المينيماليزم Minimalism أو “التقليلية” أو “العيش ببساطة” أو “ترشيد الاستهلاك” تعريفها ببساطة هي مدرسة فكرية بتدعو إننا نتخلص من الكراكيب اللي مش محتاجينها أول بأول ونقاوم الإستهلاكية والتكديس والكراكيب. طبعًا، من بيت لبيت ومن أسرة لأسرة الأولويات بتختلف. في الموضوع دا، هنحاول نقول لك على أبسط قواعد المينيماليزم المشتركة اللي تقدري تطبقيها في حياتك كأم.

 

المينيماليزم أو التقليلية أو الحياة ببساطة هو إنك تعيشي في حياتك بأقل الحاجات الضرورية عشان تقللي المخلفات وتقللي القلق والتوتر والقرارات اللي محتاجة تاخديها كل يوم. كمان بيساعدك تركزي في الحاجات القيمة اللي في حياتك فعلًا زي أسرتك وعلاقاتك الإنسانية أكتر ما تاخدي سعادتك كلها من الحاجات اللي بتملكيها واللي هي زائلة وسعادتك منها ما بتستمرش.

التأمل علاجك البديل للتخلص من الاكتئاب

طرق تقدري تقللي بيها الكراكيب:

  • طريقة كونماري: طريقة اخترعتها ماري كوندو (مؤلفة واحد من أهم الكتب في التقليلية). الطريقة بتقوم على إنك تجمعي كل حاجة من اللي في البيت في مجموعات. البلوزات، البنطلونات، اللعب، اللوحات، كل حاجة تشبه بعضها، حطيها في كومة كبيرة وبعدين ابتدي المسي كل واحدة لوحدها وامسكيها (والبسيها لو هي حاجة تتلبس)، واسألي نفسك هل الحاجة دي بتسعدك ولا لا. لو لقيتي إنها ما بتسعدكيش يبقى هتتخلصي منها.

 

  • طريقة لعبة المينيماليزم: طريقة اخترعوها ريان نيكديموس وجوشوا ميلبورن القائمين على موقع com. الطريقة قايمة على لعبة التخلص من حاجة واحدة في اليوم الأول وحاجتين في اليوم التاني وتلات حاجات في اليوم التالت وهكذا لمدة شهر. في آخر الشهر هتكوني اتخلصتي مما يقرب من 500 حاجة.

 

  • طريقة الصناديق الأربعة: هتجيبي أربع كراتين وتسميهم: للاستعمال – للتبرع – للتخلص (أو إعادة التدوير) – علامة استفهام (للي انتِ مش هتقدري تقرري لهم أول ما تشوفيهم). حطي أي حاجة في البيت في واحد من الأربع صناديق دول. بس خدي بالك إنك ما تحطيش كل حاجة في صندوق علامة الاستفهام عشان هتبقي ما استفدتيش قوي.

 

  • طريقة “واحدة”: دي أبسط طريقة فيهم. هتتخلصي من حاجة واحدة كل يوم لمدة شهر أو اتنين.

 

  • طريقة “العزال”: ودي طريقة تانية بيرجحوها ريان وجوشوا. وتعتبر الأصعب منهم وخاصة للأمهات. بتقوم على إنك تجمعي كل الحاجة في البيت كأنك هتعزلي ومع الوقت هتلاقي نفسك بتفتحي الحاجات اللي انتِ محتاجاها بس وبتستخدميها. لو فيه حاجات فضلتي ما تستخدميهاش لمدة شهرين يبقى اتبرعي بها أو اتخلصي منها.

 

في 2017، بدأت ياسمين مدكور مجموعة (جروب) على فيسبوك بهدف نشر الوعي ومشاركة التجارب في الحياة البسيطة باللغة العربية. الجروب اسمه Arabic Minimalism  – بالعربي بساطة. وفيه هتقدري تشوفي مجتمع من الناس اللي كلهم بيحاولوا يقللوا من ممتلكاتهم ويقللوا من استهلاكهم عشان يقدروا يخلقوا طاقة إيجابية في بيوتهم. كمان هتلاقي نصايح وهتلاقي دعم.

 

كتب ممكن تقريها عن المينيماليزم Minimalism:

  • عبودية الكراكيب، للكاتبة كارين كينجستون. ترجمته للعربية مروة هاشم.
  • سحر الترتيب، للكاتبة ماري كوندو. ترجمته الدار العربية للعلوم ناشرون.
  • Goodbye, things للكاتب فوميو ساساكي.

 

نتمنى لك حياة هادية وبيت مليان سلام نفسي. لو حابة شاركينا في التعليقات بتجربتك في المينيماليزم.

 

مصادر ساعدتنا في المقال:

جروب بالعربي بساطة

https://www.facebook.com/groups/egyptianminimalists/about/

فيديو أشهر طرق التخلص من الكراكيب

https://www.youtube.com/watch?v=aeK8Y2W-z6M

موقع ريان نيكديموس وجوشوا ميلبورن

https://www.theminimalists.com/

LEAVE A REPLY

Please enter your comment!
Please enter your name here