إزاي أحمي ابني من التحرش الجنسي في المدرسة؟

في الموضوع ده هتعرفي إزاي تحمي ابنك من التحرش الجنسي وإزاي تعرفي لو بيتعرض ليه.

Rana Hany

191
0
التحرش الجنسي في المدرسة

معظمنا بقى عنده هاجس من التحرش الجنسي في المدرسة؛ بقينا خايفين طول الوقت على ولادنا من اللي بنسمعه عن تحرش جنسي بأطفال صغيرة.

وبناءً علي كلام موقع مصر العربية: المركز القومي للبحوث الاجتماعية والجنائية المصري أكد إن 62.6% من ضحايا التحرش والاعتداء الجنسي في مصر لا يتجاوز عمرهم الـ 20 سنة ونصهم من الأطفال أقل من سن 15.

اعرفي هنا .. إمتى يبدأ سن المراهقة؟

عشان كدا لازم نبقى مستعدين ومجهزين ولادنا للدفاع عن نفسهم في حالة تعرضهم لمحاولة تحرش لأن السلاح الوحيد المضمون في إيدينا هو توعية ولادنا لأننا مش هنقدر نحميهم طول الوقت واحنا بعيد عنهم.

في المقال ده، هنقول لك على طرق لحماية طفلك من التحرش الجنسي في المدرسة عن طريق التربية الجنسية السليمة.

علامات تنبهني إن طفلي (أقل من 12 سنة) ممكن يكون بيتعرض لإساءة جنسية:

  • إظهار خوفه ونفوره من شخص معين.
  • إظهار انزعاج وعدم راحة وقت تغير ملابسه الداخلية.
  • تغير في السلوك والمزاج بشكل واضح مع ميل للعدوانية.
  • تقرحات في المناطق التناسلية.
  • لو طفلك تخلص من الحفاض من فترة وبقى متحكم تمامًا في نفسه وفجأة بقى ما يقدرش يتحكم وبقى عنده تبول لا إرادي.
  • ممارسة العادة السرية بطريقة متكررة.
  • أحلام مزعجة وكوابيس.
  • تراجع مستوي الطفل الدراسي ورغبته في الوحدة وظهور بعض الملامح الجنسية في رسوماته.

بعض العلامات تنبهني لتعرض إبني الإساءة الجنسية (في سن 12 سنة فيما فوق):

  • تغيّر واضح في السلوك والهوايات.
  • نوبات غضب وهيجان.
  • الصداع والقيء.
  • الكوابيس ونوع من التقوقع مع نفسه.
  • الخروج لوقت طويل من البيت والاكتئاب.

كل دي علامات لو لاحظتيها على ابنك أو بنتك لازم تدوري عن السبب وتساعديهم يقولوا. وأخيرًا، بننصح كل أم إنها تثق في إحساسها. لو شكيتي أو لاحظتي أي تغيير غير مريح في ابنك لازم تتدخلي فورًا لمساعدته.

إزاي أحمي ابني وأساعده يحمي نفسه ضد التحرش الجنسي في المدرسة أو اي مكان؟

  • أول حاجة لازم تعرفيها أن المتحرش مش لازم يكون دايما شخص غريب عن الطفل، دا أوقات كتير بيكون شخص الطفل يعرفه ومتعود يشوفه. فلازم تصدقي طفلك لو قال لك إن فيه حد بيتحرش بيه وما تثقيش في حد ثقة عمياء.
  • علمي الطفل أن أي حد بيتعامل معاه بينطبق عليه القانون دا: “ما تسمحش لحد يلمسك بطريقة مش عاجباك”؛ وما تجبريهوش يسلّم أو يبوس حد هو مش عاوز يبوسه عشان يتعلم إن جسمه حقه هو وبس.
  • علمي ابنك أو بنتك أن يكون له خصوصية زي إنه ما يغيرش لبسه أبدًا قصاد حد ويقفل باب الحمام عليه دايمًا حتى وانتم لوحدكم في البيت.
  • ابدأي التعليم الجنسي لطفلك من أول ما يبدأ يفهم، زي معلومات عن أجزاء جسمه وأساميها المتعارف عليها وإيه الأجزاء اللي تقدر تبان قصاد الناس وإيه لا وإيه الحركات واللمسات المسموح بها من الناس وإيه اللي مش مقبولة نهائي.
  • شجعي أطفالك على الكلام واتناقشي معاهم وجاوبي على كل أسئلتهم المحرجة بطريقة مناسبة لسنهم.
  • حافظي على علاقة صداقة قوية بينك وبين ولادك وشبّعيهم بإحساس الثقة لدرجة إنه يتطمن دايمًا إنك انتِ وباباه في ضهره ومصدقينه وواثقين فيه عشان يلجأ لكم من غير تردد.
  • لو ابنك بيحتك بناس غربا بشكل يومي سواء في المدرسة، أو النادي، أو الشارع، اتكلمي معاه إزاي يتعلم يدافع عن نفسه. لو حد حاول يتحرش بيه أو يلمسه بطريقة مش مريحة، أبسط حاجة أنه يصرخ بصوت عالي و يجري بسرعة ويطلب المساعدة من حد كبير يثق فيه.
  • لو ابنك محتاج قوة بدنية ممكن تبدأي تعلميه رياضة زي الكارتيه أو ألعاب القوى عشان يقدر يدافع عن نفسه بحركات بسيطة أو يكون عنده مرونة وسرعة ينقذوه من الموقف.
  • لو طفلك حكى لك عن موقف تحرش اتعرض له، استقبلي ده بهدوء شديد وصدقيه وما توجهيش له أي لوم أو توبيخ؛ ادعميه و طمنيه إنك هتساعديه. واعملي كل اﻹجراءات اللازمة ضد المتحرش مهما كانت صلته بعيلتك.

وأخيرًا أفتكري دايمًا إن علاقتك القوية بولادك وبناء علاقة صداقة حقيقية معاهم هي أكتر حاجة ممكن تحميهم وتقويهم.

المصادر:

1
2
3
4

LEAVE A REPLY

Please enter your comment!
Please enter your name here