“لما الشتا يدق البيبان”، بنتربس الباب ونجري نقفل الشبابيك ونعمل مشروب دافي ونقعد قدام التليفزيون بالبطانية. معروفة! بس كتير مننا الشتا بالنسبة لهم يعني كآبة وتقل، كتير بيعانوا من حالة اكتئاب الشتاء. الحالة دي اسمها العلمي اضطراب عاطفة موسمي أو Seasonal Affective Disorder. عشان تعرفي أكتر عن التخلص من اكتئاب الشتاء، اقري المقالة دي.

اضطراب العاطفة الموسمي هو نوع من الاكتئاب بيرجع في كل سنة في نفس الوقت، وغالبًا بيبقى الوقت ده آخر الخريف وأول الشتا، مع قلة الشمس وطول الليل. فيه ناس بيحصل لهم الاضطراب ده في الربيع وفي أول الصيف بس ده مش منتشر زي الشتا.

أعراض اضطراب العاطفة الموسمي (أعراض اكتئاب الشتاء)

  • الإرهاق.
  • قلة أو انعدام الاهتمام في أي حاجة.
  • صعوبة في التركيز وفي النوم وفي الانبساط بالحاجات اللي كانت بتبسطك.
  • احتمال يكون فيه زيادة في كمية الأكل.

أسباب اضطراب العاطفة الموسمي

الدكاترة بيفكروا إن قلة آشعة الشمس ممكن تحفز تغيير كيميا المخ. غالبًا معدلات الميلاتونين بتترفع ومعدلات السيروتونين بتقل وعشان كده المزاج والنوم بيتغيروا.

مين بيتعرض لاضطراب العاطفة الموسمي (الاكتئاب الموسمي)؟

  • كل ما بعدت البلد على خط الاستواء، كل ما كانت فرص الإصابة بالاضطراب دا أكبر.
  • لو فيه تاريخ مرضي عائلي بمرض الاكتئاب، دا بيزود فرص الإصابة بالاضطراب وبيخلي الأعراض أشد.
  • الستات بيتعرضوا للاضطراب دا أكتر ب4 مرات من الرجالة.

علاج اضطراب العاطفة الموسمي (علاج اكتئاب الشتاء):

  • الأدوية: ممكن الدكتور يوصف لك مضاد اكتئاب بيرفع من مستوى السيروتونين عشان يحسن المزاج والنوم.
  • العلاج بالضوء: ممكن تستخدمي أنواع لمبات تشيه نور الشمس خلال الشتا. وتتعرضي للنور دا من 20 دقيقة لساعة كل يوم الصبح طول الشتا.
  • علاج نفسي: ممكن المعالج النفسي يساعدك تتعرفي على نمط الأفكار السلبية فتقدري تبدليها بأفكار تانية إيجابية، أو بأنشطة تعمليها هتحسن مزاجك.
  • فيتامين د: فيه دراسات بتقول إنك لو أخدتي فيتامين د، دا هيساعدك لو بتتعرضي لاضطراب العاطفة الموسمي. لكن فيه ناس ما بيعملش معاهم أي تأثير. فيفضل تسألي الدكتور قبل ما تبدأي تاخدي الدوا.
  • طبعًا نظام الحياة الصحي اللي فيه أكل صحي متوازن وممارسة رياضة وتقليل للسكريات والنشويات البسيطة بيساعد بوجه عام إن مزاجك يكون كويس.

قولي لنا في التعليقات إيه هي الحاجة اللي هتجربيها أو لو جربتيها نفعت معاكي قد إيه؟ نتمنى لكم دايمًا صحة كويسة ومزاج عال.

مصدر ساعدتنا في كتابة المقال:

WebMD

SHARE

LEAVE A REPLY

Please enter your comment!
Please enter your name here