10 أفلام ملهمة لكل أم

في الموضوع ده هنقولك على 10 أفلام ملهمة لكل أم.. هيفرقوا معاكي وهيدوكي طاقة إيجابية

Rana Hany

200
0

أوقات بنتفرج على فيلم عشان نفصل ونقضي ساعتين لطاف ونقوم نكمل في الدوامة مع الولاد.

بس فيه أفلام بنشوفها بتأثر فينا وبتدينا دفعة وطاقة إيجابية. قصة فيلم بسيطة تغير نظرتنا للأمور. فيه أفلام بتفكرنا إن فيه أمل وإن الأمهات بالحب والطاقة اللي في قلبهم يقدروا يعملوا أي حاجة؛ يقدروا يغيروا العالم لمكان أحلى.

شوفي هنا ١٠ توكيدات إيجابية هتغير حياتك كأم

في الموضوع ده جيبنا لك 10 أفلام ملهمة لكل أم لازم تشوفيهم:

Wonder

أفلام ملهمة ليكي كأم - أفلام مفيدة للأمهات - أفلام عن الأم

واحد من أجمل أفلام الدراما الاجتماعية لسنة 2017. بيتكلم عن طفل اتولد بمرض اسمه “متلازمة تريشر كولينز” (وهي تشوهات خلقية في وشه عند الولادة) واتعمل له أكتر من 26 عملية جراحة تجميلية.

مامته واللي قامت بدورها جوليا روبرتس كانت بتعلّمه في البيت لحد ما وصل لسن 10 سنين وبعدها قررت تدّخله يكمل تعليمه في المدرسة في محاولة منها أنه يندمج مع باقي الأطفال ويحس بحقه أنه طفل طبيعي.

ومن هنا تبدأ حوادث التنمر والمضايقات اللي بيتعرض لها الطفل في المدرسة بسبب اختلاف شكله لكن وقوف مامته جنبه ودعمها المستمر له بتخليه يقدر يكمل في المدرسة ويتغلب على التنمر اللي كان بيتعرض له لحد ما قدر يثبت نفسه.

My Sister’s Keeper

أفلام ملهمة ليكي كأم - أفلام مفيدة للأمهات - أفلام عن الأم

فيلم مُقتبس عن رواية أدبية بنفس العنوان للكاتبة جودي باسويلت. اتعرض في 2009. من أحلي الأفلام اللي بتجسد دور الأم وقوتها في مساندة بنتها ضد مرض السرطان وقامت ببطولته كاميرون دياز.

بيحكي عن عيلة صغيرة مكونة من أب وأم وطفلين حياتهم سعيدة ومستقرة وطبيعية لحد ما اكتشفوا إصابة بنتهم بسرطان الدم وبيبلغهم الطبيب إن مفيش متبرع مطابق لبنتهم سواء كان الأب أو الأم أو الأخ وبينصحهم الطبيب بأنهم يجيبوا طفل تالت عن طريق التلقيح الصناعي عشان يضمنوا وجود متبرع لطفلتهم المصابة بالسرطان. وبعد ما الطفلة الجديدة بتتم 15 سنة بتبدأ في الاعتراض على مساعدة أختها وإنقاذ حياتها لما تلاقي إنه مطلوب منها التبرع بكليتها لأختها المريضة وتكتشف إن أهلها جابوها للدنيا بس عشان تنقذ حياة أختها. ونكتشف في النهاية ان الأخت المريضة هي اللي طلبت من أختها الصغيرة عدم الموافقة على التبرع لها بكليتها حفاظًا على حياتها.

فيلم بيوضح أد إيه الأم ممكن تضحي عشان تنقذ حياة حد من ولادها حتي لو كانت في طريقها ده ممكن تخسر باقي الأولاد وبيبان فيه قوة حب الأخوات لبعض وتأثيرها على حياة كل فرد في العيلة.

Tully

أفلام ملهمة ليكي كأم - أفلام مفيدة للأمهات - أفلام عن الأم

فيلم إنتاج سنة 2018 بيحكي بالظبط عن حياة كل أم عندها أكتر من طفل ومعانتها اليومية. لو ولادك كبار اكيد هتحسي بالحنين للفترة دي من حياتك ولوجود بيبي.

ولو انتي في نص الفترة ده هتحسي قد إيه الفيلم بيجسدنا ويحكي عننا وعن اكتئاب ما بعد الولادة وعن احتياجنا للزوج ومساندته في الوقت ده. فيلم بيبين قد إيه مجرد ما بنلاقي حد يساعدنا ويشيل عننا شوية في مسؤولية الولاد، نفسيتنا وحياتنا ممكن تتغير.

الفيلم بيحكي عن قصة أم بعد إنجابها للبيبي التالت، والتعب والإجهاد والإحساس بالذنب والتقصير ما بين مسؤوليتها كزوجة وكأم لطفلين أكبر. لحد ما تظهر في حياتها المربية “تولي” اللي بتساعدها في تربية البيبي الجديد وتسهر مكانها.

لحد ما نكتشف في آخر الفيلم إن “تولي” كانت مجرد هلاوس وخيالات في عقل الأم الباطن كنوع من التعبير عن احتياجها لمساعدة زوجها لها ومشاركته المسؤولية.

