إزالة الشعر بالليزر .. دليلك قبل هذه الخطوة

أهم المعلومات إللي لازم تعرفيها قبل ما تقرري تعملي إزالة شعر باللزر

Laila (Aya) Sami

138
0

إزالة الشعر حاجة بتهم ستات كتير جدًا وبتاخد وقت وجهد ووجع كتير. عشان كدة بقى فيه دلوقتي طريقة لإزالة الشعر بشكل دائم وهي إزالة الشعر بالليزر.

لو بتفكري تعملي إزالة شعر بالليزر، لازم تقرأي المقال دا عشان تعرفي ينفع معاكي إزالة الشعر بالليزر أو لا، وعشان تعرفي إزاي تستعدي للخطوة دي.

إزاي بتتم عملية إزالة الشعر بالليزر؟

إزالة الشعر بالليزر بيتم عن طريق توجيه أشعة ليزر معينة ناحية مسام الجلد وبصيلات الشعر بالتحديد. الليزر بيشتغل على تدمير البصيلة عشان الشعرة ما ترجعش تطلع تاني. أكتر نوع بشرة بينفع فيه هو البشرة الفاتحة والشعر الغامق، لأن في الحالة دي بيبقى فيه فرق بين لون البشرة ولون الشعر فيقدر الدكتور يشوف الشعرة والبصيلة أدق وأحسن. لو بشرتك فاتحة لكن شعرك كمان فاتح، احتمال كبير ما ينفعش الليزر معاكي. كمان صاحبات البشرة الداكنة بيكون أصعب من البشرة الفاتحة والسبب في الحالتين هو قرب لون الجلد من لون الشعر، الحاجة اللي بتصعب على الدكتور الشغل.

تجهيزات قبل إزالة الشعر بالليزر:

  • استشري دكتور جلدية قبل ما تبدأي وعرفيه تاريخك المرضي (لو فيه).
  • لازم تعملي حلاقة للشعر اللي انتِ هتشيليه بالليزر قبلها بيوم وساعات المركز إللي هتعملي فيه إزالة الشعر هو إللي بيعمل الخطوة دي.
  • تجنبي إزالة الشعر بالشمع أو السويت قبل ما تبدأي بست أسابيع على الأقل.
  • تجنبي إنك تعملي tan لو ناوية تبدأي إزالة شعر بالليزر لمدة ست أسابيع قبل البداية وبعد إزالة الشعر كمان.
  • خدي دش دافي قبل ما تروحي.
  • اتأكدي إنك هتروحي تعملي الليزر في مكان محترم ومعروف وليه سمعته الكويسة.
  • اسألي في كذا مكان محترم عن الأسعار لان فيه أماكن بتعمل لك Offer كويس لو هتاخدي كذا جلسة أو هتتفقي على منطقة بالكامل من جسمك.

إيه اللي تتوقعيه في جلسة إزالة الشعر؟

  • عادةً بيتطلب منك تلبسي نظارة واقية من الأشعة أثناء الجلسة.
  • الدكتور هيحط لك مادة مخدرة على الجلد قبل ما يبدأ وساعات بيتطلب منك تحطي إنتي كريم معين قبل ما تنزلي من البيت (قبل الجلسة بحوالي ساعة).
  • بعض المناطق ممكن يكون توجيه الليزر عليها موجع لكن زي وجع الطرق الأخرى أو أخف.
  • من المفضل إنك تدلكي المكان بتلجة بعد ما تخلصي.
  • عادةً مفيش نتيجة بتبان بعد أول جلسة.
  • العلاج بياخد متوسط 6 جلسات.

شوفي هنا نصائح قبل ما تشتري الكريم الواقي من الشمس

محاذير وانتِ بتعملي إزالة الشعر:

  • إزالة الشعر بالليزر للحامل: لو انتي حامل، يستحسن تأجلي خطوة إزالة الشعر بالليزر لأن الدراسات ما أثبتتش أمان الموضوع خلال الحمل بنسبة 100% .
  • ما ينفعش تعملي tan أو تتعرضي للشمس لأن دا بيؤذي البشرة بعد التعرض لليزر.

آثار جانبية محتملة

  • احمرار في البشرة.
  • بثور/حبوب.
  • ندوب.

آثار جانبية لازم تروحي للدكتور لو حصلت

  • التهابات في البشرة.
  • سخونية.
  • آثار حرق.

هل ممكن الشعر يطلع تاني بعد إزالته بالليزر؟

  • لو أخدتي عدد جلسات أقل من اللازم، الشعر هيطلع تاني.
  • أوقات بعض الدكاترة ما بيكونوش محترفين كفاية فبيطلع الشعر تاني (أخف). عشان كدا، يستحسن تسألي الأول خبرات ناس تانية قبل ما تروحي.

 

مصادر ساعدتنا في  كتابة الموضوع:

   2     

 

LEAVE A REPLY

Please enter your comment!
Please enter your name here