تغيير لون الشعر بيكون خطوة لطيفة للتغيير بس على قد ما الخطوة دي بتبان إنها سهلة وسريعة لكن فيه شوية نقط لازم تاخديها في الإعتبار ما تغيري لون شعرك.. تغيير لون صبغة شعرك هيكون خطوة دائمة مش مؤقتة عشان كده لازم تبقي متأكدة من لون صبغة الشعر اللي نفسك تعمليها عشان هيكون صعب إنك تغيري اللون تاني على طول لو معجبكيش، تاني حاجة لازم تحطيها في اعتبارك وانتي بتختاري لون صبغة الشعر هي لون بشرتك وإيه ألوان صبغة الشعر  اللي بتناسبها وفي الموضوع ده هنقولك على ألوان صبغة شعر بتناسب البشرة السمراء.

 

 

اللون الأسود
اللون الأسود من أكتر الألوان اللي بتناسب البشرة السمراء وبتبرز جمال لون البشرة بس بننصحك لو أول مرة تغيري لون شعرك للون الأسود إنك تخلي الكوافير يصبغ الشعر بالتدريج لحد ما توصلي لدرجة الصبغة اللي عيزاها عشان ميبقاش غامق أوي على البشرة.

 

 

 

 

 

 

اللون البني
اللون البني بدرجاته صديق للبشرة السمراء سواء البني الغامق بدرجة الكاكاو أو البني الكستنائي أو البني الفاتح اللي بيظهر جمال لون البشرة وخصوصًا تحت أشعة الشمس.

 

 

 

 

 

اللون الأشقر
بعض تدرجات اللون الأشقر زي الذهبي والعسلي والبلاتيني بتكون إختيار موفق لصاحبات البشرة السمراء وممكن لو مش حابة إنك تصبغي لون الشعر بأكمله بدرجة اللون الأشقر ممكن تعمليه خصلات أفتح من درجة لون شعرك البني الطبيعي عشان يكون فيه توازن بين اللونين.

 

 

 

 

 

دي كانت شوية أفكار بسيطة لألوان  صبغة شعر مناسبة للبشرة السمراء بس قبل ما تاخدي الخطوة دي هنقولك على شوية نصايح مهمة عشان شعرك  يفضل محتفظ بصحته ولونه بعد الصبغة:

  • لو أطراف شعرك متقصفة وضعيفة إهتمي بيها اولًا قبل ما تصبغيه عشان الصبغة بتضعف الشعر عشان كده ممكن تهتمي بعمل ماسكات وحمام كريم للشعر أو ممكن تطلبي من الكوافير إنه يقص ليكي الأطراف.
  • لو صبغتي شعرك بلون ومعجبكيش هيكون صعب إنك تغيريه على طول عشان كده ممكن تطلبي من الكوافير إنك تجربي الصبغة في خصلة مخفية قبل ما تغيري لون شعرك بالكامل.
  • لو هتصبغي شعرك بنفسك في البيت لازم تقري التعليمات اللي مكتوبة على العلبة كويس أوي وتستخدمي الشامبو والبلسم والكريمات المناسبة للشعر المصبوغ وإحمي رقبتك ومقدمة راسك عشان الصبغة متجيش عليها.
SHARE

LEAVE A REPLY

Please enter your comment!
Please enter your name here