أكلات تزيد من حليب الأم

أول أيام بعد الولادة البيبي ما بيقدرش قوي يتحكم كويس في إنه يرضع من الثدي لإنه اللبن بيكون لبن سرسوب (لبن كميته قليلة) وكمان البيبي بيبقى محتاج يمارس الرضاعة الطبيعية أكتر علشان يتعلم المهاردة دي. وعشان كدا لبن الأم ما بينزلش بغزارة أو سهولة. طبعًا في المرحلة دي بنسمع نصايح كتيرة عن مشروبات معينة و أكلات لزيادة لبن الأم. لكن للأسف كتير من المشروبات والأكلات دي بتتخن جدًا، ودا بيضغط على الأم وبيخليها تحس بضيق لإنه وزنها بيزيد، مع إنه مش ده المفروض.. المفروض تبداي تخسي بالتدريج لو إنتي بترضعي طبيعي.

في المقال ده، هنقول لك أكلات لزيادة لبن الأم من غير زيادة في وزنك.

طبعًا بننصحك بإتباع نظام غذائي متوازن وصحي عشان هي أكتر حاجة بتساعد إن وزنك يكون مستقر وصحتك كويسة واللبن عندك موجود بالنسبة الكافية لطفلك. ودلوقتي هنقول لك أهم عناصر لكِ في الرضاعة جمعناها من موقع ويب طب:

  • الخضار والفاكهة تزيد حليب الأم: حاولي تاكلي على الأقل 5 حبات متوسطة من الخضار أو الفاكهة في اليوم.
  • النشويات: ركزي على الكربوهيدرات المعقدة واللي أليافها عالية زي العيش الأسمر والبرغل والشوفان فهي تدر حليب الأم.
  • البروتين قليل الدهن: زي الفراخ والديك الرومي والبقوليات زي الفول والعدس لانها بتزود حليب الأم المرضعة.
  • الأسماك: حاولي تاكلي على الأقل مرتين في الأسبوع أسماك مع التركيز على الأنواع الغنية بأوميغا 3.
  • الألبان: على الأقل كبايتين من اللبن أو منتجاته لأنها غنية بالكالسيوم والبروتين.
  • السوائل: اشربي سوائل كتيرة من مشروبات دافية وعصاير وشوربة وطبعا أهم من كل ده، المية.

وعشان تخسي خلال الرضاعة الطبيعية من غير ما تأثري على اللبن، ممكن تعملي الخطوات دي:

  • اختاري الأطعمة اللي قيمتها الغذائية عالية لكن سعراتها الحرارية قليلة.
  • احسبي كميات الأكل اللي بتاكليها كل يوم.
  • الأكلات اللي فيها ألياف عالية زي الشوفان مثلا هتحسسك بالشبع لمدة طويلة، على عكس الكربوهيدرات البسيطة اللي بتتحرق بسرعة وبتحسسك بالجوع زي العيش الأبيض.
  • البروتين كمان (طبعا قليل الدهن) بيشبع لمدة طويلة ومش هيخليكي تفقدي وزنك من العضلات لكن من الدهون.
  • كمية البروتين اللي الدكاترة بينصحوا بيها خلال الرضاعة هي 65 جرام في اليوم أول 6 شهور و 62 جرام في اليوم من الشهر السادس للشهر الثاني عشر.
  • اشربي مية طول الوقت، مش بس عشان تدر اللبن، لكن كمان بتساعد في فقدان الوزن.
  • العبي رياضة خفيفة. اسألي الدكتور لو ولدتي ولادة قيصرية عشان يحدد معاكي نوع الرياضة المناسب ليكي ووقت ممارستها.
  • لما تقللي السعرات الحرارية، اعملي دا بالتدريج. لما تقلليهم بشكل مفاجيء، ممكن دا يقلل اللبن.

بننصحك إنك ما تعمليش دايت قاسي في فترة الرضاعة لإنها ممكن تؤثر على كمية اللبن وعلى صحتك وصحة البيبي. عشان كدا في المقال ده، حاولنا نجمع لك كل حاجة تساعدك تحافظي على جسمك واللبن من غير ما تتأثري بالسلب.

 

المصادر اللي ساعدتنا على كتابة المقال:

ويب طب 1

ويب طب 2

 

What do you think of this post ?
+1
0
+1
0
+1
0
+1
0
+1
0
+1
0