طريقة عمل الكوكيز بحبيبات الشوكولاتة خطوة بخطوة

من أشهر أنواع الكوكيز المحبوبة جدًا للكبار والصغيرين ولها وصفات كتيرة هي الكوكيز بالشوكوليت شيبس أو البسكوتات المدورة بقطع الشوكولاتة. النهارده، حبيت أشارك معاكم طريقة عمل الكوكيز خطوة بخطوة زي المحلات بالظبط بوصفة سهلة جدًا ومكوناتها موجودة في كل بيت وكمان فيها فايدة عالية
ومغذية لإني ضفت لها دقيق الشوفان فهتكون مناسبة جدًا لأولادك في اللانش بوكس.

مقادير الكوكيز بالشوكولاتة

115 جم زبدة بدرجة حرارة الغرفة

115 جم سكر بني

1 كوب شوكليت شيبس

1 بيضة

150 جم دقيق أبيض

75 جم دقيق شوفان (شوفان مطحون ناعم جدًا)

فانيليا

رشة ملح

2 معلقة صغيرة بيكنج بودر

1 معلقة صغيرة قرفة

 

ممكن تشوفي هنا .. طريقة عمل الأرز باللبن لطفلك الدارج

 

طريقة عمل الكوكيز بالشوكولاتة خطوة بخطوة

– بمضرب كهربائي اخلطي الزبدة مع السكر البني لحد ما يتجانسوا.

– ضيفي البيضة والفانيليا واخلطي كويس

– اخلطي المكونات الجافة بمضرب سلك: الدقيق الأبيض والشوفان والبيكنج بودر والملح والقرفة.

– ضيفيهم على خليط الزبدة والسكر بمعلقة خشب أو سباتيولا وقلبي لحد ما يتجانسوا بس ما تبالغيش في التقليب لإن ده ممكن يخلي الكوكيز تنشف بعد الخبز.

– ضيفي الشوكولاتة وقلّبي بدون مبالغة في التقليب

– سيبي عجينة الكوكيز ترتاح في التلاجة نص ساعة (في المرحلة دي ممكن تشكّلي العجينة على شكل أسطواني وتلفيها بالبلاستيك وتشيليها في الفريزر للوقت اللي تحبي تخبزيها فيه.  هتطلعيها تفك بشكل جزئي بحيث تقدري تقطعيها بالسكينة وتخبزيها وده هيوفر لك وقتك جدًا).

– سخني الفرن على حرارة 170 درجة سيلزيوس وشكّلي العجينة بسكوب الآيس كريم عشان تكون متساوية الحجم بقدر الإمكان. رصّي الكوكيز على صينية خبز مبطنة بورق الزبدة وبإيدك تضغطي على كل كوكي عشان تظبطي سمكها لإن الكوكيز دي شكلها وسمكها ما بيتغيرش بعد الخبز بشكل كبير.

– اخبزيها لمدة 15 – 20 دقيقة تقريبًا. حاولي تخرّجي الكوكيز من الفرن وهي لسه طرية شوية، عشان بعد ما تبرد هتنشف وتقرمش بس هتفضل طرية ومندّغة من جوه.

– زوّدي وقت الخبز شوية لكوكيز مقرمشة من جوه وبره.

جربي الطريقة ومستنيين تقولي لنا في التعليقات عجبتك قد إيه وعجبت أولادك ولا لا. كمان قولي لنا وصفات محتاجاها في التعليقات عشان نعملها.

LEAVE A REPLY

Please enter your comment!
Please enter your name here