الدورة الشهرية المنتظمة بتحصل كل 28 يوم والمعدل الطبيعي لحدوثها بيكون ما بين 21-35 يوم، ساعات كتير بتحصل لخبطة وممكن تتأخر لعدة أيام وده بيسبب قلق كبير وخصوصًا للأمهات وفى المقال ده هنعرفك على أسباب تأخر الدورة الشهرية غير الحمل.

سألنا الدكتورة سحر البرادعي أستاذ النساء و التوليد عن أهم الأسباب اللي بتخلي الدورة الشهرية تتأخر بعيدًا عن الحمل، فبدأت كلامها بالتأكيد على أهمية التأكد من عدم وجود حمل لإنه ممكن ميجيش فى بالنا وجود حمل حتى باستخدام الموانع، وبعد التأكد من عدم وجود حمل نبتدي نفكر فى الأسباب الأخرى وأولها مشاكل التبويض المختلفة.

مشاكل التبويض المختلفة
من أكتر العوامل اللي بتؤثر على إنتظام الدورة هي مشاكل التبويض؛ الأمراض المزمنة زي زيادة أو ضعف نشاط الغدة الدرقية والسكر من العوامل اللي بتؤثر على الهرمونات وبتسبب ضعف التبويض العام وبالتالي ممكن يحصل تأخر فى الدورة الشهرية.

زيادة هرمون اللبن
هرمون اللبن أو الـ Prolactin هو الهرمون المسئول عن تنظيم إفراز وإدرار اللبن للمرضع ولكن إرتفاع الهرمون مش مشترط بالأم المرضع فقط لأن ممكن يحصل إرتفاع فى الهرمون لغير المتزوجات ومن ضمن أعراض زيادة هرمون اللبن هو انقطاع الدورة أو تأخرها عن موعدها الطبيعي.

تكيس المبايض
تكيس المبايض بيحصل نتيجة خلل فى الهرمونات بينتج عنه صعوبة فى إطلاق البويضة وبالتالي عدم إنتظام الدورة الشهرية هو أحد أعراض تكيسات المبيض.

التوتر والإجهاد
التعب الشديد والتوتر والصدمات العصبية ممكن تسبب خلل كبير فى الهرمونات وتسبب زيادة أو نقص فى الوزن وفى الحالتين بيحصل عدم إنتظام فى الدورة الشهرية.

نقص الوزن أو السمنة
نقص الوزن المفاجىء أو السمنة من عوامل التأثير هرمونات الجسم وبالتالي ممكن تحصل مشاكل فى التبويض وتوقفها أو تأخرها.

سن اليأس المبكر
سن اليأس عادةً بيبدأ من سن 45 وحتى 52 لكن بعض السيدات بتنقطع عنهم الدورة الشهرية فى سن مبكر ومن أشهر أعراض سن اليأس المبكر عدم انتظام الدورة الشهرية وتأخرها عن موعدها قبل سنوات من إنقطاعها.

بننصحك لو الدورة الشهرية اتأخرت إنك تعملي إختبار حمل أولاً ولو الإختبار سلبي لازم تستشيرى طبيب النساء الخاص بيكي لإجراء التحاليل والكشوفات اللازمة خصوصًا لو بتعاني من أحد الأمراض المزمنة اللي إتكلمنا عليها فى الموضوع السابق.

المصدر:
Webteb
Dailymedicalinfo
Webteb

 

SHARE

LEAVE A REPLY

Please enter your comment!
Please enter your name here