هل ممكن الأطفال يجيلهم مرض الاكتئاب زي الكبار؟ 

علامات وأسباب الاكتئاب عند الأطفال

Rahet Bally Team

124
0

الإجابة هي نعم.. الأطفال كمان ممكن يجيلهم مرض الاكتئاب وده مرض حقيقي زي أي مرض ولكن الحمد لله ليه علاج.. مهم نوضح إنه الاكتئاب مش مجرد إنه الطفل زعلان شوية أو مقريف أو موده وحش.. الاكتئاب بعد شوية بيخلي الطفل في حالة حزن وهمدان مستمرة وبيمنعه يمارس حياته الطبيعية.

ودلوقتي هنقول لكم على مجموعة من أعراض الاكتئاب إللي لو لاحظتي وجود بعض منها أو كلها على طفلك لمدة أكتر من أسبوعين مهم إنك تستشيري طبيب نفسي متخصص في علاج الأطفال بعد استبعاد أي أسباب طبية أو مشاكل أسرية أخرى.

من العلامات دي:
✔الانزعاج والغضب
✔الاحساس المستمر بالحزن وقلة الحيلة
✔الانسحاب الاجتماعي
✔الحساسية المفرطة تجاه الرفض
✔تغير ملحوظ في الشهية سواء رفض الأكل او الإقبال عليه.
✔تغير في عادات النوم سواء بقلة النوم الملحوظة او بالنوم الزيادة.
✔زيادة معدل البكاء.
✔الارهاق الشديد والطاقة القليلة.
✔شكاوي طبية لا تستجيب للعلاج زي الصداع أو آلام المعدة.
✔الطفل ما بقاش يعمل الأنشطة إللي بيحبها أو بيعملها وهو متضايق.
✔قلة التركيز بشكل ملحوظ
✔الإحساس المستمر بالذنب ولوم الذات
✔أي أفكار أو كلام عن تمني الموت او الإنتحار ودي أخطر مرحلة.

إيه إللي بيسبب الاكتئاب عند الأطفال؟
زي الكبار تمام، الاكتئاب بيحصل نتيجة تراكم مجموعة من العوامل مع بعض منها الصحة الجسدية والأحداث إللي بتحصل في الحياة والتاريخ العائلي والعوامل البيئية والجينية وعوامل الهشاشة أو الاختلال الكميائي في المخ. مرض الاكتئاب مش حالة وبتعدي لوحدها من غير علاج.. ومش معنى إنه طفلك عنده اكتئاب إنك أم مقصرة أو بتعاملي طفلك وحش زي ما قلنا فيه عوامل كتير مش عامل واحد.

LEAVE A REPLY

Please enter your comment!
Please enter your name here