للأمهات: أقوى كورسات أون لاين لتعليم تربية الأطفال

في الموضوع ده بنقدملك أهم الأماكن إللي بتقدم كورسات أون لاين للأمهات عن تربية الأطفال.

Passant Ibrahim

188
0

إذا كنتِ أم مقيمة بالمنزل أو حتى عاملة، فاستثمارك الحقيقي هو إنك تتعلمي تربية الأطفال بشكل سوي نفسيًا وصح جسديًا، ووسط إعلانات الدورات التدريبية و كورسات اون لاين اللي بتقابلنا ليل نهار على السوشيال ميديا، بيكون العائق هو “مكان الكورس” أو زمان التدريب، خصوصًا لو أطفالك صغيرين، ومعندكيش رفاهية التحكم في الوقت أو إنك تسبيهم في مكان أو مع شخص موثوق فيه وتنزلي.

علشان كدة مواقع كتير بدأت كورسات أون لاين معتمدة وموثقة في مختلف المجلات للأمهات، وتدريسها أون لاين في ساعات محددة يوميًا، بعض المنصات بتسمحلك تحددي الساعات حسب وقتك يومك كمان، والأهم والأجمل إن معظمها مجانًا بدون أي مقابل مادي، واللي فيها بمقابل مادي بيكون بسيط وفي طرق كتير للدفع برضه أونلاين وانتي في مكانك في البيت.

شوفي هنا .. لكل أم: 10 تطبيقات لا غنى عنها على موبايلك

يعني كل اللي عليكي تختاري المحتوى المتاح وعايزة تدرسيه أو تتعلمي عنه أكتر، وتختاري الوقت المناسب وتلتزمي بيه، وتحضري قهوتك واللاب توب أو التابلت أو حتى الموبيل، وتبدأي تطوري من نفسك وانتي في بيتك.

النهاردة بنقدملك أشهر وأفضل المنصات الإلكترونية اللي بتقدم كورسات أون لاين وكمان ترشيحات لكورسات ممكن تاخديها تساعدك في تربية الأطفال وانتي في بيتك وطبعًا هتنعكس على شخصيتك:

 

منصة إدراك

إدراك هي منصة إلكترونية عربية، الكورسات المقدمة فيها بتكون مجانًا باللغة العربية وبتكون كورسات أون لاين، تم تأسيس إدراك بمبادرة من مؤسسة الملكة رانيا للتعليم والتنمية للمساهمة في وضع العالم العربي في المقدمة في مجال التربية والتعليم، كل ما عليكي إنك تسجلي بياناتك عن طريق الإيميل بتاعك وتقومي بإنشاء حساب على موقع إدراك وتبدأي تشوفي الكورسات المقدمة في مختلف المجلات التعليمية، وكمان هيبعتولك على الإيميل أول بأول لو في جديد.

بمجرد ما تعملي حساب شخصي هايكون ليكي الحق في التسجيل في الكورسات المختلفة، وهاتلاقي تفاصيلها مكتوبة من أول ساعات التدريس لتفاصيل المحتوى والمحاضرين كمان، في النهاية بتحصلي على شهادة إلكترونية موثقة باسمك إنك اجتازتِ الدورة التدريبية اللي اختارتيها بنجاح، وده في حالة طبعًا انك التزمتي وكملتي للأخر.

هتلاقي كمان مواد تعليمية كتير للأطفال وليكي لو حبيتي تذاكري لطفلك، وهتلاقي كورسات تساعدك لو أم عاملة.

وبنرشحلك كورس أسس التربية السليمة: https://www.edraak.org/course/course-v1:Edraak+PRTNG_2017+Q1_SP/

 

منصة المنتور.نت

منصة “المنتور.نت”، منصة للتعليم الإلكتروني ولتنمية مهارات وقدرات الإنسان في منطقة الشرق الأوسط وإفريقيا. بيتم التعليم فيها باللغتين العربي والإنجليزي عن طريق محتوى متنوع، فيديوهات وملفات شرح، كمان بيكون فيها كورسات أون لاين مختلفة من حيث المضمون والمقابل، يعني هيقابلك دورات تدريبية بمقابل مادي وحاجات تانية مجانًا.

