أ​سئلة كثيرة بتواجه الأمهات اللي عندهم بنات لما فجأة بيلاقوا البنت الصغيرة اللي بفيونكات كبرت وقرّبت تدخل عالم الأنوثة وجسمها بدأ يتغير وبتتنقل من عالم الطفولة للمراهقة.

 

وكتير من البنات اتفاجؤوا لما جات لهم الدورة الشهرية لأول مرة عشان ما كانوش يعرفوا عنها أو فاهمينها. ما كانوش متكلمين مع أمهاتهم لأن الأم محرجة تتكلم في الموضوع أو متخيلة إنه لسه بدري عليه. عشان كده لازم تكوني جاهزة ومجهزة بنتك ومتكلمة معاها قبل ما تيجي ليها الدورة الشهرية. في المقال ده، هنجاوبك على أسئلة زي كيف أخبر ابنتي عن الدورة الشهرية؟ كيف أتعامل مع بنتي في أول دورة؟ وهنكلمك عن الدورة الشهرية للبنات.

 

إمتى الوقت المناسب اللي اتكلم فيه مع بنتي؟

المتوسط الطبيعي للوقت اللي بتيجي فيه البيريود (العمر المناسب للدورة الشهرية) من سن ١٢ سنة لـ ١٦ وفيه بنات بتجي لهم قبل كده من سن تسع وعشر سنين. فيُفضّل إنك تبدأي من بدري، من أول ما تلاحظي تطور وتغيير في شكل جسمها أو لما تحسي إنها هتستوعب كلامك أو لو بدأت تسأل لما سمعت من حد من أصحابها، فده الوقت المناسب عشان تجاوبي على أسئلتها بشكل علمي وبسيط.

 

أقول لبنتي إزاي؟

  • التدرج في المعلومات: مهم إنك تكلميها تدريجي وعلى مراحل وتستغلي الفرص عشان تفتحي الموضوع معاها وتبسطيه لها. كلّميها عن تكوين جسم البنت والتغيرات اللي بتحصل له واشرحي لها بالتدريج. ما تقوليش المعلومات كلها مرة واحدة، لأن التدرج في المعلومة هيخلي تقبلها لها أسهل.
  • مهّدي بإنكم لما تشوفوا إعلان فوط صحية مثلًا، اشرحي لها وقولي لها إن الستات بيستخدموها عشان إفرازات الجسم وهي كمان قربت تكبر وهتبدأ تستخدمها.
  • المرة اللي بعدها اتكلمي معاها في فكرة البلوغ، وإن البنت لما بتكبر وتبلغ، بتجي لها الإفرازات دي كذا يوم كل شهر، وأكدي لها إن كل البنات والأمهات بتجي لهم الدورة الشهرية وساعديها إنها تفهم التغيرات اللي بتحصل لجسمها وتكون فخورة بيها.
  • كلميها عن أعراض الدورة الشهرية واحتمالات الألم اللي هتحس بيه من غير ما تخبي عليها فكرة الألم اللي بيحصل وقتها، عشان ما تتصدمش لما تجي لها وتكون جاهزة نفسيًا. ووضحي لها إيه هي المسكنات المتاحة لها تستخدمها في حالة إحساسها بوجع.
  • احكي لها عنك وانتِ صغيرة وعن أول مرة الدورة الشهرية جات لك فيها بطريقة لطيفة ومضحكة عشان تكسري حاجز القلق اللي عندها وتتطمن لما تعرف إنك عديتي بكل اللي هي بتعدي بيه.
  • اشرحي لها طرق الحفاظ على نظافة جسمها في فترة الدورة الشهرية، وإزاي تستخدم الفوط الصحية وتتخلص منها بطريقة صح.
  • لما تيجي لها الدورة الشهرية أول مرة، خديها في حضنك وباركي لها وعبري لها عن فرحتك بأنها كبرت وبقت آنسة كبيرة واحتفلوا انتِ وهي مع بعض بالمرحلة الجديدة من حياتها.
  • طمني بنتك إن ما حدش في المدرسة هيلاحظ عليها أو يعرف إن عندها الدورة الشهرية وحضّروا مع بعض شنطة صغيرة فيها فوطة صحية وunderwear نضيف معاها في شنطة المدرسة احتياطي.
  • لو بنتك خجولة وبتتكسف وترفض الكلام في كل مرة بتفتحي معاها الموضوع، اشتري لها كتاب سهل وبسيط بيشرح الدورة الشهرية أو شجعيها إنكم تقروا مع بعض على الإنترنت.
  • علميها كمان إزاي تحسب أيام الدورة الشهرية عشان تكون متوقعة هتجي لها إمتي كل شهر وإنها أوقات ممكن تتأخر كام يوم بس لازم تبلغك لو اتأخرت عنها بالأسابيع.

في النهاية ما تنسيش تؤكدي لبنتك إن الدورة الشهرية معجزة حقيقية ربنا خلقها في جسم البنات بس وبتنقلها من مرحلة إنها بنوتة صغيرة لآنسة كبيرة وإنها حاجة خاصة لكن مش حاجة عيب أو تكسف.

 

المصادر:

WebMD

Parents

SHARE

LEAVE A REPLY

Please enter your comment!
Please enter your name here