مين اللي ما يحبش طبق حلويات شرقية جميل بعد الأكل، أو حتى قبل الأكل. الشيف منال العالم عملت وصفة بسبوسة بالقشطة تجنن وتستاهل نكتب عنها وننشر لك طريقتها ومقاديرها عشان تجربيها. مش هتقدري تقاومي لما تقري وتشوفي شكل البسبوسة.

مقادير البسبوسة بالقشطة على طريقة منال العالم:

  • كباية سميد (ناعم أو خشن)
  • نص كباية سكر
  • تمن معلقة صغيرة بيكينج باودر
  • تمن معلقة صغيرة بيكربونات صودا
  • تمن معلقة صغيرة ملح
  • 3 بيضات كبيرة
  • معلقة صغيرة فانيليا
  • كباية زبادي
  • تلات ارباع كباية زيت درة

للحشو:

  • كبايتين لبن حليب
  • معلقتين كبار نشا
  • معلقتين كبار دقيق
  • معلقة كبيرة سكر
  • 5 فصوص مستكة
  • ربع كباية قشطة

للتقديم شربات وفسدق حلبي (أو أي نوع مكسرات)

طريقة التحضير:

  1. قبل ما تبدأي في التحضير، شغلي الفرن على درجة 180 وحطي الرف الشبك اللي في النص وثبتيه.
  2. جهزي قالب أو صينية مقاس 22 أو 24: ادهنيها بالسمنة ورشي عليها دقيق.
  3. في البولة أو الميكسر حطي كباية السميد مع نص كباية السكر ومقدار البيكينج باودر ومقدار البيكربونات ومقدار الملح والتلات بيضات ومعلقة الفانيليا وكباية الزبادي وكباية الا ربع زيت درة. اخلطي بالمضرب أو بالميكسر على سرعة واحدة (ما تعليش السرعة وتوطيها) عشان يطلع العجين متجانس.
  4. صبي تلتين كمية العجين في الصينية وساوي الوش وحطيه في الفرن 10 دقايق، عشان بس الطرف يبقى دهبي.
  5. وهي الصينية في الفرن، جهزي القشطة: هاتي حلة صغيرة وحطي فيها اللبن والنشا والدقيق والسكر والمستكة. واضربي المضرب السلك اليدوي بالراحة لحد ما النشا يدوب وبعدين حطيها على نار متوسطة وانتي بتقلبي برضه بمعلقة خشب عشان القوام يبقى سميك وفي نفس الوقت ما يكلكعش. شليه من النار وحطي القشطة. قلبي بهدوء لحد ما يدوبوا كلهم في بعض.
  6. دلوقتي عندك خليط قشطة، طلعي طبقة البسبوسة الأولى من الفرن بعد العشر دقايق ووزعي على وشها خليط القشطة وبعدين وزعي التلت اللي فاضل من خليط البسبوسة فوق القشطة.
  7. رجعي الصينية الفرن واخبزيها لمدة نص ساعة لحد ما تبقى دهبي.
  8. طلعيها من الفرن وحطي على الوش الشربات فورًا والمكسرات اللي تحبيها.

هنستناكي تقولي لنا لما تعمليها طلعت إزاي.

مصدر الوصفة

 

SHARE

LEAVE A REPLY

Please enter your comment!
Please enter your name here