السفر مع الولاد بيكون تجربة مختلفة تمامًا عن السفر لوحدك لأنك بتبتدي تستغني عن أماكن الرفاهية والاستجمام وبتبدأي تدوري على الأنشطة والترفيه اللي يخليهم مبسوطين من غير زهق وبما إن أجازة نص السنة قربت وبالفعل في مدارس بدأت من بدري، هنعرفك على أماكن سفر في مصر مناسبة للأطفال لو حابة تسافري أسبوع من أجازة نص السنة الطويلة.

 

الغردقة Jazz Makadi

 

 

المنتجع في مدينة مكادي في الغردقة وبيعتبر من أفضل الأماكن اللي ممكن تروحيها وولادك هيقضوا أحلى وقت وهيتبسطوا هناك مع 50 زحليقة مائية مناسبة لكل الأعمار والشاطىء الخاص اللي ممكن تستمتعوا فيه بأنشطة مختلفة هناك وتتعرفوا على جمال الطبيعة زي الغطس والغوص وكمان هتلاقي حمامات السباحة المدفية المناسبة لكل الأجواء.. لو حبيتي تقضي وقت لوحدك ممكن تسيبيهم لوحدهم تحت إشراف المكان في “Kids Club” مكان مخصص ليهم فيه أنشطة كتير وكمان فيه حمام سباحة ليهم.

 

الغردقة Steigenberger El Dau

 

 

 

من ضمن الأماكن اللطيفة جدًا اللي ممكن تسافري فيها مع الولاد، المكان فيه الأكوا ماجيك اللي هي عبارة عن مدينة ملاهي مائية رائعة ولادك هيعيشوا فيها تجربة جديدة كلها فرحة ومرح وكمان المكان بيقدملك أنشطة كتير جدًا للولاد وكيدز أريا.. مش بس كده هتلاقي على الشاطىء مكان لطيف مخصص ليهم وكمان حمام سباحة بميه دافية عشان خاطرهم لما الجو يبرد.

 

 

الغردقة Jungle Park

 

 

 

بالرغم إن الغردقة فيها فنادق ومنتجعات كتير بيبقى فيها أكوا بارك بس المكان ده مميز جدًا لكل أفراد العيلة، المكان بيضم ٣٥ زحليقة مائية و١٤ حمام سباحة من ضمنهم حمامات سباحة مدفية.. لو عندك أطفال سنهم صغير هيتبسطوا جدًا لانهم عاملين حمام سباحة صغير مخصص ليهم بزحاليق مائية صغيرة وكمان هتحسي بالأمان عشان فيه أفراد إنقاذ دايمًا متواجدين في المكان. 

شرم الشيخ Coral Seas Hotel

 

شرم الشيخ من ضمن الأماكن المفضلة لناس كتير اللي بتتميز بجوها المعتدل طول السنة وخصوصًا الشتا اللي الحو بيبقى فيه معتدل وممكن ولادك ينزلوا البحر أو البيسين غير الأنشطة الكتير اللي ممكن يعملوها في الميه زي الغوص والغطس وكمان هيتمتعوا بجمال الطبيعة تحت الميه.

سوما باي Sheraton Somabay Aqua Park

على بعد كام كيلو من الغردقة، هتستمتعي في سوما باي بمكان مميز إنتي وولادك في الأكوا بارك والرياضات المائية والخضرة الواسعة في الفندق اللي بيتميز كمان بشكله المميز على هيئة معبد الكرنك في الاقصر.

سوما باي Cascades

من الأماكن المميزة بردو في سوماباي اللي تقدروا تستمتعوا بوقتكم هناك، المكان مفيهوش أكوا بارك بس فيه أماكن مخصصة للأطفال وغرفة ألعاب ليهم عشان تقدري تستمتعي بوقتك وانتي مطمنة عشان كل الأماكن فيها إشراف وخدمة جليس الأطفال (babysitting) اللي ممكن كمان يقعدوا مع ولادك على البحر لو حابة.

الجونة Rihanna Resort Three Corners

رحلة الحونة مبتتنسيش لان الجونة مكان جميل وساحر، بالرغم من ارتفاع أسعارها شوية بس هتقضي هناك أحلى وقت مع ولادك وخصوصًا في الفندق اللي بيوفر ٣ حمامات سباحة مختلفة فيها زحاليق مائية وواحدة منهم كمان مخصصة للأطفال في السن الصغير. والأطفال الأكبر شوية هتلاقي أماكن حلوة ليهم زي “Sliders Cable Park” اللي فيها أنشطة كتير زي التزحلق على الميه وكمان “Cheeky Monkey Playground” والمركز الترفيهي في أبو تيج مارينا.

