الطريقة الصحيحة للمذاكرة: إزاي تذاكري لابنك كثير الحركة

هنقولك على شوية حيل ذكية علشان تعرفي تذاكري لابنك كثير الحركة

Rana Hany

128
0
الطريقة الصحيحة للمذاكرة لطفلك كثير الحركة

“بنتي طول الوقت بتتحرك، مش بتستحمل تقعد تذاكر خمس دقايق”، “ابني مغلبني، حركته كتير جدًا ومرحلة الواجب مأساة بيننا”.

الشكوى دي تقريبًا بقت شكوى العصر عند معظم الأمهات ” ايه هي الطريقة الصحيحة للمذاكرة طيب؟ ” .. خناقة الواجب المدرسي وصراع المذاكرة اليومي. والصراع دا بيزيد مع الطفل كثير الحركة اللي رافض يقعد يذاكر ومش قادر يركز مع كمية المعلومات والمهام اللي مطلوب منه ينفذها.

سبع طرق لكسر العادات العصبية عند الاطفال

في الموضوع دا هاقول لك على خطوات بسيطة للطريقة الصحيحة للمذاكرة خاصة مع طفلك كثير الحركة:

  • أول حاجة في الطريقة الصحية للمذاكرة هي الكلمة السحرية “الروتين”. إنك تقعدي مع طفلك وتعملوا روتين أسبوعي مع بعض باختياره ويكون هو مسؤول عنه يقسم اليوم لما يرجع من المدرسة ويختار هيبدأ بإيه، نرسم جدول الروتين مع الطفل أو نكتبه ونعلقه. الروتين بيخلّي الطفل عارف ومتوقع الخطوة الجاية في يومه ودا بيقلل الصراع اليومي.
  • خلّي طفلك يقسم الواجب أجزاء على حسب المواد أو المادة الواحدة. تقسيمه لأجزاء هيساعده لأن الطفل الحركي مش بيقدر يقعد يعمل حاجة واحدة لمدة طويلة.
  • كل ما يخلص جزء سيبيه ياخد راحة خمس دقايق، يلعب فيهم، يتنطط شوية، يجري، ينط الحبل، أي حاجة يطلع فيها طاقته.
  • من الحاجات المفيدة للطفل الحركي في السن الصغير استخدام ال flash cards للحاجات اللي محتاج يحفظها. وزعيها في أماكن في البيت هو موجود فيها باستمرار بحيث تفضل تتكرر قصاد عينه فيقدر يحفظها أسرع.
  • لو محتاجة تساعديه يحفظ، سيبيه يتحرك وهو بيذاكر واسمحي له يمسك حاجة في إيده زي الصلصال أو كورة أو أي لعبة صغيرة. على عكس ما احنا بنتوقع إن اللعب دا هتشتت تركيزهم، لكن الحقيقة أنها بتساعد الطفل الحركي أكتر على الحفظ وإيده مشغولة.
  • ما تجبريهوش يسمّع اللي ذاكره على طول. الأطفال الحركية غالبًا بترفض التسميع، اطلبي منه مرة واحدة بس. لو ما وافقش، ممكن وقتها تتأكدي أنه حفظ بأنك تعملي مسابقة بينك وبينه، تهزري معاه، تزغزغيه، وفي النص تسأليه عن حاجة ذاكرتوها.
  • حاولي على قد ما تقدري تجيبي دايمًا أدوات ملموسة تساعده في المذاكرة زي كرة أرضية أو خريطة كبيرة أو مجسم حيوانات.
  • اوعي تهينيه أو تضربيه لأن ده هييجي بنتيجة عكسية تمامًا وهيكره المذاكرة وهيعند. دا غير إنه هيدمّر علاقتكم ويدمر احترام الطفل وثقته بنفسه.
  • حافظي على التواصل الجسدي بينكم وشبعيه أحضان وبوس طول الوقت.
  • ساعديه يزود تركيزه بالأكل المفيد زي الأسماك والسناكس الصحي زي المكسرات (عين الجمل والسوداني) والفاكهة والورقيات الخضرا (الجرجير والخس).

    إزاي أساعد ابني لو بيتعرض للتنمر في المدرسة؟

وأخيرًا افتكري دايمًا أن الطفل الحركي من أهم صفاته أنه طفل حنون وذكي وبيحب الحركة الكتير والتنطيط ودا مش عيب فيه. اقبليه زي ما هو، وخلّي أوامرك معاه دايمًا بنبرة هادية وجمل قصيرة وكلمات محددة وشجعيه كتير وفكّريه بنقط قوته وتميزه.

….

LEAVE A REPLY

Please enter your comment!
Please enter your name here