طريقة عمل زبدة الفول السوداني في البيت

زبدة الفول السوداني من الأكلات الصحية والمفيدة اللي انتشرت مؤخرًا بشكل كبير وبقى لها شعبية كبيرة خاصةً بين الرياضيين واللي بيحاولوا يعيشوا حياة صحية بوجه عام. بس الحقيقه إن زبدة الفول السوداني مفيدة لنا جدًا كأمهات.
أولًا: هي مصدر هايل للبروتين ومليانة كالسيوم وده بيخليها مهمة جدًا لتغذية الأم في فترة الرضاعة. ده غير إنها على عكس اعتقاد ناس كتير بتنظم الوزن وبتساعد على التخسيس، بس طبعًا لو اتاكلت باعتدال.

فوائد زبدة الفول السوداني لأطفالك كتير لأنها مليانة مجموعة كبيرة من الفيتامينات والمعادن والدهون الصحية ومضادات الأكسدة والألياف
وهتديهم طاقة هايلة. بس طبعًا ناخد في اعتبارنا إن بعض الأطفال بيكون عندهم حساسية من الفول السوداني، فلازم نكون حذرين.

 

لو انتي أم جديدة شوفي .. طريقة عمل كوكيز تساعد على إدرار اللبن

 

وعشان تضمني إن زبدة الفول السوداني تكون فعلًا صحية ومش مضاف لها نسب عالية من السكر والدهون زي بعض المنتجات الموجودة في الأسواق، جيبنا لك النهارده طريقة عمل زبدة الفول السوداني في البيت عشان تقدري تعمليها بنفسك وتاكليها انتِ وأولادك وتستمتعوا بطعمها وفوايدها.

مقادير زبدة الفول سوداني البيتي

¼ كيلو فول سوداني مقشر مش مملح

1 معلقة كبيرة عسل أبيض أو شراب القيقب (مابل سيرب)

¼ كوب زيت نباتي

¼ معلقة صغيرة ملح

 

طريقة عمل زبدة الفول السوداني البيتي

– حمصي الفول السوداني في طاسة واسعة يكون السوداني مفرود فيها على نار هادية لحد ما تبدأ ريحته تظهر بشكل واضح.

– في محضرة الطعام, اطحني الفول السوداني لحد ما يبدأ يخرّج الزيوت اللي جواه ويتحول معاكِ لمعجون والعملية دي هتحتاج حوالي 5-7 دقايق.

– ضيفي عليه الملح والزيت والعسل الأبيض واضربية مرة تانية لحد ما يتجانس ويبقى قوامه ناعم.

– احفظي زبدة الفول السوداني في برطمان زجاجي معقم (في غساله الأطباق أو في ماء مغلي).

– احتفظي بزبدة الفول السوداني لحد شهر في التلاجة. ولو لقيتيها فصلت بعد فترة، ما تقلقيش، اخلطيها بمعلقة واستخدميها.

 

ملحوظة:

– استخدمي نوع جيد من الفول السوداني لأن ده بيأثر على النتيجة النهائية لجودة الزبدة.

– اتأكدي إن سلاح محضرة الطعام حاد وفي حالة جيدة عشان يطحن معاكي السوداني بشكل أفضل وتحصلي على زبدة فول سوداني ناعمة جدًا وسهلة الفرد.

– لو حبيتي إنك تعملي زبدة الفول السوداني كرانشي أو مقرمشة، هتطحني ¼ كمية الفول السوداني طحن خشن وتشيليها على جنب، وبعد ما تخلصي الوصفة، هتضيفي الجزء الخشن عليها.

ممكن تشوفي هنا .. حلى الزبادي: طريقة عمل بارفيه الزبادي بالموز والخوخ

LEAVE A REPLY

Please enter your comment!
Please enter your name here