الفيوم

 

 

من أهم مميزات مدينة الفيوم إنها قريبة من القاهرة على بعد ساعتين تقريبًا بالعربية فممكن تقضي فيها يوم واحد وفيه كذا طريقة تقدري تستمتعي بيها هناك على حسب وقتك وميزانيتك.. ممكن تروحي شلالات وادي الريان أو تمارسي رياضة التزحلق على الرمال “الساندبوردينج” وتستمتعي بمنظر البحيرة، وممكن كمان تستمتعي بالمناظر الطبيعية الجميلة للكثبان الرملية في رحلة بعربيات الدفع الرباعي وتستمتعي  بعشا بدوي حوالين النار في الصحرا أو فطار مع البدو.. لو عندك وقت أو هتفضي الليلة في الفيوم ممكن تروحي قرية تونس، هناك ولادك هيستمتعوا جدًا يعمل الفخار وهيتعلموا كمان إزاي يعملوه وكمان هيستمتعوا بالمشغولات اليدوية هناك.

 

دهب

 

مدينة دهب من المناطق المحببة لكل أفراد الأسرة وهتضمني ليكي ولولادك رحلة مش هتتنسي سواء قررتي تاخدي ولادك بالعربية في رحلة بتستغرق 7 ساعات أو قررتي تركبي الطيارة. ممكن تقعدي في أوتيل مناسب للأطفال زي الميريديان أو Tirana يكون فيه حمام سباحة ومناطق ألعاب حلوة ليهم وأنشطة مختلفة زي ركوب المركب ولو سنهم كبير شوية ممكن يستمتعوا برياضة التزلج على الميه “wakesurfing” أو “Wakeboarding”. كمان ممكن تستمتعي بالطبيعية البحرية في رحلة غطس وإستكشاف للـBlue Hole أو Three pools اللي بيعتبروا من أفضل أماكن الغطس في العالم. وبليل ممكن تتفسحوا على الممشى وتتسوقي أو تستمتعوا بعشا لطيف.

 

مرسى علم

 

 

من أفضل أماكن الغطس والحياة البحرية في مصر، مرسى علم من أحلى الأماكن اللي ممكن تروحيها مع ولادك وهيقضوا أوقات مسلية هناك سواء في الغطس أو السنوركلينج أو رحلة بحرية في اليخت.

 

قرية بساطة – نويبع

 

 

 

الرحلة دي هتعلم ولادك جمال الحياة البسيطة والطبيعي اللي حواليهم، هتقضي الأيام في كوخ بسيط مع ولادك وهتستمتعوا بجمال الليل وشروق الشمس في مكان مريح ومهدىء للأعصاب وكمان آمن لولادك. قوانين المكان هتعلم ولادك الاستقلالية والاعتماد على نفسهم بس لازم تبقي عارفة إن المكان مش بيسمح بالدوشة سواء للكبار أو الصغار.

 

الأقصر وأسوان

 

 

 

مفيش مكان أحسن من الأقصر وأسوان عشان ولادنا يتعلموا حضارتنا الفرعونية، ولادك هيتبسطوا جدًا بالرحلات النيلية وركوب الجمال وزيارة المعابد وممكن كمان تستمتعوا بركوب المنطاد عشان تقدروا تشوفوا جمال المدينة من زاوية مختلفة.

 

الصحراء البيضاء

 

 

 

من التجارب اللي عمر ما ولادك هينسوها، ولادك هيستمتعوا بالطبيعة الرائعة في المحمية اللي بتبلغ مساحتها حوالي 3000 كيلو متر مربع وبتغطيها صخور ضخمة لونها أبيض زي الطباشير ووقت الشروق أو الغروب لونها بيميل للزهري أو البرتقالي واللي بيخلي شكلها جميل جدًا، الرمل كمان مغطى بحفريات كتير وهيحفز فيهم روح الإكتشاف وكمان هيستمتعوا بالساند بوردنج والتخييم وكمان السباحة في الينابيع الطبيعية.

 

بارون بالاس سهل حشيش

 

 

 

من الأماكن المناسبة جدًا للأطفال والمكان بيوفر ليهم Kids Area وحمام سباحة مدفي وكمان ممكن تستمتعوا برحلة بحرية أو الغطس أو السنوركلينج، سهل حشيش فيها كمان حديقة حيوان واكواريوم لو حابة تفسحي ولادك هناك.

What do you think of this post ?
+1
0
+1
0
+1
0
+1
0
+1
0
+1
0
SHARE