أشهر الالتهابات المهبلية وطريقة التعامل معاها

في الموضوع ده هنكلمك عن أشهر الالتهابات المهبلية وإزاي تتعاملي معاها

Laila (Aya) Sami

240
0

كلنا كستات وكأمهات عرضة للالتهابات المهبلية وفيه أكتر من نوع منها، ومش كل التهاب فيهم تقدري تتعاملي معاه بنفس الطريقة. عشان كدة،  هنكلمك في المقال ده عن أشهر الالتهابات المهبلية (أو أكترها انتشارًا) وهننصحك تتعاملي مع كل واحد فيهم إزاي. طبعًا بننصحك دايمًا بزيارة الدكتور لما تحسي بأي أعراض علشان يوصفلك الأدوية المناسبة.

 

التهاب المهبل البكتيري (Bacterial Vaginosis)

الطبيعي إن جوة المهبل فيه بكتيريا “مفيدة” وبكتيريا “ضارة”. لما التوازن بينهم بيختل، الالتهاب دا بيظهر.
أعراضه هي افرازات خفيفة بيضا أو رمادي أو خضرا، وحرقان مع التبول وريحة مش لطيفة بالأخص بعد الجماع. ووده ممكن يكون سببه التدخين، والجماع نفسه، واستخدام غسول مهبلي أكتر من اللازم.

لو لاحظتي الأعراض دي، غالبًا الدكتور هيوصف لك مضاد حيوي عشان الالتهاب يروح. وممكن يوصف لك كمان كريم معين للمنطقة الحساسة.

 

التهاب المهبل الفطري (Vaginal Yeast Infection)

الالتهاب ده عبارة عن فطريات بتنمو كتير في المهبل. وهو الأكتر انتشارًا بين الستات. ومع إنه بيبقى سخيف، لكن مش خطر وممكن علاجه ببساطة.

أعراضه هي حرقان شديد خصوصًا وقت الجماع أو التبول. وتورم واحمرار في الجزء الظاهر من العضو التناسلي ووجع داخل المهبل. كمان ممكن يبقى فيه افرازات تقيلة وبيضا ومن غير ريحة.

لو لاحظتي الأعراض دي، روحي لدكتورك وغالبًا هيوصف لك لبوس مهبلي أو كريم، ولو الالتهاب استمر مع الأدوية دي، غالبًا هيوصف لك دوا قاتل للفطريات.

 

الكلاميديا (داء المتدثرات Chlamydia)

الكلاميديا هو التهاب وكمان منقول جنسيًا.

أعراضه بتظهر بعد الإصابة بأسبوعين أو تلاتة، وبتبقى افرازات مهبلية زيادة عن الطبيعي، أو نزف مهبلي (مش الدورة الشهرية وبعيد عن ميعادها) وألم شديد في الجماع وحكة أو حرقان في المهبل، وألم في التبول.

لو لاحظتي الأعراض دي، روحي للدكتور، اللي غالبًا هيطلب تحاليل لمسحة من المهبل وتحليل بول. غالبًا العلاج بيبقى مضاد حيوي وغالبًا هينصحك إن جوزك هو كمان ياخد الدوا معاكي لأنه التهاب منقول جنسيًا.

 

خدي بالك من نفسك. ولو لاحظتي أي حاجة مش طبيعية من افرازات أو حرقان أو ريحة مش محببة، تروحي لدكتور النسا وحافظي على صحتك.

 

مصدر ساعدنا في كتابة المقال:

 

WebMD

https://www.webmd.com/women/guide/sexual-health-vaginal-infections#1

 

LEAVE A REPLY

Please enter your comment!
Please enter your name here