الشعر الكيرلي عادًة بيبقى محتاج عناية أكتر شوية من الشعر العادي لأنه بيبقى أكتر عرضة للتقصف والتكسر ولو فيه تشابك جامد ممكن يسبب آلام لفروة الرأس لما تيجي تسرحيه، عشان كده مهم إنك تعملي روتين مناسب لطبيعة لشعرك الكيرلي عشان تحافظي على صحته وجماله.. بس روتين الشعر ممكن ميبقاش كفاية عشان تحافظي على مظهره الحلو خصوصًا فى أيام الصيف والرطوبة الجامدة اللي بتخلي الشعر هايش ومنعكش، الترطيب بعد الروتين مهم جدًا برضو وخصوصًا لو كانت طبيعة شعرك جافة.

 

في المقال ده حبينا نقولك على شوية وصفات سريعة وسهلة جدًا تقدري تعمليها فى البيت بمكونات بسيطة  لسبراي مرطب للشعر الكيرلي تقدري تستخدميه بعد ما تخلصي الروتين بتاعك اللي متعودة عليه عشان تحافظي على ترطيب شعرك حتى لو مش هتغسليه.

 

 

الوصفة الأولى:
فى بخاخة بلاستيك أو إزاز حطي مقدار ميه ومقدار بلسم من اللي بتستخدميه كـleave in، اخلطيهم كويس أوي ورشي الشعر وحاولي دايمًا إن الشعر يشبع خصلة بخصلة وممكن تقسمي شعرك خصل وضفريه ضفاير متوسطة ورشي عليه الخليط ده ولما ينشف فكي الضفاير.

 

الوصفة التانية:
في بخاخة بلاستيك أو إزاز حطي مقدار زيت جوجوبا مع مقدار زيت جوز هند ومقدار من البلسم إللي بيتساب، رجيهم كويس أوي ورشي وإتأكدي إن الشعر شبع من الخليط.

 

الوصفة التالتة:
في بخاخة بلاستيك أو إزاز حطي مقدار ميه ومعلقة زيت زيتون ونص معلقة زبدة أو زيت شيا ومعلقة لبن جوز هند، رجيهم كويس أوي ورشيه على شعرك كويس أوي واحتفظي بالباقي فى التلاجة.

 

الوصفة الرابعة:
في بخاخة بلاستيك أو إزاز حطي مقدار ميه ومقدار زيت لوز ومقدار زيت جوز هند والبلسم المفضل ليكي بس يكون Leave in، رجي البخاخة كويس أوي وغذي الكيرلز كلها لحد الأطراف.

 

الوصفة الخامسة:
في بخاخة بلاستيك أو إزاز حطي مقدار ميه وزيت أرجان وزيت جوجوبا ورجيهم كويس أوي ورشي على شعرك من الأطراف للجذور.

 

 

ممكن تغيري أو تستبدلي الزيوت اللي إستخدمناها فى المقال ده بالزيوت المفضلة ليكي وممكن كمان تحطي شوية نقط من الزيوت العطرية عشان تخلي ريحة شعرك حلو على طول.

 

قوليلنا إنتي بترطبي شعرك الكيرلي إزاي؟

 

مصادر أخدنا منها شوية أفكار:

bigdiyideas

righttringlets

What do you think of this post ?
+1
0
+1
0
+1
0
+1
0
+1
0
+1
0
SHARE