 

A Mother’s Courage: Talking back to autism

أفلام ملهمة ليكي كأم - أفلام مفيدة للأمهات - أفلام عن الأم

فيلم إنتاج سنة 2009، بيحكي عن أم بتقابل مع طفلها تحديات مع التوحد، بيحكي عن أم ما قدرتش تتقبل تشخيص الدكاترة بمرض ابنها الوحيد بالتوحد، وأصرّت إنها تبدأ رحلة بحث عن علاج فعال وإجابات عن حالة ابنها اللي بالنسبة لها كانت معقدة. وإزاي بتسافر من أيسلندا للولايات المتحدة عشان تعرضه على دكاترة أمهر وتتعرف على طرق جديدة للتعامل مع ابنها واستغلال مهاراته واكتشافه. فيلم وثائقي مليان مشاهد غنية بالحب والمثابرة.

 Soul Surfer

أفلام ملهمة ليكي كأم - أفلام مفيدة للأمهات - أفلام عن الأم
فيلم إنتاج سنة 2011 بيتكلم عن بنت مراهقة عندها موهبة كبيرة في التزلج على الأمواج بس بتتعرض لحادثة كبيرة وبتخسر دراعها بعد هجوم قرش عليها. بس وجود أب وأم مؤمنين بها فرق في حياتها صمموا يشجعوها ويساعدوها تتمسك بحلمها في التزلج ويدعموها لهدفها الكبير لحد ما قدرت تحقق حلمها في رياضة التزلج. الفيلم بيجسد قد إيه وقوفنا جنب ولادنا وإيمانا وتشجيعنا لهم بيفرق في حياتهم.

Mother and Child

أفلام ملهمة ليكي كأم- أفلام مفيدة للأمهات - أفلام عن الأم

فيلم إنتاج عام 2009 بيتكلم عن حياة تلات سيدات مشتركين في شيء واحد وهو التبني.

أول واحدة من أبطال الفيلم كانت حاسة بالحزن والندم لأنها لما كانت في سن المراهقة اتخلت عن بنتها وعرضتها للتبني.

تاني بطلة إنسانة ناجحة وبتشتغل محامية وكانت في صغرها طفلة متبناة لكنها بتعاني دايمًا من نقص الدفا وإحساس العيلة في حياتها.

أما تالت بطلة بتحاول هي وجوزها الإنجاب ولما ما بيقدروش بيبدأوا يتجهوا لطريق تبني طفل. فيلم درامي جميل بيعرض قضية التبني والأسر البديلة من جوانب مختلفة.

Rabbit Hole

أفلام ملهمة ليكي كأم - أفلام مفيدة للأمهات - أفلام عن الأم

فيلم إنتاج 2010 بيحكي عن تجربة مؤلمة لزوجين وشكل علاقتهم تحت ظروف الضغط الكبير اللي تعرضوا لها. القصة مبنية على مسرحية «ديفيد ليندسي» بيحكي عن زوجين في حاجة إلى المواساة بعد وفاة ابنهم في حادث سيارة.

أسرتهم وأصدقائهم بيحاولوا يقفوا جنبهم بس عمرهم ما بيقدروا ينسوهم أحزانهم أو يتعايشوا مع الواقع مهما حاولوا.

فكرة الفيلم المظلمة تخلي المتفرجين ما ينتظروش نهاية سعيدة للفيلم. هيخليك تفكر إزاي فيه ناس بتعيش مع الحزن والاكتئاب والتغيرات اللي بتحصل في حياتهم.

Instant Family

أفلام ملهمة ليكي كأم - أفلام مفيدة للأمهات - أفلام عن الأم

فيلم إنتاج 2018 بيحكي عن زوجين بيقرروا يتبنوا 3 أطفال. وفي البداية بتكون كل الأمور كويسة وبيطلعوا رحلة أسرية مع بعض. لكن مع مرور الوقت بتتحول كل الأمور بشكل كبير. بينتج عنها مواقف كوميدية مابتنتهيش.
رغم إن الكوميديا هي العنصر الأساسي في الأحداث لكن الفيلم قدر يوصل الجانب الإنساني بقوة ويفكرنا بقيمة العيلة والترابط بين الأب والأم والأخوات.

 

Freaky Friday

أفلام ملهمة ليكي كأم - أفلام مفيدة للأمهات - أفلام عن الأم

فيلم كوميدي خفيف إنتاج سنة 2003 عن بنت في سن المراهقة بتحب الموسيقى ومعجبة بزميلها. البنت متخيلة إنها مش فارقة مع مامتها وإن مامتها مش مهتمة بها، وفي نفس الوقت مامتها مقتنعة بأنها بنت مهملة. بيتخانقوا الاثنين وهم قاعدين في مطعم صيني، وهنا بتدخل ست صينية وتديهم كيك تبادل حياتهم مع بعض. من بعدها كل واحدة بتقدر تشوف حياة التانية وتفهم إحساسها.

Step Mom

أفلام ملهمة ليكي كأم - أفلام مفيدة للأمهات - أفلام عن الأم

فيلم إنتاج سنة 1999. بتدور الأحداث حول زوجين انفصلوا وعندهم طفلين. وبيجي للأم مرض خطير وتبدأ حالتها الصحية تتدهور، وفي الوقت نفسه تدخل حياة زوجها السابق المصور الناجح ست جديدة، وتبدأ في مساعدة أولاد زوجها عشان تحاول تسعدهم.

الأم بتتقبل دا وبتشجع أولادها على خلق علاقة لطيفة معاهم عشان ما تكونش خايفة عليهم وعلى نفسيتهم بعد فراقها.

لو انتي أم جديدة شوفي هنا صفات برج مولودك

LEAVE A REPLY

Please enter your comment!
Please enter your name here