أخطاء في التربية ممكن تخلّي طفلك مريض اكتئاب

طرق التربية الغلط إللي بتساهم في الإصابة بالاكتئاب.

رانيا شكري

353
0

أي شخص مريض إكتئاب بتبقى طريقة التربية سبب من الأسباب الرئيسية (مش الوحيد) في مرضه وللأسف إحنا كأباء وأمهات بنساهم بدون قصد في تكوين شخص مُعرض لمرض الإكتئاب..

طيب إزاي ده بيحصل؟

1-الرسايل اللي بنوصلها لأولادنا عن نفسهم وشكلهم وإللي بيصدقوها لأن دماغهم عاملة زي السفنجة اللي بتمتص كل المعلومات إللي بتجيلهم خصوصا لو من أهم ناس في حياتهم.

وخصوصا كمان لو إتكررت في مواقف مختلفة.. رسايل من نوعية:  إنت قصير.. إنتي شعرك وحش.. إنتي مش جميلة زي أختك.. الرسايل دي علشان بتوصل للولاد في سن صغير ومن أقرب الناس ليه بيبقوا مصدقينها جداً مع الوقت بتتحول للصورة اللي هما شايفين بيها نفسهم وإللي هي طبعا مشوهة بطبيعة الحال.

2– رسايل بتوصلهم عن قدراتهم. زي: إنت فاشل .. إنت عمرك ما هتنجح في حياتك .. إنتي أحسنلك تتجوزي لأنك مش هتعرفي تنجحي في حياتك .. إنت مبتعرفش تعمل حاجة ولوعملتها بتعملها غلط ..

ورغم الإعتقاد الخاطيء عند كتير من الأباء والأمهات إن ده بيبقى نوع من التحفيز لأولادهم علشان ينجحوا إلا إن الأولاد مبيتحفزوش قد ما بيصدقوا إنهم فعلا فاشلين وعاجزين عن تحقيق أي نجاح وبالتالي ومع الوقت كأنهم بيحققوا نبوءة وبيفشلوا فعلا .

طيب ابنك أو بنتك لما بيكبروا ومصدقين الكلام ده عن نفسهم إنهم ميستحقوش لأنهم شايفين نفسهم شكليًا مش مقبولين أو عاجزين إنهم يخرجوا للمجتمع وللشغل وهما شايلين فوق كتفهم أفكار عن نفسهم كفيلة إنها توقعهم عند أول تحدي بيقابلوه.. يعني الولد إللي مصدق إنه فاشل ومش ناجح في حاجة مش هيحاول أصلا يعمل حاجة وهيختار إنه يفضل زي ما هو.. أو هيحاول يجري في الدنيا طول الوقت يثبت للناس ولنفسه إنه ناجح ويفضل في صراع مستمر ومهما نجح مش هيحس بطعم النجاح ده.. ولو مرة فشل في حاجة عملها ده هيرجعه للفكرة إللي مصدقها عن نفسه وهي إنه أصلا فاشل وتبدأ أعراض الإكتئاب تظهر حتي لو اللي حصله موقف عادي بيحصل لناس كتير مننا وممكن نطلع منه عادي ونكمل ..

 

أرجوكم مترموش بذور الاكتئاب في أولادكم وتسقوها برسايلكوا المتكررة ليهم.. دماغ ولادكوا عاملة زي الريكوردر اللي بيسجل و بيصدق كل اللي بيسمعه.. خلي اللي بيسمعوه منكوا رسايل ثقة وقبول وتشجيع وحب مش مشروط بشكل أو سلوك علشان الحاجات دي بس اللي هتعينهم علي بكرة ومتخلهمش عرضه لمرض منتشر جداً في مجتمعنا زي الاكتئاب.

LEAVE A REPLY

Please enter your comment!
Please enter your name here