ليه فيه أم مقتنعة إن البيبي ملبوس بالجن؟

في المقال دا هتعرفي كل حاجة محتاجة تعرفيها عن أسباب وأعراض وعلاج ذهان ما بعد الولادة أو الذهان النفاسي Postpartum Psychosis

Laila (Aya) Sami

638
0

الموقف إللي مكتوب في العنوان حقيقي وحصل على أرض الواقع مش مبالغة مننا في العنوان والأم كانت مثقفة جدًا ومتعلمة. مكنتش فاكرة إنه ممكن أم تضرب ابنها إللي عمره أسابيع علشان تخرّج منه الجن إللي لابسه، ولا إنه فيه أم تبقى عايزة تموت ابنها علشان ربنا بعت لها مرسول يقول لها تعمل كدة، مكنتش متخيلة إنه فيه أم تفتكر إنها هتموت لو رضّعت البيبي.. حاجات كتير كتير خوفتني قرأتها عن قصص أمهات ما اتعالجوش من ذهان ما بعد الولادة.. وهو ده الموضوع إللي عايزين نتكلم عنه في المقال ده.

الذهان هو اضطراب ذهني بيؤثر على طريقة تعامل المخ مع المعلومات لدرجة إن المصاب أو المصابة بتكون مشاعرهم وخيالاتهم بالنسبة لهم حقيقية أكتر من الحقيقة.

ذهان ما بعد الولادة أو الذهان النفاسي postpartum psychosis هو الحالة اللي بيكون الاضطراب ده فيها مش موجود عند الأم من قبل الحمل، لكن بدأ مع الولادة. كمان هو بيبدأ بالتدريج مش بيحصل بكل أعراضه فجأة. للأسف ذهان ما بعد الولادة مش بس بيؤثر على الأم، إنما كمان فيه خطورة على حياة الطفل. ذهان ما بعد للولادة ما بيفرقش بين ام غنية او فقيرة، متعلمة او غير متعلمة.. ببساطة لإنه المرض ما بيفرّقش.

 

امتى بيظهر ذهان ما بعد الولادة؟
عادة ذهان ما بعد الولادة بيظهر في أول أسبوع بعد الولادة وأول ما بيظهر بيكون أكتر شبه الاكتئاب لكن مستوى الاكتئاب بيعلى بسرعة شديدة وبيحتد وساعتها ما بيكونش مجرد اضطراب نفسي، لكن اضطراب عقلي خطير.

 

أسباب الإصابة بذهان ما بعد الولادة
غالبًا السبب الأكبر ورا ذهان ما بعد الولادة بيبقى تغيرات الهرمونات الكبيرة جدًا اللي بتحصل مع نهاية الحمل والولادة. لكن في نفس الوقت، دكاترة كتير بيرجحوا إن مفيش سبب واضح ورا الإصابة بذهان ما بعد الولادة. لكن فيه عوامل معينة بتزود خطر الإصابة وهي:

  • تاريخ عائلي من اضطرابات عقلية وخصوصًا لو الأم أو الجدة أو الخالة أصابوا بذهان ما بعد الولادة.
  • اتشخصتي قبل كده باضطراب ثنائي القطب أو فصام.
  • حملك كان صعب أو الولادة كانت مؤلمة.
  • جالك ذهان ما بعد الولادة في ولادة سابقة.

أعراض ذهان ما بعد الولادة

  • هلاوس وتصورات غير حقيقية:
    ممكن تيجي للأم أوهام أو هلاوس زي أصوات بتسمعها بتكلمها عن نفسها أو عن طفلها وتقول لها إنه اتمس من الشيطان أو إنه نبي أو إنه اتبدل في المستشفى أو إنه مش نضيف ولازم يتغسل في الغسالة أو إن الناس هتؤذيه ولازم تخبيه منهم. أو وساوس من نفس النوع من غير أصوات بتسمعها، لكن بتكون فكرة ملحة بتسيطر عليها وبتحتلها تماما.
  • مزاج سيء:
    مش بس مود مش متظبط، لا كمان أعراض اكتئابية زي نقص الطاقة وفقدان الشهية والقلق واضطراب النوم.
  • فقدان الإحساس بالوقت وبالمكان
  • عدم القدرة على التفكير بشكل منطقي.
  • محاولات إيذاء النفس أو إيذاء الطفل.

علاج ذهان ما بعد الولادة
لما الدكتور يشخص الأم على إنها مصابة بذهان ما بعد الولادة، غالبًا هيقترح طريقة من طريقتين علاج:

الطريقة الأولى: أدوية ممكن تؤثر على لبن الأم وتمنع الرضاعة:

  • مضادات اكتئاب.
  • مضادات الذهان.
  • مثبتات المزاج.

الطريقة الثانية: علاجات ما بتؤثرش على لبن الأم:

  • صدمات كهرباء.
  • جلسات علاج نفسي.
  • أدوية معينة آمنة للرضاعة.

بننصحك إنك خلال الحمل، تتابعي نفسك وتلاحظي أي علامات اكتئاب، ولو لاحظتي إن فيه أعراض اكتئاب بدأت تبان، تروحي لدكتور نفسي ممكن يعالجك من خلال استشارات أو مجموعات دعم أو حتى في الحالات الشديدة ممكن مضاد اكتئاب آمن مع الحمل. وطبعًا بعد الولادة اي احساس بالاكتئاب او بعدم قدرة على ممارسة دورك بشكل سليم استشيري حد متخصص.

 

مصادر ساعدتنا في كتابة المقال:

WebMD

ويب طب 1

ويب طب 2

MayoClinic

LEAVE A REPLY

Please enter your comment!
Please enter your name here