10 مبادئ بسيطة للتربية الإيجابية لكل أم

عشر مبادئ هيساعدوكي تفهمي منهج التربية الإيجابية في تربية الأطفال

Shaymaa El-Gammal

268
0

“التربية الإيجابية” واحد من أهم المواضيع إللي لازم نتكلم فيها طالما بنتكلم على تربية اولادنا.

فيه دراسة اتعلمت سنة 2006 عن تأثير التربية السلبية في إصابة الأطفال بالاكتئاب. الدراسة وضحت إنه انعدام الدعم النفسي من الآباء هو أحد أسباب الإصابة بالاكتئاب عند الطفل.

قبل ما ندخل في تفاصيل التربية الإيجابية خلونا الأول نستعرض شوية مبادئ بسيطة توضح لنا الفكرة.

 

✔1-كل شيء يبدأ من عند الآباء
قبل ما نشوف تصرفات الأولاد الغلط وليه بيتصرفوا كدة، لازم الأول نشوف تصرفات الآباء.. معظم السلوكيات الغلط إللي بيعملوها أولادنا هي بسبب إنهم بيقلدوا تصرفات الكبار إللي حواليهم او بتكون رد فعل لتصرفات الكبار.
علشان الأولاد يتصرفوا بشكل إيجابي لازم إحنا ككبار نتصرف بشكل إيجابي الأول.

 

✔2-التواصل الإيجابي 
مهم جدًأ إننا نستخدم طريقة التواصل الإيجابي مع الأولاد إللي يوصل ليهم إهتمامنا.. يعني نكون في مستوى نظرهم وإحنا بنتكلم ونبص في عنيهم وما نكونش باصيين في المويايل وهما بيتكلموا معانا وما نستخدمش لهجة صوت فيها زعيق أو تهكم وطبعًا ممنوع الشتيمة والكلام السلبي إللي يكسر وإطلاق الأحكام. ودايمًا لازم يكون فيه تأكيد على مشاعر الطفل.. يعني نقوله “أنا فاهمك وحاسس بيك”.

 

✔3-التنوع بين اللطف والحزم
المفروض يكون فيه تنوع بين أسلوب اللطف وأسلوب الحزم في التربية ومهم جدًا إننا نفهم إنه الحزم مش معناه الشدة.
الحزم بيكون بوضع قواعد للحياة اليومية بنحددها مع الطفل، لإنه ثبت إنه الأطفال بيتصرفوا أحسن لما يكون فيه نظام واضح مناسب ليهم واتفاقات عارفينها كويس. أما اللطف فبيكون إننا نفهم الطفل ونحتويه ونسمعه ونراعي مشاعره وإحتياجاته ونأكد له إننا بنحبه وقابلينه حتى لو غلط وحتى لو ما سمعش الكلام.

 

✔4- فهم نفسية الطفل وتطوره في كل مرحلة
علشان نعرف نربي الطفل صح في مراحل عمره المختلفة لازم الأول نفهم تطور الطفل وإحتياجاته النفسية في كل مرحلة.. لإنه احتياجات الطفل وهو لسة بيبي مولود مختلفة تمامًا عن إحتياجات طفل السنتين ومختلفة جدًا عن احتياجات ولادنا في سن المراهقة.. وإللي إحنا محتاجين نعمله ببساطة في الجزئية دي إننا نقرأ كتير كتب عن التربية أو نحضر كورسات او ورش تعليمية.

 

✔5- تحفيز مخ الطفل بالأسئلة
عن طريق طرح الأسئلة على الطفل ممكن نستفيد حاجتين: الأول نفهم هو بيفكر إزاي ورؤيته إيه للموضوع وكمان نخليه قادر على إيجاد حلول لمشكلاته بنفسه بدل ما نديله الحل بالمعلقة في بقه.. محتاجين نسأل مثلا: “تفتكر ممكن نعمل إيه علشان نحل المشكلة دي”؟، “تفتكر ليه حصل كدة” ؟، “ممكن نتعلم إيه من الموقف ده”؟

 

✔6- نشجع الطفل بدل ما نمدحه طول الوقت
التشجيع طريقة مثالية لتحفيز السلوك الإيجابي والتشجيع مختلف عن المدح.. التشجيع إني أقول للطفل “برافو.. إنت حليت المسألة دي صح” لكن المدح إني اقوله “برافو.. إنت أذكى ولد في العالم”. التشجيع بيكون وصف إيجابي على تصرف معين الطفل عمله صح بشكل واقعي مناسب للتصرف بينما المدح بيكون جمل في المطلق وغير واقعية وعمال على بطال.
المدح بيخلي الطفل مش واقعي ومتوقع إنه الناس طول الوقت لازم يثنوا عليه ويسقفوله وده ده مش هيحصل معاه طول الوقت..

 

✔7- ليه الطفل بيعمل السلوك ده؟
من مبادئ التربية الإيجابية إننا نشتغل على السبب الحقيقي والمعتقد الراسخ إللي بيخلي الطفل يعمل السلوك السلبي بدل من التركيز على توقيف السلوك السلبي بشكل مؤقت.. يعني ممكن يكون الطفل العنيف مع أصحابه عنده مشكلة نفسية بتخليه يعمل ده.. فالصح إني أشتغل على المشكلة من جدرها مش إني أركز في موضوع الضرب ده.. لإنه السلوك العدواني ده مؤشر على إنه فيه مشكلة نفسية حقيقية وراه عند الطفل.

 

✔8- العواقب.. مش العقاب 
التربية الإيجابية يتعتمد على إنه كل سلوك سلبي بيعمله الطفل بيكون ليه عواقب ليه مش بيكون وراه عقاب.. والعواقب دي بنكون متفقين عليها مع الطفل وبيكون عارفها وفاهمها وبعد السلوك السلبي بنتلزم بالعاقبة.. والعاقبة بتكون منطقية ومناسبة لسن الطفل وليها علاقة مباشرة بالسلوك.. يعني مثلا لو الطفل نعكش أوضته بعد اللعب وسابها مش نضيفة.. يبقى لازم نروقها قبل ما ننزل نخرج من البيت وهنأجل الخروج لحد ما نوضبها..

 

✔9- العياط مش سبب يستدعي العقاب 
أمهات كتير بتزعق للطفل أو بتعاقبه علشان بيعيط أو زعلان.. المشاعر والتعبير عنها في حد ذاتها مش غلطة تستدعي أي عقاب من أي نوع وده مش معناه إننا نسمح للطفل ياخد إللي هو عايزة –لو كان مش مناسب- ويمارس الإبتزاز العاطفي بالعياط والقمص. من حق الطفل يعبر عن مشاعره ويزعل ويعيط حتى لو إحنا شايفيين السبب تافه.

 

✔10- الابتعاد عن اللوم والتقطيم وإصدار الأحكام
لما الطفل يغلط مهم إننا نفهمه ليه التصرفه ده مش مقبول ونفهم منه (أو نفهم بخبرتنا) ليه الطفل ممكن يكون عمل التصرف ده.. ونعرفه إيه عواقب التصرف ده السيئة عليه أو على الآخرين ونشوف طريقة معاه عن طريق وضع القواعد والعواقب المناسبة علشان الخطأ ده ما يتتكررش.. لكن ممنوع تمامًا إننا نلوم الطفل ونقطمه ونفترض فيه سوء النية ونصدر عليه الأحكام.. الجمل دي سلبية جدًا.. “إنت فاشل” ، “إنت غبي”، “إنت مفيش فايدة فيك”. “إنت عايز تضايقني”.

 

LEAVE A REPLY

Please enter your comment!
Please enter your name here