طريقة عمل السينابون

في الموضوع ده هنقدملك الطريقة إللي هتخليكي تعملي السينابون زي المحترفين في البيت

Asmaa Darwish

270
0

مين فينا مبيحبش ريحتها أول مابيعدي من جنب المحل ويشم ريحة الزبدة والقرفة ومهما كنا شبعانين دايمًا بيكون ليها مكان.
السينابون ليها عشاقها من الكبار والصغيريين وهي من المخبوزات إللي ليها شعبية كبيره قوي في مصر والنهاردة وبمناسبة اليوم العالمي للسينابون جبنالكم وصفتها الأصلية بكل تفاصيلها لو مشيتي على الخطوات مظبوط نوعدك هتاكلي انتي وعيلتك أحلى سينابون.

مقادير عجينة السينابون:
المقادير دي هتكفي معاكي لعمل 8-10 قطعه سينابون

550 جم دقيق لجميع الاستعمالات
1 باكت خميرة فورية (حوالي 10جم)
70 جم زبدة سايحة
210مل من الحليب الفاتر
75 جم سكر أبيض
2 بيضة في حرارة الغرفة
رشة ملح

لعمل الحشوة هتحتاجي:
1 معلقة كبيرة قرفة
200 جم سكر بني
100 جم زبدة في حرارة الغرفة

عشان تدهني وش السينابون هتحتاجي:
1 صفار بيض
فانيليا
2 معلقه كبيرة لبن

للفروستينج هتحتاجي:
150 جم جبن كريمي في حرارة الغرفة
3 معلقة كبيرة سكر بودرة منخول
فانيليا
معلقة كبيرة زبدة طرية
لبن حسب الحاجة

الطريقة:
1-في العجان حطي كل مكونات العجينة ما عدا اللبن الفاتر واخلطي كويس على سرعه بطيئة وبعدين زودي اللبن بالتدريج لحدما تبدأ العجينه تتكون.
2-اعجني العجينة على سرعة متوسطة لمدة 10 دقايق لحد ما تتكون عندك عجينة طرية سطحها ناعم.
3-حطي العجينة في طبق عميق مرشوش بالدقيق وغطي وشها بشوية من الدقيق و سيبيها لمدة ساعه تخمر.
4-والعجينة بتخمرحضري الحشوة بإنك هتخلطي كل مكوناتها مع بعضها.
5-بعد متعدي الساعة هتكون العجينة حجمها اتضاعف بصوابعك خرجي منها الهوا وعلى سطح مرشوش بالدقيق افرديها على شكل مستطيل وباستخدام السكينة هتساوي أطراف العجينة عشان توصلي لشكل مستطيل مظبوط.
6-افردي الحشوة بالتساوي على سطح العجينة وابدأي لفي الأطراف بحيث يكون عندك شكل العجينة أسطوانة سمكها متساوي.
7-قسمي العجين لقطع متساوية من السينابون وقطعيها بسكينة حامية جدًا بحرص عشان الشكل المدور لكل قطعة يكون مظبوط.
8-حطي قطع السينابون في صينية مبطنة بورق زبدة وسيبي بينهم مسافه كافية لأنها هتخمر تاني وتتمدد لما تخبزيها وسيبيها تختمر مرة تانية لمدة 20 دقيقة.
9-ادهني وش السينابون بخليط البيض واللبن واخبزيها في فرن يكون متسخن قبل الخبز بنص ساعة على الأقل على درجة حرارة 190 لمدة 15-20 دقيقة.
10-عشان تعملي الفروستينج اخلطي كل المكونات في محضرة الطعام وزودي اللبن بالتدريج لحد متوصلي لقوام كريمي ناعم.
11-غطي السينابون وهي دافية بالفروستينج و استمتعي.

ملحوظة
ممكن تضيفي أي نوع من المكسرات عالوش وأنا برشحلك اللوز المحمص المملح لأنه بيضيف تناقض حلو قوي لطعم السينابون المسكر.

LEAVE A REPLY

Please enter your comment!
Please enter your name here