إزاي أساعد ابني لو بيتعرض للتنمر في المدرسة؟

في الموضوع ده هتعرفي أسباب وطرق التعامل مع التنمر المدرسي لو ابنك بيتعرض له

Rana Hany

420
0

من المشاكل اللي ولادنا ممكن يتعرضوا لها وتبقي مصدر قلق كبير وتوتر للأم هي التنمر. دايما بنبقي محتارين إزاي نساعدهم لما يتعرضوا للتنمرالمدرسي ؟ نتدخل امتى؟ ونحميهم منه إزاي؟

 

تعالي نعرف الأول إيه هو التنمر؟

التنمر هو شكل من أشكال العنف اللي بيمارسه طفل أو مجموعة من الأطفال ضد طفل تاني بطريقة متعمدة ومتكررة سواء كان العنف ده جسدي أو لفظي أو إلكتروني وده بيسيب أثر نفسي كبير جدًا على الأطفال زي إن:

  • الطفل يفقد ثقته في نفسه.
  • مستواه الدراسي يتأخر ويبقي سرحان على طول وتركيزه يقل.
  • في بعض حالات التنمر بتسبب مشاكل في الصحة النفسية زي الاكتئاب، والقلق، وفي بعض الأحوال بتوصل لانتحار أو محاولة انتحار.

الدراسات الحديثة أثبتت إن 20% من طلبة المدارس بيتعرضوا للتنمر بس للأسف 40% بس منهم اللي بيقدروا يعبروا ويطلبوا المساعدة من الكبار.

عشان تتأكدي إن ابنك بيتعرض للتنمر وتقدري تفرقي بين التنمر والمضايقات العادية اللي بتحصل بين الأطفال لازم يكون فيه الصفات دي:

  • التعمد: بمعنى إن الطفل المتنمر بيبقي مركز مع ضحيته وقاصده هو بالذات مش شيء عابر.
  • التكرار: لو المضايقات دي يومية أو بصفة مستمرة.
  • اختلال القوة: يعني المتنمر يكون أكبر حجمًا أو أكبر سنًا ومتأكد إن ضحيته أضعف منه فهيكون فريسة أسهل له.

إيه أنواع التنمر؟

  • التنمر الفظي: زي تسمية الطفل بأسماء أو ألقاب تضايقه أو السخرية من شكله أو جسمه والتحقير منه.
  • التنمر الجسدي: زي الضرب واللكم.
  • التنمر النفسي: زي تجاهل الطفل وإبعاده عن المجموعة أو التهامس عليه والنظرات بقصد استفزازه.
  • التنمر الإلكتروني: زي السخرية والتهديد عن طريق الإنترنت في وسائل التواصل الاجتماعي أو الرسايل المسيئة.

إيه العلامات اللي تعرفك إن طفلك بيتعرض للتنمر المدرسي؟

  • أي كدمات أو جروح بشكل متكرر على جسمه.
  • تغيير واضح في سلوكه زي إن تصرفاته بقت عدوانية بشكل ملحوظ أو بقى متوتر طول الوقت أو منعزل أو رافض للأكل.
  • رفضه المفاجيء إنه يروح المدرسة.
  • تنمره هو نفسه على الأضعف منه أو أخواته الأصغر.
  • تأخر مفاجيء في مستواه الدراسي وفقدان التركيز.
  • شكوي متكررة من ألم في الجسم ما يكونش لها سبب عضوي زي الصداع أو المغص.

