خسارة الوزن و تخسيس البطن بعد الولادة

مع إن معظم الوزن اللي بيزيد في الحمل بينزل بسرعة بعد الولادة لإن الجنين والمشيمة نزلوا، بس فيه أوقات التخسيس وخسارة الوزن بعد الولادة مش
بيظهر مفعوله على طول وبتحتاجي وقت ومجهود علشان تلاقي نتيجة. علشان
كده لو بتتبعي رجيم معين بعد الولاده هنقولك في الموضوع ده على 8
نصايح ممكن تساعدك في التخسيس بسرعة بعد الولادة.

1. حطي هدف واقعي:

ممكن تكوني من استعجالك على تقليل وزنك والتخلص من الكيلوجرامات
الزيادة بعد الولادة، بتحطي هدف مش منطقي ومش واقعي للكيلوجرامات
اللي محتاجة تفقديها. الدكتور خالد يوسف – أخصائي السمنة والنحافة وعضو الجمعية المصرية والجمعية الأمريكية لدراسات السمنة – قال في حواره مع
اليوم السابع إننا لازم نراعي إن الجسم بيبقى محتاج تعافي، وإن الستات غالبًا
في الحمل بتزيد من 12 لـ 18 كيلوجرام. بعد الولادة مباشرةً بتنزل 8 كيلوجرام والباقي (من 4 لــ10 كيلو) بيحتاجوا لتقريبًا 8 شهور يعني من نص كيلو لكيلو
في الشهر وعشان كدة الدكتور خالد بينصح بعدم الاستعجال.

2. الرضاعة الطبيعية:

طبعًا لكل أم ظروفها، وممكن أم تضطر تلجأ لضخ اللبن أو استعمال لبن
صناعي للرضيع. لكن بننصحك – في حالة لو مفيش ظروف تمنعك من
الرضاعة الطبيعية إنك ترضعي طبيعي، مش بس لأنه كويس للطفل،
لكن كمان عشان بيساعدك في خسارة من 200 – 500 سعر حراري
في اليوم، بحسب موقع ويب طب.

3. الأكل الصحي:

نقصد هنا بالأكل الصحي الأكل اللي بيفيد في إدرار اللبن من غير ما يتخن.
كتير بنسمع للأمهات الجداد إنهم لازم ياكلوا حلاوة طحينية والمغات عشان الرضاعة. إنما الحاجات دي بتزود الوزن جدًا. بننصحك بقايمة تغذية من دكاترة موقع ويب طب:

  • خمس حصص من الخضار والفاكهة والحصة دي يعني حبة متوسطة.
  • النشويات والكربوهيدرات تكون معقدة وأليافها عالية زي البرغل والشوفان والعيش البني.
  • البروتين قليل الدهن يعني الفراخ والديك الرومي والسمك والبقول.
  • مرتين سمك في الأسبوع على الأقل.
  • حصتين منتجات ألبان في اليوم.
  • السوائل: المشروبات الدافية والعصائر الطبيعية والشوربة وطبعًا الميا. مهم جدًا تكتري من شرب الميا لأنها بتسرع التخسيس وبتزود إدرار اللبن.

4. الرياضة:

معروف طبعًا إن الرياضة بتساعد في تخسيس البطن وخسارة الوزن بعد الولادة لكن كمان بتشد الجسم. وأسهل حاجة ممكن تعمليها مهما كانت حالتك الصحية هي المشي في البيت. حددي لنفسك عدد خطوات تمشيها كل يوم، وقومي امشيها في البيت حتى وانتِ بتتفرجي على التليفزيون.

5. البيئة المحيطة:

لازم تخلقي بيئة تشجعك على التعافي البدني والتعافي النفسي. حاولي تبعدي عن أي حاجة أو أي حد بيقلل منك أو بيتنمر على شكلك. وممكن تشتركي في جروب أمهات جداد على مواقع السوشيال ميديا عشان ما تحسيش بالوحدة ويساعدوكي.

6. خدي بالك من نفسك:

حاجة تبان بديهية لكن غالبًا ما بنعملهاش بعد الولادة. الأمومة مسؤولياتها كتير وغالبًا هتحسي بالإجهاد طول الوقت. عشان كدا لو عايزة تركزي مع وزنك، لازم تسيطري على الضغوط والإجهاد. ولازم جوزك يشترك في مراعاة طفلك عشان تقدري تاخدي شوية وقت لنفسك تعملي حاجة بتحبيها عشان حالتك النفسية مهمة جدًا.

7. النوم الكويس:

طبعًا في أول شهور من الولادة النوم بيكون صعب جدًا، خصوصًا الاستمرار في النوم لفترة. لكن مع ذلك، بننصحك تاخدي كفايتك أو على قد ما تقدري من النوم عشان تقدري تتعاملي مع التعب والإرهاق اللي في المرحلة دي. ممكن تشوفي طفلك بينام امتى وتنامي انتِ كمان في الأوقات دي. النوم مش بس مهم لصحتك العامة، لكن كمان مهم للتخسيس.

8. اطلبي أو رحبي بالمساعدة:

كتير بنتكسف نطلب مساعدة حتى من أقرب الناس، لكن بننصحك لو فيه امكانية إن والدتك أو أخواتك أو صاحباتك يساعدوكي في شغل البيت أو الأكل أو رعاية الأولاد، اطلبي منهم دا.

 

مصادر ساعدتنا في كتابة المقالة:

مقال اليوم السابع

مقال ويب طب

مقال ويب طب 2

LEAVE A REPLY

Please enter your comment!
Please enter your name here