في بداية تسجيلك على الموقع بالإيميل –زي الخطوات السابق شرحها في منصة إدراك- بيتبعتلك كود خصم 50% لأي كورس بمقابل مادي.

هتلاقي على الموقع معلومات عن المدربين وكمان تقسيمات لمحتوى الكورسات المختلفةـ ومكتبة من دورات الفيديو التدريبية الحصرية وحوارات تحفيزية وكلمات فيديو مصورة للخبراء والمتخصصين بالعربية والإنجليزية.

 

بنرشحلك الدورات التدريبية دي لتنمية أطفال:

كورس تربية الأطفال بالذكاء العاطفي بمقابل 425 ج: https://www.almentor.net/ar/course/Raising-Emotionally-Intelligent-Children

كورس الأسس السبعة لتربية الأطفال من 0-3 سنوات ب 425 ج: https://www.almentor.net/ar/course/the-7-pillars-of-raising-kids-0-3-years

كورس التعامل مع السلوك السيء للأطفال بـ170 ج: https://www.almentor.net/ar/course/dealing-with-kids-misbehavior

متنسيش كود الخصم، هتلاقي طرق الدفع مختلفة عن طريق الموقع، كمان بمجرد اشتراكك في الكورس فمعاكي حق انتفاع به مدى الحياة.

منصة رواق

منصة عربية للتعليم المفتوح، بتقدم محتوى عربي تعليمي في مختلف المجالات، المحتوى مجاني وبيقدمه خبراء ومتخصصين من مختلف دول العالم العربي. بالإضافة لتقديم شهادات موثقة بعد انتهاء الكورس تفيد بحصولك عليه.

طريقة التسجيل فيه بالإيميل سهلة وبسيطة وكذلك اختيار المحتوى.

 

كورسات بنرشحهالك على الموقع:

دورة منتسوري-التربية الحسية: https://www.rwaq.org/courses/montessori-course-2

منصة أكاديمية غِراس:

منصة عربية متخصصة في تقديم الاستشارات التربوية وكورسات التربية والمنتسوري وتعليم الآباء والأمهات، من أفضل المنصات العربية المتخصصة في المحتوى التربوي، بتقدملك كورسات أون لاين مجانية تمامًا في كل ما له علاقة بتعليم و تربية الأطفال، كمان بتديلك شهادات موثقة بإنك اتعلمتي المحتوى اللي اختارتيه وبيقدمه متخصصين سواء عن طريق الفيديوهات والتمارين التفاعليه أو ملفت الوورد المشروحه.

الموقع سهل جدًا في التسجيل والاستخدام وحرفيًا هتلاقي عليه كل حاجة تساعدك في تربية أولادك.

 

شبكة التعليم المنزلي العربي

لو كنتي من الأمهات اللي قرروا يعلموا ولادهم منزليًا فمنصة التعليم المنزلي العربي هي أفضل مكان هيفيدك بكل المعلومات اللي هتحتاجيها مجانًا.

 

قناة اليوتيوب اللي بتقدم محتوى الكورسات مجانًا: https://www.youtube.com/channel/UCfZOMyHQ1bc7qFIaQwFVR0g

 

أكاديمية عقول للأسرة والطفل:

منصة عقول هتقدملك دورات تدريبية ومحتوى كورسات أون لاين مفيد ليكي ولأطفالك كمان في مختلفة الاهتمامات اللي ممكن تقابلك وتبقي عايزة تعرفيها سواء كنتي لسة حامل أو معاكي أطفال مراهقين، كل ده مجانًا وبطريقة بسيطة وسهلة وممكن تسجلي بالإيميل أو بروفيلك على الفيسبوك.

 

بنرشحلك الكورسات دي:

كورس أول ساعة رضاعة عن الرضاعة الطبيعية: http://oqoolacademy.azurewebsites.net/COURS/getCourseInfo/30

كورس التربية الجنسية للأطفال: http://oqoolacademy.azurewebsites.net/COURS/getCourseInfo/37

 

لو ليكي تجربة سابقة مع أي من المنصات اللي ذكرناها فوق احكيلنا عليها، ولو تعرفي مكان تاني بيقدم كورسات تنموية للأمهات أونلاين، شاركينا بيه.

LEAVE A REPLY

Please enter your comment!
Please enter your name here