10 عادات صحية تحميكي من سرطان الثدي

المقال ده بيكلمك عن العادات الصحية إللي بتقلل نسبة الإصابة بسرطان الثدي

Laila (Aya) Sami

215
0


شهر أكتوبر هو شهر التوعية بسرطان الثدي والحماية منه. فيه بعض العادات اللي تقدري تعمليها يوميًا عشان الوقاية من سرطان الثدي.
في المقال دا، جمعنا لك حاجات بسيطة وسهلة لو عملتيها بانتظام تقدري تحمي نفسك من الخطر وتقللي نسبة الإصابة بالمرض.

  1. أكل صحي ومتوازن
    فيه أطعمة معينة بتحميكي من الأصابة بسرطان الثدي علشان كده احرصي إن أكلك يكون تلتين منه خضراوات وفاكهة وبقوليات وحبوب كاملة. الألياف كمان مهمة جدًا في تغذيتك. التلت الباقي خليه بروتينات خفيفة زي السمك والفراخ.تجنبي الأكل المصنع والمعالج

    واتجهي دايمًا للأكل الصحي لصحة عامة أفضل ولتجنب المرض ده.
  1. ممارسة الرياضة
    حتى لو ما عندكيش وقت تروحي جيم، احرصي إنك تتحركي دايمًا وإنك تعملي تمارين رياضية لمتوسط ربع ساعة يوميًا. دا هيخلي الخلايا تتجدد وهيساعدك تبقي بصحة كويسة وكمان هيقلل احتمالية الإصابة بسرطان الثدي.
  1. راقبي الميزان
    باتباع النقطتين اللي فوق، هتحافظي على صحتك، لكن كمان خدي بالك من وزنك. حاولي وزنك ما يزيدش عن المعدل الطبيعي خصوصًا بعد انقطاع الدورة الشهرية لأن الخطر هيكون أكبر.
  1. اسألي الدكتور عن طريقة منع الحمل الأفضل
    أقراص منع الحمل القايمة على الهرمونات بتعلي احتمالية الإصابة بسرطان الثدي في بعض الأجسام. عشان كدا، ما تاخديش أبدًا أقراص منع الحمل من غير استشارة الدكتور. واتأكدي من الدكتور إن دي أنجح وسيلة في حالتك لمنع الحمل.
  1. إيه نوع النسيج في صدرك؟
    دا سؤال ممكن تسأليه لدكتور النسا. يعني إيه أصلا؟ كل جسم مختلف عن الجسم التاني. لو صدرك تركيبته دهنية وفيه غدد لبنية أكتر، بيكون عرضة أكبر لنمو خلايا سرطانية. تقدري تعرفي المعلومات دي من دكتور النسا وفي حالة لو صدرك تركيبته دي، داومي على الفحص الذاتي وخدي كل الخطوات اللي تقلل فرص إصابتك.
  1. ضلمي الأوضة بالليل
    فيه دراسات اتعملت عن الستات اللي بتتعرض للأضواء بالليل ممكن يزيد عندهم خطر التعرض للإصابة بسرطان الثدي،
    وربطوا دا بإن فيه هرمون اسمه ميلاتونين الجسم بيفرزه بس
    في حالة الضلمة.
  2. فيتامين د
    خدي بالك إن جسمك ياخد فيتامين د، إما بإنك تتعرضي للشمس كفاية أو إنك تاكلي حاجات غنية بفيتامين د زي السلمون
    والمحار والسردين.
     
  3. لاحظي مكونات منتجات الشعر والبشرة
    اقري دايما محتويات منتجات الشعر والبشرة قبل ما تشتريها وتجنبي أي منتج فيه بارابين لأن الدراسات ربطت بين استخدامه وبين الإصابة بسرطان الثدي.
  4. الرضاعة الطبيعية
    كل ما ترضعي ولادك طبيعي أكتر، كل ما الخطر هيزول عن صدرك إنك تصابي بمرض سرطان الثدي. عشان كدا الدكاترة بينصحوا إن الأمهات ترضع طبيعي لتجنب الإصابة بالمرض.
     هنا دليل أشهر استشاريين الرضاعة الطبيعية في القاهرة

10. داومي على  فحص الثدي
فيه طرق للفحص الذاتي تقدري تتبيعها وتقدري تخليها عادة دايمًا بعد الدش. اعملي سونار على الثدي لو انتي تحت الأربعين ولو فوق الأربعين اعملي ماموجرام.

المقال دا أول مقال من سلسلة هتكلمك عن نصائح عشان تحمي نفسك من سرطان الثدي، نتمنى لك دوام الصحة.

مصادر المعلومات:
https://www.mayoclinic.org/healthy-lifestyle/womens-health/in-depth/breast-cancer-prevention/art-20044676
https://www.webmd.com/breast-cancer/ss/slideshow-habits-lower-breast-cancer-risk

LEAVE A REPLY

Please enter your comment!
Please enter your name here