دليلك السريع للتخلص من قمل الشعر للأطفال نهائيًا

في الموضوع ده هتعرفي معلومات كتير عن قمل الشعر للأطفال وإزاي تتخلصي منه.

Shaymaa El-Gammal

360
0

النهاردة عايزيين نتكلم عن حاجة بتزعج كل الأمهات.. قمل الشعر.. عدوى ممكن تتنقل لأي طفل مهما كان سنه أو مستواه الإجتماعي ومهما كانت الأم مهتمة بنضافة أولادها الشخصية.. اخترنا نكلمكم عن الموضوع ده بمناسبة موسم دخول المدارس.

القمل مش بيطير لكن بيزحف من طفل للتاني وبيلزق في الهدوم والمخدات والدباديب والفرش عمومًا. القمل بيتغذى على الدم من فروة الراس وممكن يعيش لحد 48 ساعة برة جسم الإنسان على المفروشات أو الملابس.

مبدئيًا لازم نتعرف على القملة الرخمة.. لونها عادة بيكون رمادي فاتح او غامق وحجمها زي حبة السمسم والبيض بتاعها بيكون أبيض أو رمادي فاتح او غامق واسمه “الصبان”. البيض بتاع القمل بيكون موجود في بداية منبت الشعرة جنب فروة الراس علطول على بعد ملميترات من بداية الشعرة وبيكون لازق وبيطلع بصعوبة شديدة.

 

إيه علامات إصابة طفلي بالقمل؟

لو بتكشفي على طفلك بشكل دوري كل أسبوع أو اتنين، هتقدري تشوفي البيض على الشعر بالعين المجردة.
هتلاحظي إنه الطفل بيهرش أكتر في فروة راسه ودي من أشهر العلامات.
ممكن تلاحظي وجود التهابات او جروح في فروة الراس.

 

3 خطوات للتخلص من القمل

الخطوة الأولى: التسريح اليومي بالمشط المخصوص

في البداية هتشتري عدة الشغل.. مشط أسنانه رفيعه مخصوص للموضوع ده وده بيتباع في الصيدلية ومنتج مخصوص لعلاج القمل ودلوقتي بقى فيه منتجات طبيعية وآمنة.

هتستخدمي المنتج وهتحطيه على فروة الراس زي ما مكتوب التعليمات على العلبة وخلي بالك إنه ما يجيش في عين الطفل.. ممكن تلبسي الطفل Hair cap علشان ما يهرشش في شعره وبعدين يحط ايده في عينه.

بعد ما تسيبي المستحضر وقت كافي، ممكن تستخدمي بلسم للشعر علشان يسهل عملية التسريح بالمشط المخصوص من غير ما الطفل يتألم.. حطي بلسم كتير وياريت يكون لونه أبيض علشان تعرفي تشوفي الحشرة كل مرة.. وبعد كدة سرحي الشعر بدءأ من فروة الراس ولحد تحت بحركة سريعة وقوية وبزاوية ميل 45 درجة وممكن تعملي كدة على الحوض أو وإنتي فارشة فوطة فاتحة كبيرة ونضيفة ومقعدة الطفل عليها ( خلي بالك علشان المشط ما يجرحش فروة الراس). بعد ما تخلصي لازم تغلي المشط أو تستخدمي مطهر قوي عليه وتسيبيه في الهوا وياريت يكون فيه مشطين وتعقميهم وتبدلي فيهم علشان تتأكدي إنه مفيش قمل صغير مستخبي وعايش جوة المشط (ممكن يعيش 48 ساعة برة الجسم منهم 6 ساعات في المية عادي).

الموضوع ده هتكرريه كل يوم لمدة خمس أيام متواصلة. ( بالنسبة للدوا مش لازم تستخدميه كل يوم في عملية التسريح دي.. هتستخدمي الدوا حسب التعليمات المكتوبة عليه).

 

الخطوة التانية : عملية التعقيم ومنع انتقال العدوى
. لازم تعملي Check على كل أفراد البيت بما فيهم إنتي علشان غالبًا البيت كله بيلقط العدوى. ولو طفلك بيروح مكان ثابت زي حضانة أو Summer Camp اطلبي منهم يفحصوا كل الأطفال علشان لما طفلك يخف ما يتعديش تاني.
زي ما قلنا الأمشاط والفرش كلها لازم تتغلي أو تتعقم، أكياس المخدات تتغير يوميًا، السراير والفرش كله يتنفض، السجاد والكنب يتنضف بالمكنسة ويتنفض والدباديب كمان تتغسل وياريت نأجل اللعب بيها شوية لحد ما الطفل يخف لإنها بتنقل العدوى تاني بسرعة.

 

الخطوة التالتة: المتابعة والفحص المستمر
بعد مالطفل يخف، أمهات كتير بتفتكر إنه الموضوع خلص فبتهمل خطوة الفحص المستمر والمتابعة، رغم إنه دي أهم خطوة.
كل أسبوع هتعملي فحص وهتكرري التمشيط بالبلسم بالمشط الرفيع وهتحطي الدوا كوقاية (وياريت يكون من مكونات طبيعية) لحد ما تتطمني. وطول ما طفلك بيحتك بأطفال كتير لازم تعملي الفحص الأسبوعي ده.

 

في النهاية عايزين نعرف منكم تجربتكم مع الموضوع ده وإيه الـreviews بتاعتكم على منتجات علاج القمل للأطفال.. بترشحوا إيه؟

 

LEAVE A REPLY

Please enter your comment!
Please enter your name here