الاكتئاب
مرض نفسي ممكن يوصل إنه يهدد حياتنا. وعشان كدا بننصح كل الناس دايمًا تاخد بالها من نفسها. ولو أعراض الاكتئاب زادت أو كانت أكبر من الاحتمال،
ما فيش أي عيب إنك تطلبي مساعدة طبية لعلاج الاكتئاب عن طريق دكتور أو أخصائي نفساني يساعدك سواء بالعلاج السلوكي أو الأدوية.

المقال دا بهيساعدك على علاج الاكتئاب بالتأمل Meditation–  ودي حاجة مش بديلة للعلاج–  وده ممكن يساعدك على علاج الاكتئاب في المنزل وتقليل القلق. زي ما قالت سكاي نيوز عربية إنه في تحليل نشرته “جورنال أوف ذي أميركان ميديكال أسوسييشن” (جاما) لحوالي 50 تجربة سريرية أن 30 دقيقة تقريبا من التأمل يوميا تساهم في تخفيف أعراض القلق والاكتئاب.”

ما هو التأمل؟
التأمل هو ممارسة متبعة من مئات السنين في مناطق مختلفة من العالم. بيقوم على فكرة التركيز على اللحظة الحالية بكل الحواس عشان يبعد أحاسيس زي القلق من المستقبل أو الحزن بسبب الماضي وإعادة التفكير والتفكير الزائد. فيه دراسات زي اللي نشرتها سكاي نيوز عربي بتقول إن 30 دقيقة يوميًا بتفيد في تخفيف أعراض القلق والاكتئاب. الدراسة بتقول إن أعراض الاكتئاب اتحسنت بنسب من 10- 20 % عند الناس اللي مارست التأمل 30 دقيقة يوميًا، وبتقول إن دا معدل شبه معدل تأثير مضادات الاكتئاب.

أنواع التأمل:
فيه أنواع كتير للتأمل، وهنستعرض هنا أكتر 5 لقيناهم مناسبين لظروف الأم المصرية:

  • الوعي بالتنفس:
    دا أسهل وأبسط نوع تأمل وهو كمان مكون رئيسي في كل الأنواع التانية. هو ببساطة إنك توجهي كل تفكيرك وتركيزك لنفسك: شهيق، زفير . ممكن تستخدمي العد وإنتِ بتعملي دا. اتنفسي على 4 عدات وطلعي النفس على 6 عدات. ممكن تتنفسي على حسب ما تقدري. أهم حاجة هي إنك لما تلاقي فكرة ظهرت في عقلك أو ابتدت تشغلك، ترجعي تفكيرك فورًا على التنفس. ميزة من ميزات النوع دا من التأمل إنك تقدري تعمليه في أي وقت وفي أي مكان وفي أي وضع (واقفة أو قاعدة أو مستلقية)، مغمضة أو مفتحة.
    هنا ممكن تعرفي هل ممكن الأطفال يجيلهم مرض الاكتئاب زي الكبار؟

  • التأمل الواعي Mindfulness: دا النوع الأساسي اللي كل الأنواع بتاخد منه. التأمل دا بيقوم على الوعي باللحظة الحالية وبيستخدم التنفس زي اللي فوق بس الفرق إنه ممكن تعميمه على كل حاجة. يعني إيه؟ يعني طول ما انتِ بتعملي حاجة معينة، يبقى تركيزك كله عليها وفي نفس الوقت تكوني واعية بإنك بتتنفسي كويس. دا بيخلي التفكير في الأفكار السلبية عمومًا مش متاح خالص، لأنك طول الوقت بتفكري في الحاجة اللي إنت بتعمليها.
  • مسح الجسم: التقنية دي تشبه الوعي بالتنفس في إنك تقدري تعمليها في أي وضع. الفكرة في مسح الجسم هي التنفس وانتي بتحسي بجزء جزء من جسمك. مع الوقت ابتدي تتخيلي إن نفسك بيروح لأجزاء جسمك وابتدي حسي إن العضلات المشدودة بتهدا والألم بيروح. النوع دا من التأمل بيقلل القلق جدًا.
  • النشاطات المكررة: عمرك حسيتي إن غسيل الصحون أو تنضيف السجاد بيخليكي تحسي إنك أهدا؟ دا لأن أي نشاط بيكرر نفس الحركة بنفس الطريقة أكتر من مرة بيحفز الاسترخاء، أهم حاجة هنا هي التركيز. لازم يكون تركيزك على اللحظة الحالية وتكوني بتتنفسي كويس وتركيزك على التنفس، وإلا هيبقى غسيل الصحون زي العادي نشاط مرهق وممل ولا ينتهي.
  • حب الخير: النوع دا من التأمل غير اللي فاتوا كلهم. هو مش بيستخدم وقت معين أو شكل جلسات. هو بس بيركز على خلق جو من الحب والخير لنفسك ولبقية الناس. دا بيساعد على إنك تقللي نقدك وجلدك لذاتك وتتبسطي بحاجات حوالكي وبراكي ممكن تكون إيجابية وانتِ في العادة مش بتاخدي بالك منها.
    اعرفي ايضا هنا اضطراب و اكتئاب ما بعد الولادة

الاكتئاب مرض مش سهل، لكن تقدري تعالجيه. روحي لمختص وجربي التأمل وقولي لنا إزاي عمل فرق معاكي.

LEAVE A REPLY

Please enter your comment!
Please enter your name here