12 خطوة للتعافي بعد الطلاق

هنقولك 12 طريقة يساعدوكي على التعافي في مرحلة ما بعد الطلاق

Laila (Aya) Sami

168
0
كيفية التعافي بعد الطلاق

الطلاق مش خطوة سهلة وغالبًا بتكوني بقالك فترة بتفكري فيها قبل ما تقرري. وأول ما بتقرري، ممكن تعيشي فترة قاسية على نفسيتك (مرحلة ما بعد الطلاق). في المقال دا هنكلمك عن بعض النصايح اللي هتساعدك تمري بالفترة دي من غير ما تسيب عليكي آثار نفسية صعبة. التعافي بعد الطلاق هيحتاح منك ال 12 خطوة اللي هنتكلم عنهم: 

  • ما تتسرعيش. بلاش تستعجلي النسيان والتعافي. دي حاجة بتاخد وقت ومجهود وبتعتمد على حاجات كتير قوي زي: السنين اللي قضيتوها مع بعض، مدى جودة العلاقة، مدى تكريسك لطاقة لطليقك، لو انتِ اللي طلبتي الطلاق أو دا كان قرار الطرف التاني، عندكم أطفال أو لا. فيه عوامل كتير بتأثر على سرعة النسيان وتجاوز الموضوع والتعافي، عشان كدا نصيحتنا الأولى، ما تستعجليش.

 

  • اقفلي الباب عليه. صعب تكوني لسه متحاوطة به بأي شكل وتنسيه في نفس الوقت. لطيف إن علاقتكم تكون طيبة فيما بعد خاصة لو بينكم أولاد، لكن دا مش دلوقتي خالص. دا بعد التعافي، وكمان بلاش تعشمي نفسك إنك هتكوني صديقته. وكمان اتخلصي من كل الحاجات اللي بتفكرك به بمجرد ما تشوفيها أو تسمعيها أو تشميها حتى. إنتي مش محتاجة خالص إنكم تكونوا عند بعض على السوشيال ميديا.

 

  • اسمحي لنفسك تزعلي. كتير مننا في الوقت دا بتحس إنها لازم تبين إنها قوية وإنه مش فارق معاها فبتتجاهل إحساس الحزن اللي ممكن يكون جواها ودا بيتحول لتراكمات تؤثر عليها بعد كدا. انتِ مش مضطرة تباني أي حاجة. اسمحي لنفسك تزعلي وبعد ما كل الزعل يروح، هتحسي إنه راح بجد، مش متخزن في مكان جواكي.

 

  • اطلبي المساعدة لو احتاجتي. ودا في أي حاجة. لو محتاجة تتكلمي، اتصلي بصاحبتك أو روحي لمعالج نفسي واتكلمي. لو محتاجة حد يساعدك في نقل حاجاتك لبيت تاني من غير ما تروحي انتِ المكان دا، اعملي كدا. أيًا كان اللي محتاجاه، مش عيب تطلبي المساعدة.

التأمل علاجك البديل للتخلص من الاكتئاب

  • الحدود مهمة. لو حد بيتطفل عليكي في الشغل أو في أي مكان بتروحيه باستمرار، قولي بشكل صريح إنك مش عايزة تتكلمي في الموضوع واقفلي الباب دا الشخص دا أو دي بيضايقوكي بأسئلتهم. كمان ما تسمعيش الكلام اللي فيه نظرة بتعمم كلمة واحدة زي ما هي كل الرجالة كذا، المطلقة دايمًا بيحصل لها كذا، الطلاق بيكسر، مش هتعرفي تحبي تاني. كل الكلام المدمر دا، ما تسمعيهوش أبدًا.

 

  • مش لازم تجربتك تكون نفس تجربة حد تاني. ممكن تكوني سمعتي أو حد يحب يشاركك بتجربة شخصية عن الطلاق سواء قبل أو بعد طلاقك. طبعًا ممكن تسمعي من أي حد، لكن ما تفكريش إن دي الطريقة الوحيدة اللي بتمشي بها الدنيا. يعني مش لازم عشان واحدة غيرك حصل معاها حاجة معينة تحصل معاكي.

 

  • تقبلي كونك مطلقة. مش بنقول تحبي الموضوع (لو انتِ مش حاباه). لكن تقبلي الفكرة لأنك لو مش قابلاها مش هتقدري تسمعي كلمة مطلقة في أي سياق إلا وتتضايقي.

 

  • خليكي عارفة إن الطلاق زيه زي أي أزمة أو محنة. هي أزمة وصعبة لكن هتعدي.

 

  • لو بينكم أطفال، بلاش يسمعوا منك كلام سيء عن والدهم. حتى لو كان غلطان جدًا في العلاقة. الولاد هيفتكروا دا وممكن ما يسامحوكيش إنك قلتي دا. وكمان ممكن الكلام دا يشوههم نفسيًا.

 

  • حاولي تحسمي بدري جدًا موضوع الحضانة للأولاد واتكلمي مع طليقك (أو وسطّي شخص يتكلم معاه) عشان ما يحصلش حاجة غصب عنك.

 

  • ما تستعجليش العلاقات التانية. بلاش تدخلي في علاقة في أول كذا شهر بعد الانفصال لأن دا هيربكك ومش هيفيدك.

 

  • اشتغلي واخرجي واتبسطي. أيوة، خلي كل وقتك مشغول: بعد الشغل روحي جيم، اخرجي مع صاحباتك، روحي السينما، اتعلمي لغة جديدة.

 

خدي بالك من نفسك، وافتكري إنك مش لوحدك. وإن التجربة دي مهما كانت قساوتها، هتعدي.

 

مصادر ساعدتنا في كتابة المقال:

Psychology Today

https://www.psychologytoday.com/intl/blog/contemplating-divorce/201004/how-long-does-typical-divorce-recovery-take

موقع الحب ثقافة

https://lmarabic.com/love-and-relationships/breaking-up/healing-after-breakup

 

LEAVE A REPLY

Please enter your comment!
Please enter your name here