إزاي تساعدي طفلك لو اتعرض للتنمر؟

  • أول حاجة محتاجة تشجعيه إنه يحكي لك عن طريق انتهاز أي فرصة في موقف تشوفوه أو فيلم بيحصل فيه تنمر زي فيلم Wonder بإنك تسأليه “تفتكر الطفل ده حاسس بإيه دلوقتي؟” أو “عمرك شفت حاجة زي كده في المدرسة؟” أو “في حد قبل كدا ضايقك زي الطفل دا؟”
  • اسمعيه للآخر لما يحكي لك من غير ما تقاطعيه أو تحكمي عليه وعلى اللي حصل.
  • اقبلي مشاعره وبيّني له إنك حاسة به وبغضبه من اللي حصل له واشكريه على شجاعته وقوته إنه حكى لك.
  • ما تبيّنيش قلقك مهما كانت التفاصيل مخيفة أو مقلقة بالنسبة لك، لأن الطفل بيكون خايف ومتوتر بما فيه الكفاية. لو لاحظ قلقك وما اتطمنش ليكي ممكن يبطل يحكي بعد كده أو يقول لك باقي التفاصيل.
  • ما نقولش للطفل أبدًا جمل زي “عملت لهم إيه خلاهم يضايقوك؟” “إزاي ما دافعتش عن نفسك وسيبتهم يضايقوك؟” “انت ليه ما جيتش تقول لي على طول؟” بلاش أي كلام ممكن يكون فيه لوم أو اتهام أو تأنيب للطفل.
  • اسأليه واسمعي منه كتير واتكلمي قليل عشان تقدري تفهمي كل أبعاد المشكلة.
  • احضنيه وطمنيه إنك جنبه وفي ضهره وهتقدروا تلاقوا حل مع بعض.
  • دربيه في البيت ومثلوا مع بعض المواقف اللي بيتعرض لها من المتنمر وعلميه إزاي يدافع ويرد الأذى عن نفسه. قولي له:
    1. يكون هادي وثابت لما يتعرض للتنمر، ما يخافش، ويبص للمتنمر في عينيه ويقول له “بطل اللي انت بتعمله ده”.
    2. لو الإيذاء جسدي، خليك سريع وامنعهم. لو ما قدرتش، ابعد فورًا عن المكان واطلب بسرعة مساعدة حد كبير.
    3. ساعديه إنه يعرف يبلغ مين في المدرسة وإنه يحكي اللي حصل بالظبط ويقول الأشخاص اللي ضايقوه وكان إيه رد فعله.
  • لو حسيتي إن طفلك معرض للخطر من أي نوع، اتدخلي فورا مع إدارة المدرسة.
  • وأخيرًا، لو لاحظتي إن طفلك متأثر نفسيًا بسبب مشكلة التنمر بننصحك تطلبي مساعدة من أخصائي نفسي أطفال.

 

إزاي تحمي طفلك من التعرض للتنمر؟

  • إنك تحترمي ابنك وتعلميه إن مش مقبول إهانته أو ضربه أو الاستهزاء به من أي حد (الأطفال اللي بتتعرض للإهانة في البيت بتبقي معرضة أكتر للتنمر لأنهم بيبقى سهل يتقبلوا الإهانة من أي حد يا إما بيتحولوا هم لمتنمرين).
  • قللي نقدك لابنك وشجعيه وفكريه دايمًا بنقط قوته وتميزه.
  • ساعديه يكتشف نفسه في رياضات مختلفة لأنها بتساعد جدًا في زيادة الثقة في النفس.
  • اخلقي في بيتك بيئة آمنة لابنك يحس فيها إنه محبوب ومقبول مهما حصل، وإنه يقدر يتكلم معاكي ويسأل عن أي حاجة في باله.
  • اتكلمي معاه عن التنمر من قبل ما يتعرض له. اشرحي له هو إيه وإزاي يتعامل معاه وإزاي يدافع عن غيره لو شافه بيتعرض للتنمر.
  • علميه إنه لما يبلغ الكبارعن التنمر ويقول الحقيقة ده من القوة والشجاعة.

 

المصادر

https://www.pacerteensagainstbullying.org/bullying-defined/

https://www.unicef.org/egypt/ar/bullying

https://www.unicef.org/egypt/ar/protecting-children-cyberbullying

 

 

 

 

 

 

LEAVE A REPLY

Please enter your comment!
Please enter your name here