ناس كتير بتستغرب من موضوع السباحة للرضّع وبتفتكر إن سباحة الأطفال كتمرين ليهم مينفعش قبل ٣ أو ٤ سنين وبيكتفوا إنهم يودوا البيبي فى فصل الصيف فى البسين أو البحر، بس في الحقيقة الطفل حديث الولادة ممكن يروح تمرين السباحة عادي في السنة الأولى من عمر الطفل..

الطفل بيتولد بالفطرة عنده قدره إنه يتحرك فى الميه وبيقدر يتحكم فى كتم نفسه لفترة قصيرة لأنه بيكون لحد لحظة الولادة جوه ميه الرحم وبيكون قادرإنه يحرك إيده ورجله بحركات أشبه بالسباحة وأقوى رد فعل ليه بيكون في الميه لأنه لحد لحظة الولادة بيكون عايش جوه المية.

 عشان كده بعض الآراء بتقول إن الأم ممكن تودي البيبي تمرين السباحة من سن صغير جدًا من عمر 6 أسابيع زي ما حكت السباحة الأوليمبية Rebecca Adlington عن تجربتها مع بنتها وقالت إنها أخدتها أول مرة للسباحة وهي كانت عمرها 3 أسابيع ونص بس، وبعض الآراء بتفضل إن الطفل يتعلم سباحةمن سن صغير عشان مينسوش المهارة الفطرية اللي عندهم واللي بتكون صعب إنهم يفتكروها لو أبتدوا يتمرنوا فى سن أكبر بس مش معنى إن الطفل عنده مهارة السباحة بالفطرة إنه أول لما ينزل حمام السباحة هيقدر يعوم، الطفل برضو هيحتاج إنه يتمرن عشان يقدر يستكشف المهارة اللي عنده..

سباحة الأطفال الرضع
سباحة الأطفال الرضع

C.A.F. Swimming Baby
موضوع سباحة الرضع انتشر جدًا مؤخرًا على السوشيال ميديا خصوصًا فيديوهات كابتن محمد فوده فيC.A.F Swimming Baby من أشهر الأماكن في مصر اللي بتمرن سباحة للرضع، كابتن محمد فوده حاصل على شهادات وكورسات تدريب سباحة الرضع وتم تكريمه في روسيا في ” The International Economic Summit In Russia-Islamic World Kazan Summit 2019”.. 

اتكلمنا مع الكابتن عشان نعرف منه شوية معلومات عن تمرين سباحة الأطفال الرضع ودي كانت إجاباته على أسئلتنا

سباحة الأطفال الرضع

 إيه أنسب سن للتمرين وايه أصغر سن مرنته؟
بعد ما بنتأكد من صحة الطفل إنها كويسة ووزنه طبيعي ومتوافق مع سنه فأنسب سن للتمرين هو من سن شهرين بس أصغر سن مرنته كان  بيبي عنده 28 يوم بس.

سباحة الأطفال الرضع
سباحة الأطفال الرضع

إيه أكتر تعليقات  بتلاقيها على الفيديوهات في السوشيال ميديا وردك عليها؟
بلاقي تعليقات كتير إن الطفل إتولد قادر يعوم، الطفل جوه الرحم بيكون جوه الميه لحد لحظة الولادة والطفل بالفطرة لو نزل الميه بيبقى قادر إنه يعمل طفو على وشه وكمان يفتح عينه تحت المية وبالتالي أنا ما بعملش حاجة أصلا.

الفكرة إنه إحنا بنمرنه إنه يقدر يعمل طفو على ضهره ويتحكم في النفس والطفل اللي بيعوم في الفيديو ده بيبقى بعد ما الطفل بيتمرن الفترة معانا مش في التمرين نفسه.. البيبي مش بيوصل للنتيجة دي لوحده أبدًا.

سباحة الأطفال الرضع
سباحة الأطفال الرضع

بتأهل الطفل إزاي إنه ينزل المية؟
أول حاجة ممكن الأم تعملها في البيت قبل ما تجيبه يتمرن بفترة إنها تبتدي تعوده على الميه يعني ممكن تنزله في البانيو وهي شيلاه في حضنها من غير ما تغطس راسه عشان يتعود على الميه ويبقى زي تأهيل نفسي للطفل، لما بييجي التمرين بنبتدي ننزل رجله الأول وبعدين واحدة واحدة بينزل جسمه كله وبنلاعبه عشان نفسيته تبقى كويسة ويبقى متقبلها وممكن ياخد الببرونة كمان، الطفل لما بيحس بالأمان في المية هيتعود عليها ومش هيخاف وهيحس إنها بيئة آمنة ليه ويقدر يمارس فيها حياته الطبيعية.

سباحة الأطفال الرضع
سباحة الأطفال الرضع

إيه معايير السلامة للمكان؟
الطفل مش بيقدر ينظم درجة حرارة طفله فحمام السباحة لازم يبقى على درجة حرارة 32 وطبعًا مجهز عشان يكون آمن على بشرة الطفل من ناحية نسب الكلور اللي بتكون في المية، غير الاسعافات الأولية عشان لو فيه أى موقف خطر لا قدر الله.

إيه فوايد السباحة للرضع؟
تمرين السباحة بيكون مسلي جدًا للطفل ويعزز ثقته بنفسه وبيقوي من ردود أفعاله وبيخليه قادر إنه يتصرف لو اتعرض لموقف إنه يقع فى الميه لا قدر الله، وفوائد السباحة كتير زي:

  • بتساعد الطفل إنه يكون عنده مرونة وبتطور عضلات جسمه وتحسن من الدورة الدموية وخصوصًا في الشتا.
  • التمرين بيساعده على الاسترخاء وبالتالي هينام بشكل أفضل وبينظم روتين نومه.
  • السباحة بتحسن من صحة الرئة وبتنظم عملية التنفس وكتير من الدكاترة بينصحوا الأطفال اللي عندهم حساسية صدر إنهم يروحوا تمرين السباحة.
سباحة الأطفال الرضع
سباحة الأطفال الرضع

إعملي بحثك وإستشيري دكتور طفلك قبل ما تاخدي قرار السباحة وحابين نسمع رأيكم في الموضوع ده.

 

المصادر:

Mother and Baby

Swimming.org

Babycentre.co.uk

SHARE

LEAVE A REPLY

Please enter your comment!
Please enter your name here