كتير مننا لما بندخل على جروبات الشعر الكيرلي أو حتى الشعر الطبيعي من غير استخدام مواد مضرة وكيميائية في الشعر، بنلاقي كلمات معينة أو مصطلحات بتشرح غالبًا خطوة من خطوات روتين الشعر الكيرلي بس فيه حاجات كتير عاملة زي الطلاسم ومش بنبقى فاهمينها. وعشان كده، جمعنا لك في المقال ده أشهر المصطلحات دي وأضافنا لك صور عشان يوصل لك المعنى بالظبط.

 

Cowash

الكلمة مكونة من شقين: Co اللي هي اختصار conditioner أو بلسم الشعر وwash يعني غسيل فالمصطلح ده يعني الغسيل بالبلسم إللي هو خطوة أساسية في الروتين لأن الشعر في روتين الشعر الكيرلي مش بيتغسل إلا بالبلسم الخالي من السلفات والسيليكون.

 

Leave in

الليف إن معناها الحرفي “نسيبه فيه” ودي بتتقال على البلسم اللي احنا بنسيبه في الشع من غير شطف ودي أنواع معينة من البلسم آمنة على الشعر. على عكس المعتاد في طرق الغسيل العادي، البلسم مش كله بيتشطف في روتين الشعر الكيرلي أو على الأقل بعد الشطف، بندهن الشعر بالبلسم.

 

Scrunch

دي طريقة بنمسك بيها اطراف الشعر في راحة الكف ونرفعه لفوق.

Plop

معنى بلوب إنك تلفي الشعر بتيشيرت قطن أو فوطة مايكروفايبر. وده لأن الخامات دي بتمتص الميا لكن مش زي الفوطة العادية اللي بتمتص كل الرطوبة من الشعر. طريقة لف الشعر موضحة في الـgif. مدة لف الشعر بتختلف من شعر للتاني لأن ممكن شعر ياخد 10 دقايق عشان ينشف وممكن ياخد ساعات لحد ما ينشف.

 

Pineapple الأناناسة

دي طريقة للم الشعر وقت النوم عشان الكيرلز تحافظ على شكلها وبتنفع أكتر مع الشعر الطويل. بتلمي كل الشعر لفوق وتمسكيه بتوكة فبيبقى شكل الشعر شبه الأناناسة زي الصورة.

 

Scrunch out the Crunch (STOC)

بعد ما الشعر ينشف تمامًا بتكون المنتجات (زي الleave in والجل) نشفت على الشعر وعشان كده لازم نكرمش الشعر بطريقة الـscrunch عشان نكسر الطبقة الناشفة ويدي شكل طبيعي للشعر. الخطوة دي زي السكرانش اللي قلنا لك عليه بالظبط بس بيكون الشعر نشف خلاص عشان يكسر الطبقة الناشفة.

 

Refresh

لو الشعر مغسول قبلها بيوم أو اتنين وصحيتي لقيتِ شكله مش فريش كفاية، ممكن تحطي ميا وعليها بلسم في بخاخة وترشيها على الشعر. وفيه طرق تانية كتير ممكن تعرفيها في المقالة دي.

 

Praying Hands

معناها الإيدين في وضع الصلاة من غير تشبيك الصوابع. يعني تحطي البلسم الـleave in أو الجل على إيديكي وتدعكيه كويس وبعدين تمسحي على شعرك به من غير ما تشبكي الصوابع.

 

Porosity مسامية الشعر

المسامية هي قدرة وسرعة امتصاص الشعر للمياه والمنتجات. له اختبار معروف جدًا وهو إننا بناخد كام شعراية من الشعر بس يكونوا مغسولين كويس وبعد ما ينشفوا بيتحطوا فى كوبايه مياه شفافة. بنضغط بصباعنا بسيط جدًا علشان نكسر مقاومة المياه للشعر ونستنى من دقيقتين لـ4 دقايق وبعدين نشوف الشعر وصل لفين في الكوباية.

1. المسامية المنخفضة:

  • بيمتص المياه والمنتجات ببطء وبيفقدها ببطء.
  • في اختبار الكوباية الشعر ده بيطفو لفوق على وش المياه.
  • النوع ده بيحتاج أكتر من 8 ساعات علشان ينشف بشكل كامل.

علشان كده يفضل استخدام المنتجات الخفيفة للشعر زي الزيوت والكريمات الخفيفة

2. المسامية العالية:

  • بيمتص المياه والمنتجات بسرعة وبيفقدهم بسرعة.
  • في اختبار الكوباية، الشعر بينزل لتحت.
  • بيحتاج من 2 – 4 ساعات علشان ينشف بشكل كامل.

الشعر كده بيحتاج المنتجات التقيلة اللي بتغلف الشعر وتحافظ على ترطيبه زى Hair butter ويفضل استخدام المنتجات والشعر مبلول جدا علشان يحافظ على الترطيب

3. المسامية المتوسطة:

ده النوع المتوسط في امتصاصه للمياه والمنتجات.

  • في اختبار الكوباية، الشعر بيقف في نص الكوباية.
  • معدل الوقت اللي الشعر بيحتاجه علشان ينشف بشكل كامل من 4 – 8 ساعات.
  • بيتقبل أنواع مختلفة من المنتجات سواء تقيلة أو خفيفة بس طبعًا بيختلف حسب المنتج.

نحب نعرف منك في التعليقات إذا كان فيه أي مصطلحات تانية بتسمعيها عن روتين الشعر الكيرلي ومش عارفة معناها.

 

المصدر اللي ساعدنا في كتابة المقال

جروب Curly Girls Egypt

What do you think of this post ?
+1
0
+1
0
+1
0
+1
0
+1
0
+1
0
SHARE