اعرفي أكتر عن اكتئاب ما بعد الولادة

في الموضوع ده هتعرفي معلومات أكتر عن اكتئاب ما بعد الولادة

Shaymaa El-Gammal

278
0

من خلال متابعتنا لموضوعاتكم على جروب راحة بالي لاحظنا إنه بعض الأمهات بيعانوا من اكتئاب ما بعد الولادة وكتير منهم مش بيكونوا عارفين ده.. فحبينا نكتب الموضوع ده علشان نساعدكم.

لحظة ولادة الطفل بصحة وبخير هي اللحظة إللي كل ست حامل بتتمناها لكن علشان الولادة تجربة فيها جهد بدني ونفسي على الست فبنلاقي عدد كبير من الأمهات بعد الولادة بيحسوا بالقلق والخوف والألم ومشاعر كتير متلخبطة.. ده طبيعي وبيحصل لرقم كبير من الستات (حوالي 70%) من اليوم الرابع للعاشر من الولادة.
لكم فيه عدد تاني من الستات (حوالي 8-12 %) بيدخل في أحاسيس أصعب والأحاسيس دي بتستمر لمدة ممكن توصل لشهور وساعات أكتر من شهور والأعراض بتزيد وده إللي بنسميه اكتئاب ما بعد الولادة.

 

طيب سريعا كدة، الأعراض دي لو زادت عن أسبوعين بعد الولادة لازم تفكري تستشيري طبيب وساعات كمان بتظهر بعد كذا شهر من الولادة مش ضروري علطول: حالة من الحزن الشديد، خمول شديد ومفيش أي طاقة جسدية للاعتناء بنفسك أو بالبيبي، عياط كتير بدون سبب، أفكار سلبية وسوداوية، عدم فرحة بالبيبي الجديد، عصبية شديدة، لخبطة شديدة في النوم والأكل، صعوبة شديدة في التركيز وإتخاذ أي قرار حتى لو بسيط، إحساس بالذنب وكراهية للذات.

في حالة خطيرة جدًا من حالات اكتئاب ما بعد الولادة اسمها Postpartum psychosis ودي حالة طارئة لازم نستشير الطبيب النفسي فيها بشكل عاجل جدًا.. وفي النوع ده من الاكتئاب الأم بتبقى عايزة تئذي نفسها أو تئذي البيبي وعلى الرغم من إنه نادر إلا إنه بيحصل وأعراضه بتتشابه مع أعراض مرض الفصام أو الذهان، يعني الأم ممكن تسمع أو تشوف حاجات مش حقيقية ومش موجودة.. فضروري لو سمعنا أي أم بتتكلم عن إنها عايزة تئذي نفسها او تئذي الطفل ناخد الموضوع بجدية ونحتوى الموقف وناخدها لطبيب نفسي فورا ونمشي على تعليماته.

 

الموضوع ده مش مكتوب علشان يخوف حد.. لكن علشان نشر الوعي بحاجة مهمة بتحصل للأمهات وعلشان نعرف ننصح بعض بشكل حقيقي في مجتمع راحة بالي..

لو مريتي بتجربة اكتئاب ما بعد الولادة احكيلنا على تجربتك وعملتي إيه علشان تخرجي منه.

 المصدر

LEAVE A REPLY

Please enter your comment!
Please enter your name here