، هتكون مليانة بالكيماويات والمواد الحافظة وده كفيل بتضييع الفايدة المطلوبة.
  • اختاري قهوة تكون متحمصة غامق أو إسبريسو. كل ما كانت غامقة كل ما كانت نتيجتها أفضل.
  • سيبيها تغلي حوالي نص ساعة. وبعد كده سيبيها تبرد أو استخدميها فاترة. المهم مش سخنة علشان ما تسببش ضرر لفروة راسك وشعرك.
  • اخلطي القهوة المغلية مع نوع البلسم أو مُنعِّم الشعر المفضل ليكي. كوباية قهوة من الخليط بتاعك مع تلات معالق من البلسم مع معلقتين من مسحوق القهوة. استخدمي المعلقة لتسهيل خلط المكونات مع بعض. لو شعرك طويل تقدري تزودي الكميات علشان تقدري تحصلي على تغطية كاملة لشعرك.
  • دلوقتي، افردي الخليط ده على كامل شعرك واستخدمي مشط واسع الأسنان علشان تحصلي على تغطية كاملة وعميقة. ارفعي شعرك في شكل كحكة وسيبيه لمدة ساعة على الأقل. لأن بعد ساعة البلسم هيبتدي ينشف على شعرك.
  • علشان تسهلي على نفسك طريقة الماسك ده يفضل تكوني قدام مرايا وحاطة فوطة على كتفك علشان تقدري تتحكمي في أي جزء ممكن يقع منك خلال استخدامك.
  • اشطفي شعرك بمياه بس. ما تستخدميش شامبو. مجرد المياه كافية للتخلص من الماسك ده.

جربي الوصفة دي لمدة تلات شهور مرتين في الأسبوع أو لحد ما توصلي لدرجة اللون اللي عايزاه. ومع الوقت هتلاقي تغيير واضح في لون شعرك ومقاومته للون الأبيض.

المصادر:

Wikihow

Leaf

TeenVogue

What do you think of this post ?
+1
0
+1
0
+1
0
+1
0
+1
0
+1
0
SHARE