أسباب تساقط الشعر بكثرة

شعر الست مهم جدًا عندها، وتساقط الشعر بيبقى مشكلة بتسبب قلق وخجل لكتير من الستات. الشعر طبيعي إنه يقع منه من 50 لـ100 شعرة في اليوم ولما تغسليه متوقع تفقدي لحد 250 شعرة. لكن أكتر من كدا، وبشكل مستمر ممكن يكون له أسباب طبية محتاجة منك تاخدي بالك منها. في المقال ده، هنعرض لك أسباب تساقط الشعر المستمر وبغزارة.

في بداية العناية بالشعر، لازم تاخدي بالك إن شعرك بيتغدا منك. فلو صحتك كلها فيها مشكلة، أكيد شعرك هيعاني منها هو كمان. ولو مش بتتغذي كويس، شعرك أكيد هيتأثر. لو بتتغذي كويس وصحتك كويسة، الأسباب اللي جاية ممكن تكون فيها الإجابة عن سبب سقوط الشعر الشديد.

  1. أسباب وراثية: ممكن الشعر يخف جدًا أو يقع بشكل غزير في حالة وجود نوع من الصلع في جيناتك.
  2. الحمل: خلال فترة الحمل، متوقع إن يسقط شعرك بغزارة.
  3. اضطرابات الهرمونات بشكل عام: الحمل أو انقطاع الدورة أو التغيرات الهرمونية عمومًا من أسباب تساقط الشعر.
  4. اضطرابات الغدة الدرقية: أي تغير في توازن الهرمونات اللي بتفرزها الغدة الدرقية سواء بالزيادة أو النقصان ممكن تسبب سقوط الشعر. لو عندك أعراض تانية زي تضخم في منطقة الرقبة وتعب عام وفقدان أو زيادة وزن مفاجئة مع سقوط الشعر بغزارة، بننصحك تشوفي دكتور.
  5. الأنيميا: نقص الحديد في الجسم بيسبب إن الجسم بيبعت الأكسجين للحاجات اللي هو شايفها أساسية ومهمة ومش منها إنه يبعت لشعرك أكسجين كفاية وعشان كدا بيقع.
  6. بعض الأمراض: زي تكيس المبايض، أو الصدفية، أو الإكزيما.
  7. القلق الزيادة: التوتر ممكن جدًا يسبب تساقط الشعر بغزارة. حاولي تبعدي عن التوتر وجربي تعمل تأمل meditation.
  8. فقدان الوزن السريع: فقدان الوزن السريع بيسبب نفس اللي الأنيميا بتسببه: الجسم بيبعت الأكسجين لمناطق هو شايفها أهم من الشعر.
  9. بعض الأدوية: فيه بعض الأدوية من اللي بتعالج الاكتئاب وأمراض القلب والنقرس والضغط العالي، ممكن تكون من أسباب تساقط الشعر بكثرة. راجعي النشرة اللي جوا علبة الدوا عشان تتأكدي لو هو السبب.
  10. الإشعاع على الرأس: لو راسك تعرضت لآشعة معينة علاجية أو تشخيصية ممكن يكون دا السبب في سقوط شعرك.

في كمان أسباب في إيدك التحكم فيها أو حاجات بتعمليها لشعرك ممكن تكون بتتسبب في سقوطه: الضفاير الصغيرة المشدودة جدًا من الجذور والصبغات والمعالجات الكيميائية (زي الكيراتين والبروتين)، مكواة الشعر، وكمان تسريح الشعر بمشط أو فرشاة ضيقة.

لو شايفة إن شعرك بيقع أكتر من اللازم، ممكن تراجعي الأسباب دي وممكن تزوري دكتور جلدية يقدر يساعدك تعرفي السبب في حالتك انتِ بشكل أسرع. خدي بالك من شعرك واتبسطي به جدًا.

مصادر ساعدتنا في المقال:
WebMD

Mayoclinic

 

LEAVE A REPLY

Please enter your comment!
Please enter your name here