طريقة عمل دونات العشر دقائق من غادة التلي

في الموضوع ده هنقولك على وصفة دونات العشر دقايق من غادة التلي.

Laila (Aya) Sami

146
0
طريقةعمل دونات العشر دقائق

الأمهات عجبتها وصفة دونات العشر دقائق اللي قدمتها الشيف غادة التلي في برنامجها “زعفران وفانيلا” اللي بيتذاع على قناة CBC سفرة. الوصفة مش بس حلوة، دي كمان سريعة ومش هتاخد منك وقت. شوفي معانا طريقة عمل الدونات خطوة بخطوة ..

مقادير دونات العشر دقايق:

  • 5 كبايات دقيق
  • بيضة
  • 50 جرام زبدة (3 معالق كبيرة ونص)
  • ربع كباية سكر
  • ربع كباية لبن بودرة
  • كبايتين ميا دافية
  • معلقتين كبار خميرة
  • شوكولاتة سايحة للتجميل
  • شوكولاتة بيضا سايحة للتجميل
  • زينة الكيك
  • زيت للقلي

طريقة عمل دونات العشر دقايق:

  • في العجان mixer (أو في بولة واسعة وبمضرب) حطي كبايتين من الدقيق ومعلقتين الخميرة وربع كباية السكر وربع كباية اللبن البودرة واخلطيهم مع كوبايتين الميا الدافية. اخلطيهم كويس.
  • بعد كدا بتسيبي العجينة من 10 دقايق لربع ساعة عشان تخمر. بعدها ضيفي الزبدة والبيضة وبقية الدقيق.
  • اعجني كل دا كويس جدا وبعدين افردي العجينة على صينية أو الرخامة بس رشي تحتها دقيق الأول.
  • قطعي العجين في شكل حلقات الدونات واقليها في زيت غزير لحد ما توصل لللون الدهبي.
  • طلعيها من الزيت وبعد ما تتصفى من الزيت زينيها بالشوكولاتة وزينة الكيك.

لو كنتي من عشاق السينابون .. اعرفي طريقة عمل السينابون هنا

طرق زينة مختلفة لدونات العشر دقايق

  • دونات بالسكر
    تقدري ترشي سكر بودرة على وش الدونات.
  • دونات بالجليز الأبيض
    في بولة صغيرة اخلطي كباية سكر بودرة وربع معلقة صغيرة فانيلا ورشة ملح مع 3 معالق كبيرة لبن (سايل) لحد الدوبان التام وبعدها افردي مقدار من الخليط على الدونات.
  • دونات التوت
    تقدري تفردي مربى التوت على وش الدونات.
  • دونات السكر والقرفة
    اخلطي كباية سكر بمعلقتين كبار قرفة. وهي الدونات لسه سخنة غمسيها كويس في الخلطة دي.
  • دونات الكريمة
    اخلطي 4 معالق كبيرة كريم شانتيه ومعلقتين كبار سكر بودرة و5 معالق كبيرة لبن ونص معلقة صغيرة فانيلا ونص معلقة صغيرة قرفة. وافضلي قلبي لحد ما يبقى ناعم وكريمي، وافرديه على الدونات.

لو عندك وقت أكتر من 10 دقايق، تقدري تخبزي الدونات وهتطلع معاكي نتيجة كويسة جدًا.

مصادر ساعدتنا في نقل الوصفة ليكم

فيديو الحلقة على سي بي سي سفرة

https://www.youtube.com/watch?v=w7VcCzRt4Kw

صفحة الوصفة على موقع سي بي سي سفرة

صفحة الشيف غادة التلي على موقع سي بي سي سفرة

https://sofra.cbc-eg.com/stars/chef20

طرق التزيين المختلفة من Gemma’s Bigger Bolder Baking

https://www.biggerbolderbaking.com/donut-glaze-recipes/

LEAVE A REPLY

Please enter your comment!
Please enter your name here