تعرفي إنك بشوية منتجات موجودة عندك فى البيت تقدري تعملي منظفات لبيتك بأقل التكاليف وكمان صديقة للبيئة.. منتجات التنظيف على قد ما هي سريعة ومنجزة الا إنها للأسف ممكن تزود حساسية الصدر والجيوب الأنفية بسبب الريحة النفاذة وكمان ممكن تسبب إلتهابات فى إيدك لو بشرتك حساسة وإحنا فى فريق راحة بالي دورنا ليكي على أفكار ممكن تعمليها بمنتجات موجودة عندك فى البيت وكمان مناسبة للميزانية تقدري تنظفي بيها بيتك بطرق طبيعية.

 

منظف الزجاج

المكونات:
1 كوب مية + ¼ كوب كحول مركز + ½ كوب خل + بخاخة.

هتخلطي كل المكونات دي على بعض وتحطيها فى بخاخة نظيفة وتستخدميه على الزجاج وتمسحي بطريقتك المعتادة.

 

منظف طبيعي متعدد الأغراض من البرتقال والقرفة

المكونات:
قشر برتقال + 2 أو 3 عود قرفة + خل + بخاخة

ايه رأيك تعيدي إستخدام قشر البرتقال بدل ما ترميه؟ مش بس الخليط ده ريحته حلوة ده كمان منظف طبيعي صديق للبيئة.. هتحطي قشر البرتقال مع عيدان القرفة فى البخاخة وتزودي عليهم الخل وتقفلي البخاخة لمدة مش أقل من يومين. ممكن ترشيه على البوتجاز أو السيراميك وتمسحي بس قبل ما ترشي على البوتجاز بننصحك تحطي شوية بيكينج صودا وترشي الخليط ده وتسيبيه دقيقتين بعدين تدعكي الأسطح إللي عايزة تنضفيها.

 

منظف للتلاجة

المكونات:
1 كوب خل مركز + 2 كوب مية دافئة + 10 نقط من زيت الليمون + بخاخة.

لو بتحبي إنك تستخدمي مكونات طبيعية لنظافة تلاجتك الخل يعتبر معقم طبيعي وآمن عشان الأطعمة اللي موجودة بيها، هتخلطي كل المكونات السابقة دي مع بعض وتقلبيهم كويس أوى وتحطيهم فى بخاخة وترشي على تلاجتك بعدين تمسحي بطريقتك المعتادة.

 

منظف للغسالة

المكونات:
1 ل 2 كوب من الخل المركز + ½ كوب بيكينج صودا

من فترة للتانية لازم تعملي دورة خل للغسالة بتاعتك عشان تحافظي عليها من الترسبات والشوائب، هتحطي البيكينج صودا فى درج الغسالة والخل فى الغسالة من جوة أو لو معندكيش بيكينج صودا ممكن تحطي الخل عادي فى درج الغسالة وهتشغلي غسالتك على دورة بحرارة عالية.

 

ملمع الليمون

المكونات:
نصف ليمونة + بيكينج صودا

هتجيبي نص الليمونة وترشي عليه بيكينج صودا وتدعكي بيه الحنفيات والحوض وتشطفيه كويس بالمية، هيخلي مظهره لامع.

 

تنظيف الميكرويف

المكونات:
عصير ليمون + كوب مية + 1 أو 2 معلقة صغيرة بيكينج صودا

هتحطي المكونات دي كلها فى طبق ينفع يدخل الميكرويف وممكن كمان تحطي قشر الليمون وتشغلي الميكرويف حوالي دقيقتين وبعدين تمسحيه.

 

شوية نصايح:

  • طبعا لاحظتي إن البيكينج صودا والخل مكونات أساسية فى معظم المنظفات اللي إتكلمنا عنها فممكن لو حابة حل سريع للتنظيف ممكن تحطي البيكينج صودا فى الأماكن المتسخة وعليها خل هيعمل زي فوران هتسيبيه دقيقة وبعدين تدعكي.
  • لو هتعملي المنظف الطبيعي متعدد الأغراض وملقتيش برتقال ممكن تستبدليه بأى فاكهة حمضية زي الليمون والجريب فروت وممكن تستبدلي القرفة بعيدان روز ماري أو لافندر طبيعي أو أوراق النعناع.
  • ممكن تخففي صابون الأطباق بالخل المركز عشان تقلل من تركيز الصابون والمواد الضارة اللي فيه.
  • ممكن ترجعي للخط الساخن أو كتيب التعليمات الخاص بجهازك عشان تعرفي ايه أنسب دورة خل لغسالتك و ايه أفضل طريقة لتنظيف الميكرويف.
  • بعض الأسطح ممكن ميكونش الحمضيات مناسبة ليها عشان كده لازم تاخدي بالك من إستخدام الليمون أو البرتقال على الأسطح دي.

بتستخدمي المنظفات الطبيعية في البيت ولا لأ؟

 

SHARE

LEAVE A REPLY

Please enter your comment!
Please enter your name here