ساعات كتير بنبقى عايزين نعمل دايت ومعندناش وقت نروح لدكتور تغذية ومش عارفين نبدأ إزاي، إحنا هنعرفك على نوع من الأنواع المشهورة للدايت اللي ممكن تساعدك إنك تنظمي سعراتك الحرارية وتخسري الوزن الزائد وهو ريجيم الصيام المتقطع Intermittent fasting.

 

إيه هو الصيام المتقطع؟

نظام الصيام المتقطع ليه كذا نوع بس أشهرهم صيام 16 ساعة وتحديد عدد ساعات اللي بتاكلي فيها ل 8 ساعات؛ على سبيل المثال هتكون آخر وجبة ليكي الساعة 8 بليل، وأول وجبة في اليوم إللي هي الفطار هتكون الساعة 12 ظهرا ومسموح ليكي فى ساعات الصيام إنك تشربي مية ومشروبات مفيهاش سعرات حرارية زي القهوة البلاك والشاي والمشروبات العشبية بدون سكر أو لبن وغير مسموح بالأكل نهائي فى فترات الصيام ولا بأي مشروبات فيها سكر أو عصاير. وبالطريقة دي هتقيدي إستهلاك سعراتك الحرارية وهتساعدك على حرق الدهون.. في عدد ساعات الفطار هتقسمي وجباتك المعتادة على الـ8 ساعات بس تراعي عدد السعرات الحرارية المسموحة ليكي وتاكلي أكل صحي لإنك لو أكلتي أكتر من السعرات الحرارية المسموحة ليكي فى اليوم ممكن متفقديش وزن.

 

فوائد الصيام المتقطع:

 

خسارة الوزن
في فترة الصيام المتقطع نسبة الإنسولين بتقل فبالتالي الهرمون المسئول عن حرق الدهون بيزيد وبيساعد على تقليل دهون الأحشاء خصوصا البطن وبيحافظ على الكتلة العضلية فى الجسم.

 تحسين صحة القلب
فيه دراسة بتقول أن الصيام المتقطع ممكن يخفض من ضغط الدم والكوليسترول والدهون الثلاثية اللي ممكن تسبب أمراض القلب.

تقليل خطر الإصابة بمرض السكر من النوع التاني
الصيام المتقطع بيساعد على تحسين نسبة الإنسولين والسكر في الدم وبيقلل من نسبة الإصابة من مرض السكر من النوع التاني.

 

نصايح مهمة:

  • ممكن يكون فيه شوية أعراض جانبية فى بدايات بدأك للنظام زي الأرهاق والتعب عشان الجسم مش متعود على النظام الغذائي الجديد ومع مرور الوقت بتقل تدريجيًا.
  • متنسيش تشربي ميه كتير فى خلال اليوم وخاصة خلال فترة الصيام.
  • إذا كنتي حامل أو بترضعي مينفعش تتبعي النظام ده.
  • لو عندك مشكلة فى ضغط الدم أو السكر أو بتاخدي أدوية معينة لازم تستشيري الدكتور الخاص بيكي قبل البدء بالصيام المتقطع.

 

حابين نعرف لو جربتي النظام ده قبل كده وخسيتى قد إيه.

 

 

المصدر:
Dailymedicalinfo

SHARE

LEAVE A REPLY

Please enter your comment!
Please enter your name here