الأبراج: مواصفات امرأة برج العذراء

في الموضوع ده هتعرفي بالتفصيل مواصفات امرأة برج العذراء

Yomna Maheny

132
0
صفات امرأة برج العذراء


هنتكلم عن صفات امرأة برج العذراء، فبرج العذراء من أكثر الأبراج الإيجابية وشديد المرح. لو هنتكلم عن امرأة العذراء يبقى نجهز نفسنا للكلام عن واحدة من أكتر النساء تميزًا بصفاتها الإيجابية وحبها الشديد للترتيب وإتقان شغلها وروحها إللي بتنشر المرح والضحك في أي مكان بتروحه.. كبريائها عالي جدًا وبتهتم جدا ببيتها وأولادها وجوزها.. المرأة العذراء يعني الطبخ التحفة والإستقبال الجميل في بيتها والهدايا الحلوة وفوق كل ده عاطفتها الدافية مع حبيبها.. 

خلينا نتكلم بشكل مفصل أكتر عن صفات امرأة برج العذراء.

  • امرأة برج العذراء والحب:

بمجرد ما تقع في الحب فهي مش هتتردد أبدًا إنها تمشي ورا قلبها بس بشرط.. إنها تحس إنها حرة ومافيش أي قيد عليها أبدا.. والسبب إن هي عندها خوف داخلي إنه لو إستسلمت لأي قيد فهي هتفقد شخصيتها إللي بتعتز بيها لأقصى حد ويحولها لشخص هي رفضاه.. علشان كدة هي دايمًا قرارتها العاطفية عقلانية جدا وناضجة جدًا.. هي مقتنعة إن كم قليل من الحب والعاطفة كافي جدًا لتكوين أسرة ورعايتها.. وعلى الرغم من أنها يبان أنها قوية وقرارها قاسي بس هي دي طريقتها في التعبير عن حبها الكامل والشديد وإللي لازم الطرف التاني يفهمه ويقدّره ويدعمها فيه.

  • امرأة برج العذراء اجتماعيا:

من مواصفات امرأة برج العذراء ان طبيعتها العطوفة بتخليها مثالية على المستوى الاجتماعي ده لأنها بتحب تدي الدعم لكن أصحابها وأفراد أسرتها.. وده بيخليها ركن النصيحة والإستشارة دايمًا.. لأنها بتحب التفاصيل.. صحيح هي مش بتعرف تعبر بالكلام عن مدى حبها بس هي فعليًا كل تصرفاتها بمعنى كلها بجد بتعبر عن الحب.. ويمكن ده من أسباب إنها مش بترتبط بسهولة لأنها بتختار شريكها بدقة وبتعبر عن إحساسها متأخر رغم كل الود اللي ظاهر عليها.

  • امرأة برج العذراء في العمل:

بتتميز إنها موظفة مخلصة ودقيقة لأنها بطبيعتها بتهتم بالتفاصيل جدا.. علشان كدة هي دايما عضو ناجح في فريق عمل لكن مش كقائد فريق.. لأنه حبها للتفاصيل مش بيخلّي عندها قدرة على خلق رؤية شاملة.. ده طبعًا بجانب حبها لخلق توازن بين شغلها وبين أسرتها وبتعتبر من أنجح الأبراج في تحقيق التوازن ده.

  • امرأة برج العذراء والموضة:

إنسانة بسيطة وبعيدة عن البهرجة لكن في نفس الوقت دقيقة جدا.. مش بتهتم إنها تمشي على حسب أحدث خطوط الموضة، إنما على العكس بتختار دايمًا اللي يناسب شكل جسمها وسنها والمناسبة إللي هي هتحضرها.. ودي من الحاجات الجميلة في شخصيتها.

  • امرأة برج العذراء والثقة:

من الأمور اللي تقدري تعتبريها عيب وميزة في نفس الوقت في العذراء هو إنها مش بتدي ثقتها لحد بسهولة أبدا،  ده لأنها حريصة جدًا في مشاعرها وعلى مشاعرها.. علشان كدة بمجرد حصول الطرف التاني على ثقة العذراء بتكون ثقة كاملة.. لكن لو حصل أي شك جواها فهي بتنسحب فورًا مهما كانت محبتها للشخص إللي قدامها وبترفض إنه يرجع في دايرة حياتها من جديد مهما حصل رغم طيبة قلبها.

  • امرأة العذراء واللي بيعجبها:

من الأمور اللي بتتميز بيها المرأة العذراء إنها شخصية صعب تتوقع تصرفها إللي جي إيه.. وإيه إللي هيعجبها وإيه لأ.. شخصية بعيدة تمامًا عن أي معنى للملل علشان كدة هي بتستحق فعلا لقب المدهشة.. وعلى الرغم من دقتها بس هي بتتأخر على مواعيدها دايما لانها إحتمال تكون قابلت شيء غير اعتيادي عجبها.

  • امرأة العذراء والهدايا:

أسهل ست ممكن حد يشتري لها هدية هي العذراء.. لأن بكل بساطة تقدر تشتري لها أي هدية ما تقدرش تجيبها لأي ست تانية، زي مثلا الحاجات إللي ليها علاقة بالتكنولوجيا  أو كتب عن الأبراج .. ده مش معناها إنها مش بتحب الورود و العشاء الرومانسي.. بس معناه إن هي بتقدر جدًا أي مجهود بيبذله الطرف التاني.

في النهاية المرأة العذراء مميزة جدًا وسط الأبراج طبيعتها الهادية والراقية الجذابة غير قابلة للمقاومة.. ومحدش ما يقدرش فعلا يحب الشخصية دي.. قولى لنا الحقايق دي بتنطبق عليكي بنسبة أد إيه.

شوفي هنا طفل برج العذراء .. مولود العذراء يحتاج لدعم العائلة

المصدر

LEAVE A REPLY

Please enter your comment!
Please enter your name here