أفضل أوقات العلاقة الحميمة لحدوث حمل

في المقال ده هنقولك على أفضل الأوقات لممارسة العلاقة الزوجية علشان يحصل حمل

Laila (Aya) Sami

225
0

هيئة الصحة البريطانية نشرت إحصائية بتقول إن من بين كل 100 ست بتحاول تحمل فيه من 80 لـ 90 ست بينحجوا في الحمل في سنة واحدة بشكل طبيعي، ومنهم بيحتاجوا وقت أطول، وفيه بيحتاجوا تدخل مساعد.

أكتر سبب لتأخر الحمل لو الزوج والزوجة صحتهم كويسة وما عندهمش موانع هو إنهم ما بيبقوش عارفين إيه أفضل وقت  لممارسة العلاقة الحميمة. أستاذ طب النساء والتوليد في جامعة نيويورك ستيفن جولدشتاين كتب في مقال على موقع WebMD إنه كتير من الستات بتضيع فرص كبيرة في حدوث الحمل لإنهم منتظرين يوم دقيق للتبويض ودي حاجة صعب التكهن بيها.

في المقالة دي، هنكلمك عن أهم النقط اللي لازم تعرفيها لو بتخططي للحمل.

 

التبويض:

التبويض هو العملية اللي المبيض فيها بينتج بيضة جديدة. ودا عادة بيحصل في اليوم الـ13 يبدأ عدها من أول يوم الدورة الشهرية لو دورتك الشهرية منتظمة وبتحصل كل 28 يوم. لكن مش بس يوم التبويض هو أحسن يوم لأن الحيوانات المنوية تقدر تعيش جوه الجهاز التناسلي للست لمدة خمس أيام وفرصتك في الحمل هتكون أكبر لو فيه حيوانات منوية عايشة فضلت في قناة فالوب أثناء التبويض. وممكن تستخدمي واحد من تطبيقات الموبايل applications عن الدورة واللي بتحسب لك إيه الأيام الخصبة ويوم التبويض، لما تدخلي  تفاصيل معلومات عن أيام دورتك الشهرية.

 

أفضل وقتلممارسة العلاقة الحميمة لحدوث الحمل:

لو مارستي العلاقة الحميمة مع الزوج قبل يوم التبويض أو يومه هتكون إحتمالية الحمل أعلى. لو كانت دورتك الشهرية منتظمة وبتحصل كل 28 يوم، فالتبويض بيحصل اليوم الـ13 من أول يوم الدورة الشهرية. والبويضة حياتها بتبقى بس 12- 24 ساعة وعشان كدا د. شارون وينر (طبيب النساء والتوليد في مركز سيدرس سيناي الطبي في لوس أنجلوس بيقول في مقال منشور على WebMD) بينصح ببداية ممارسة العلاقة الحميمة قبل 5 أيام من التبويض وبالطريقة دي حتى لو كنتِ متلخبطة في الحساب في يوم أو اتنين، يبقى انتِ في أمان. يعني من اليوم التامن (من أول يوم الدورة الشهرية) تبدأوا تمارسوا العلاقة الحميمة عشان الحيوانات المنوية تفضل عايشة جوا جهازك التناسلي لحد التبويض فتلقح البويضة.

وفيه نصيحة تانية علشان تزودي فرصتك بإنك من اليوم التامن للدورة الشهرية تمارسي العلاقة يوم بعد يوم ولمدة كذا يوم.

وطبعًا بنفكرك إن دكتور النسا المتابع حالتك هو أكتر حد ممكن يفيدك ويرشدك عن الأيام الأحسن لممارسة العلاقة الحميمة.

 

مصادر ساعدتنا في كتابة المقال:

هيئة الصحة البريطانية
https://www.nhs.uk/conditions/pregnancy-and-baby/getting-pregnant/
ويب ميد
https://www.webmd.com/baby/features/getting-pregnant-faster#1

LEAVE A REPLY

Please enter your comment!
Please enter your name here