١٢ حاجة مش هتلاقيها غير على cbc سفرة

الحاجات دي مش هنلاقيها في اي قناة طبخ أجنبية .. على سي بي سي سفرة وبس!

Asmaa Darwish

139
0
cbc سفرة - الشيف شربيني

أمهات وستات مصريات كتير – منهم اللي ست بيت ومتفرغة ومنهم اللي بتشتغل ووراها مليون حاجه في يومها – ما يقدروش يفوتوا يوم من غير ما يمسكوا الريموت ويتفرجوا على قنوات الطبخ ومن القنوات دي قناة cbc سفرة إما عشان ياخدوا أفكار أو بيكتبوا وصفات أو بيشوفوا هياكلوا إيه النهارده.

والحقيقة احنا كمصريين دايمًا مختلفين ولينا طريقتنا في كل حاجة، حتى قنوات الطبخ بتاعتنا ليها دايما روح وجو وخفة دم مميزة عن أي قناة طبخ عالمية.

وبما إن قناة  cbc سفرة من أهم قنوات الطبخ المصرية بشيفاتها المميزين المحبوبين، هنقول لك النهاردة شوية حاجات مش هتلاقيها غير على cbc سفرة.

  1.  عمرك ما هتلاقي حد بيهتم بأحدث صيحات الموضة للساعات والنضارات وبيهتم بتناسق الألوان ما بينهم زي الشيف الشربيني ويقولك “ورقة وقلم واكتبي ورايا يا ست الكل”.
  2.  عمرك ما هتلاقي حد خايف قوي على فلوسك وميزانية بيتك ويحكي لك حكايات فيها حكم ودروس حياتية زي الشيف نجلاء الشرشابي.
  3.  عمرك ما هتلاقي سهولة وسرعة في التواصل بين الشيفات والمشاهدين غير في برامجنا، بمكالمة تليفون تلاقي نفسك على الهوا وبتكلمي الشيف وبتحكيله خناقتك مع جوزك.
  4.  عمرك ما هتلاقي كم المشاهدين اللي هيموووتوا ويعرفوا طريقة عمل البيتزا وطريقة الكريب والمكرونة بالبشاميل والسينابون مع إن كل الشيفات عملوها بدل المرة عشرييين.
  5.  عمرك ما هتلاقي وصفات لأكلاتنا المصرية التقليدية القديمة بتاعه جدودنا زي الخبيزة والشوريك والكمونية والويكا وغيرهم كتير، تاريخ يا جماعة.
  6.  عمرك ما هتلاقي شيفات بتكلم المخرج في الإير بيس وتتخانق معاه عشان هو عايز يطلع فاصل وهم لسه ما خلصوش الوصفة.
  7.  عمرك ما هتلاقي مساعد الشيف دخل في حلقة على الهوا عشان يناول الشيف بولة البصل اللي كانت ناقصة من مكونات الوصفة؛ دخل إزاي وخرج إزاي وجه منين؟؟ محدش يعرف.
  8.  عمرك ما هتلاقي شيفات فاهمين في كل مجالات المطبخ زي عندنا: حوادق تلاقي، حلويات تلاقي، دايت تلاقي، تزيين كيك وماله، دا حتى الكيتو دايت ما سابوهوش في حاله!
  9.  عمرك ما هتلاقي شيف مغربية بقت لبلب في اللهجة المصرية ومحترفة في حلقات الهوا ومكالمات التليفون زي الشيف زينب مصطفى.
  10.  عمرك ما هتلاقي الاستديوهات مليانة فوانيس وبوجي وطمطم في رمضان وشجر وبابا نويل في الكريسماس وخروف متعلق في العيد الكبير والشيف واقف يشفيه عالهوا.
  11. عمرك ما هتلاقي حد يقولك “بلوك بلوك بلوك” أو “محدش علمك”  وتناقشك في مواضيع الحب والعلاقات زي المذيعة رضوى الشربيني.
  12. عمرك ما هتلاقي شيفات بيتكلموا في أهم الموضوعات السياسية غير على سي بي سي سفرة.

وفي النهاية، أحب أقول إن مفيش أحلى وأطعم وألذ من الأكل المصري وشيفات cbc سفرة كلهم ناس مجتهدين ومميزين. كل واحد فيهم ليه عشاقه ومتابعينه وشخصيته المميزة عشان كده احنا بنشكرهم واحد واحد إنهم بيمتعونا ويفيدونا بشغلهم ووصفاتهم كل يوم.

LEAVE A REPLY

Please enter your comment!
Please enter your name here