9 حدائق لخروجات الأطفال في الويك إند

اعرفي مجموعة من الحدائق إللي تنفع كـ أماكن خروجات للأطفال

يمنى مهني

250
0
الصيف قرّب يخلص وهتبدي الدراسة ويمكن ده أكتر وقت بنحتاج فيه إن إحنا نخرج بأطفالنا لأماكن مفتوحة في الويك إند كمتنفس ليهم ولينا .. المفاجأة إن القاهرة طلعت مليانة جناين ومساحات خضراء جميلة جدا.. بس نصيحتنا ليكي خلال الفترة دي من السنة يا تروحي الصبح بدري أو آخر النهار علشان تبعدوا عن تأثير الشمس القوي .. وفي الخريف ما تنسيش تاخدي جاكت خفيف علشان برد بليل.
 
ودي مجموعة من الجناين إللي ممكن تنفع كـ أماكن خروج للأطفال
 
فاميلي بارك الرحاب (Family Park)
مساحة خضراء كبيرة جدا في مدينة الرحاب على طريق (القاهرة – السويس) الصحراوي، المكان واخد مساحة 70 فدانا، شغالة من خلال أنظمة إلكترونية حديثة، وفيها مجمع علمي ثقافي وترفيهي ونماذج مصغرة لمكتبة الإسكندرية، وحديقة حيوانات الجيزة وللمتحف الحربي، طبعا ده غير المسطحات الخضراء على مساحة 35 فدان وطبعًا غير النشاطات الموجودة كمان الفنار والقطر والملاعب المفتوحه والبحيرة.
 
تذكرة الدخول تبدأ من 40 جنيها وتصل إلى 275 جنيه حسب الأنشطة إللي هتختاروا تعملوها.
شغالة من 9 الصبح ل10 بليل
العنوان: طريق السويس .. مدخل الرحاب
 
  قرية العزبة – الهرم
على طريق سقارة السياحي، ترعة المريوطية. هتلاقي هناك حمام سباحة واليوم شامل الفطار والغدا وسط أجواء ريفية وعروض ترفيهية.
 
للتواصل: 01155064010 – 01222757779      
 
 جزيرة المعادي
موجودة أمام مستشفى القوات المسلحة وبتتكون من مجموعة جزر صغيرة، بتوصل بينها جسور صغيرة. فيها بحيرات صناعية، ومراكب للتجول فيها. وكمان في مطاعم وكافيهات ومنطقة مفتوحة لألعاب الأطفال.
 
للتواصل: 01018202004
 
 
  حديقة الميرلاند
أحدث حديقة تم تجديدها في القاهرة .. سعر التذكرة 30 جنيه والطفل اللي أقل من خمس سنين بيدخل مجانا ..الجنينة دي كبيرة جدا على مساحة 16 فدان والحلو فيها هتلاقي تنوع كبير في المناظر الطبيعية.. مكان تقدري تقضي اليوم بالكامل هناك من غير ما تشيلي هم الأكل لأن هناك متوفر الأكل و الشرب وكامل الخدمات  ومساحات مخصصة للأطفال.
 
 الحديقة اليابانية
هي على الطراز الأسيوي، ومساحتها 10 أفدنة، وفيها بحيرات وتماثيل وأشجار مميزة، ومنطقة ملاهي فيها بحيرة تجديف للأطفال، ومكانها في شرق حلوان، شارع محمد مصطفى المراغي وسعر التذكرة 10 جنيه
 
 حديقة الأورمان
من أكبر الحدائق في القاهرة، وفيها طبيعة نادرة وكمان مدينة ألعاب للأطفال وكافتيريا فيها وجبات، ومكانها مميز في شارع الدقي أمام جامعة القاهرة وسعر التذكرة 3 جنيه للفرد.
 
 الحديقة الدولية
اسمها كدة علشان كل جزء جواها بيعبر عن دولة مختلفة  جواها مطاعم وكافيهات وملاهي وأماكن عامة للجلوس .. موجودة في مدينة نصر وسعر التذكرة في الأعياد 40 جنيه.
 
 الكامبو بارك
عبارة عن مساحة خضراء جميلة جدا في قلب النيل  ..متقسمة لقعدات عربي وكل قعدة فيها شواية خاصة بيها.. يعني تقدري تجيبي اللحمة أو الفراخ أو حتى الخضار من البيت عندك وتشويها  براحتك هناك.. المكان ده فيه زوديك تقدري تأجريه وفي كمان مساحة مخصصة للعب الأطفال والحلو إن الألعاب دي كلها مجانية .. يعنى تقدري تقضي  Day Use   جميل جدا مع أسرتك وأصدقائك بالأطفال.. دخول الفرد 120 للفرد .. دخول مجاني للأطفال لحد 4 سنين .. ومن 4 لحد 12 سنة 60 جنيه.. عنوانهم الجيزة بعد نزلة الدائري في إتجاه المنيب عند يافطة “أهلا بيك في ابو النمرس” وقريب جدًا من محطة مترو المنيب ..بس هتحتاجي تحجزي قبلها ودي أرقام التليفونات للحجز .. 37493173 02-  أو 01093455959
 
 حديقة الأزهر
من أكبر الحدائق الموجودة في القاهرة التاريخية بعد الغورية ومسجد الحسين ومسجد الأزهر وفيها مطاعم وكافيتيريات وقعدات مميزة، وتقدر تقعد وسط الخضرة والمياه وسعر التذكرة 20 جنيه  ومواعيدها من 9 الصبح لحد 10 بالليل.
 
 
 
 
 

LEAVE A REPLY

Please enter your comment!
Please enter your name here