طرق لتسهيل الولادة الطبيعية وتخفيف آلام الطلق

ناس كتير تعرف إن ألم الولادة الطبيعية من أقوى الآلام اللي ممكن يتحملها جسم إنسان. علشان كده دايما كل الستات الحوامل قبل الولادة بتدور علي طرق طبيعية لتسهيل الولادة الطبيعية. ولو هتولدي طبيعي، فالدكتور غالبًا هيديكِ مسكنات
كتير علشان يخفف الألم ده. في المقال ده، هنقول لك 5 طرق طبيعية ممكن تساعدك على تسهيل وتخفيف ألم الولادة الطبيعية.

 

1. التدليك والتدفئة لتخفيف ألم الولادة:

فيه نصيحة أكيد سمعتيها لما البيريود كانت بتوجعك: قربة المية. تقدري
تشتري من الصيدلية قربة وتمليها مية سخنة وتستخدميها في تدفئة منطقة
البطن والحوض. كمان التدليك مفيد جدًا، سواء دلكتي منطقة البطن
والحوض والظهر اللي فيهم الألم عشان العضلات تخف شوية أو تم تدليك
ايديكي ورجليكي لإنه هيصرف انتباه العقل عن الألم.

 

2. المية لتسهيل الولادة الطبيعية:

بس المرة دي مش الشرب ومش في القربة، المرة دي بنتكلم عن استحمام.
لو أخدتي دش وانتِ في المخاض( وقت الولادة)، المية دي هتسهل عليكِ
جدًا وهتخفف آلام الولادة خصوصًا آلام الظهر وكمان هتخفف آلام الطلق.
فيه بعض الستات بتفضّل إنها تولد   “ولادة مائية lotus birth” وهي إنهم
يقعدوا في بانيو مليان ميا دافية ويولدوا في المية. لكن ده غالبًا بيحتاج
يكون معاكِ طبيب والمستشفيات مش مؤهلة للنوع ده من الولادة.

 

3. الاسترخاء لتسهيل الولادة:

هنا بنقصد بالاسترخاء إنك تسمعي مزيكا وتولعي بخور وشمع لونه لطيف
وريحته حلوة. شد الأعصاب بيزود الإحساس بالألم وعشان كده بنقول لك
تسترخي بقدر الإمكان لتخفيف آلام الطلق وبالتالي تسهيل الولادة الطبيعية.

 

4. العطور لتخفيف آلام الولادة:

مش البرفان العادي، نقصد هنا الزيوت العطرية زي زيت اللافندر وغيره اللي
مجرد تدليكه على الجسم أو تسخينه في الأوضة هيقلل التوتر وهيزود إحساسك
بالاسترخاء وهدوء الأعصاب وده بيساعد في تخفيف آلام الولادة.

 

5. تمارين التنفس لتخفيف ألام الولادة الطبيعية:

اتكلمنا في مقالة سابقة عن التأمل وفايدته الكبيرة، وإن واحدة من أهم طرق
التأمل هي تمارين التنفس. تمارين التنفس بتدي جسمك وجسم الجنين أوكسجين كتير، وبتساعد على التخلص من أي توتر وتخفيف أي آلام. ده غير إنه هيساعدك تحسي برضا وقبول لألم الولادة وخلال تنفسك هتحسي إنك مستعدة تشوفي
البيبي دلوقتي. غمضي عينيكِ وركزي على تنفسك، وعدي الشهيق والزفير بالأرقام.
اسحبي نفس على 5 عدات طوال وطلعيه على 5 عدات طوال. حاولي ما يكونش وقت الشهيق أطول من وقت الزفير.

لما يبقى عندك انقباضات قوية، حاولي ما تسرعيش نفسك عشان تسريع النفس بيزود القلق.

بنفكرك في النهاية إنك تكلمي دكتورك عن كل مخاوفك وكل أفكارك.

 

مصادر ساعدتنا في كتابة المقال:

موقع Pregnancy Birth Baby

موقع American Pregnancy

موقع Evidence Based Birth

موقع Baby Center

LEAVE A REPLY

Please enter your comment!
Please enter your name here